NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
17
Thu, Jun
54 Nuovi articoli

Sa cida sulcitana in curtzu Dae su 31 de maju a su 6 de làmpadas

Novas in Sardu (LSC)
Aspetto
Condividi

Sa cida sulcitana in curtzu Dae su 31 de maju a su 6 de làmpadas

Custa cida puru sunt arribados algerinos in su Sulcis. Su 31 de maju sa Guàrdia de Finantza at intertzetadu duas barchitas a pagu tretu dae su portu de Sant’Antiogu. In totu ant firmadu 13 òmines e 1 fèmmina. Comente semper nche-ddos ant lòmpidos a su tzentru de collidura de Muristenis pro incarrerare is protzeduras de identificadura e de espulsione.

Dae su 1 de làmpadas est operativa sa App pro su telefoneddu e su tablet pro prenotare is apuntamentos cun is ufìtzios comunales de Igrèsias. Sa app si narat “ufirst” e est a in donu e permitit de scioberare, in is limites de sa disponibilidade de is impiegados, s’oràriu e sa data prus còmuda pro is utentes. Dae chi s’apuntamentu est prenotadu sa app permitit de arritzire una notìfica pro regordare sa data e s’ora de s’apuntamentu. Si podet prenotare fintzas dae su PC dae su situ https://ufirst.com . Pro imoi si podent prenotare apuntamentos cun is ufìtzios de is tributos, de s’anàgrafe e de s’urbanìstica e edilìtzia privada ma a lestru sa prenotatzione on line at a essere posta a disponimentu pro totus is servìtzios comunales.

Martis est acabadu sa de 22 editziones de su Giro delle Miniere organizadu dae sa SC Monteponi de Igrèsisas. Sa cursa at carrargiadu in totu 347 chilòmetros ispartzidos 5 tapas, cun sa cronòmetro de su Cixerri (dae Bidda Massàrgia a Silìcua) chi baliat pro su campionadu italianu de ispetzialidade e sa Gran Fondo delle Miniere chi invècias baliat pro su tìtulu regionale. Sa classìfica generale dd’at binta Eros Piras, invècias sa milanesa Valentina Zucco at bintu sa clàssifica de is fèmmnas. Comente semper est istada una bona vetrina de promotzione turìstica pro su territòriu: infatis ant partetzipadu a s’eventu, contende atletas e acumpangiadores, prus de 400 personas chi sunt arribadas puru dae Continente e fintzas dae s’èsteru.

S’Ecomuseo Rosas (Narcau), su Museu Archeològicu “F. Barreca” (S.Antiogu), su Museu de su Crabone (Carbònia) e su Museu de Artecuntemporànea de Caleseda ant arritzidu dae sa cummissione guvernativa s’acrèditu pro intrare in su Sistema Museale Natzionale. Est unu reconnoschimentu de importu mannu chi naschet dae sa cualidade de s’oferta culturale e dae sa sustenibilidade ambientale de is museos chi in custa manera intrant su su circuitu natzioanale chi ddis at a donare visibilidade prus manna. In prus custos museos podent benefitziare de su sustegnu de s’istadu pro atzèdere a initziativas finantziàrias, formativas e culturales prevèdidas a livellu ministeriale.

Su Comunu de Sant’Antiogu at postu unu contributu de is chi si narant “a fondo perduto” de 750 èuros (156mila èuros su finantziamentu totale) pro totus is impresas chi tenent sa sea operativa in Sant’Antiogu e chi ant tentu limitatziones mannas pro more de sa pandemia de covid-19. Su contributu chi est destinadu a is siendas de is servìtzios a sa persona, de su cummèrtziu e a is assòtzios isportivos, si podet oberare pro pagare is utèntzias (àcua e lughe) e sa TARI. Si is bulletas sunt giai pagadas tocat a alliongiare a sa dimanda (chi iscadit su 18 de làmpadas) is bulletinos de su 2021.

Paret chi ocannu is piròmanes tengat bidea de si ispassiare meda. Custa cida puru si sinnialant fogos: mèrcuris In Teulada, in sa zona de Santa Luxia est intervènnidu s’elicòteru dae Pula e is pompieris de Carbònia chi no ant acurtu de acabare chi sunt dèpidos andare a Campu Frassolis (in comunu de Carbònia) aundi est arribadu s’elicòteru dae Marganai cun is iscuadras de is cantieris Forestas de Gonnesa e is assòtzios de volontàrios locales. Invècias domìniga in Carloforte est intervènnidu s’elicòteru dae Marganai e sa personale eliportadu de sa Forestale de Sant’Antiogu cun is volontàrios de sa LAVOC.

Agiornamentu covid-19. Est andada bene meda puru in Sant’Antiogu sa campagna de vacinatzione de massa prevèdia pro is ìsulas minores incarrerada gràtzias a sa collaboratzione de s’Esèrcitu cun is amministratziones e is assòtzios locales de volontariadu e sa retza Ad Adiuvandum. In is 5 dies de campagna ant vacinadu 7.635 residentes in comunos de Caleseda e Sant’Antiogu e a custos tocat a ddoe aciungere is 2500 chi aiant giae fatu sa primu dose. A contos fatos su 90% de sa popolatzione isulana vacinàbile tenet fata assumancu sa primu dose e duncas su camminu est incarreradu bene de diaderus. In su mentres sighint a ammelliorare is datos dae su territòriu: abarrant 3 positivos in Domunosa e in S.G. Suèrgiu, torrant a zeru is casos in Villaperùciu. Chini iscriet no at agatadu agiornamentos de Carbònia e Igrèsias. Impeuat invècias su nùmeru de is positivos in Portescusi cun is casos sunt artziados a 19. Custu datu nos arregordat ca a torrare a segus est unu momentu e duncas est pretzisu a sighire a rispetare is règulas de distantziamentu sotziale e de igene. Abarrade sanos!
Roberto Pinna