Lunis ant presentadu su programma de sa de XI editziones de su Festival Culturale Liberevento. In totu s’ant a fàere, dae su 7 de mese de argiolas a su 30 de austu, prus de 30 eventos in is comunos de Macumere, Carbònia, Igrèsias, Bidda Massàrgia, Gonnesa, Caleseda, Teulada e pro sa primu borta partetzipat puru Masainas. Sunt prevèdias is presentatziones clàssicas de libros e arresonos cun autores de gabbale connotos in su panorama natzionale e autores nous e in prus ddoi ant a essere puru ispetàculos musicales de cualidade arta meda.
Unos cantu eventos sunt giai esauridos aici a comenti in d-una die sunt ispaciados is 7500 postos disponìbiles po su cuntzertu chi Mahmood at a fàere su 31 de mese de argiolas chi benit in s’istàdiu Monteponi.
Sighint, pretzisos, a isbarcare is algerinos in su Sulcis. Intr’e martis e mèrcuris sa Guàrdia de Finantza at intertzetadu in mesu de mare 21 personas in 3 barchitas, cenàbara is Carabineris ant firmadu 4 personas chi fiant andende-si-nde dae sa pràgia de Porto Pino e àteros 5 ddos at interzetados in mesu de mare sa Guàrdia de Finantza. Comente semper is Carabineris a pustis de is bìsitas mèdicas de ritu nche-ddos ant acumpangiados a su tzentru de collidura de Muristenis pro incarrerare is protzeduras de identificadura e de espulsione.
Nc’at polèmica manna in S. Anna Arresi. Infati su consìliu comunale in d-una setziada tesa meda at aprovadu su passàgiu de totu sa retza e de is impiantus ìdricus a Abbanoa, abbandonende duncas sa gestione comunale. Dae s’opositzione cuntestant su passàgiu e ant dimandadu de rinviare sa detzisione de su consìliu comunale a manera de coinvòlgere is tzitadinos ma dae sa magiorantza ant nadu chi custu scioberu fiat prevèdidu in su programma eletorale insoru e duncas totu cantu est fatu in trasparèntzia. In prus s’assessore Claudio Mei at ispiegadu chi in custa manera su comunu at a risparmiare dinai meda chi est impreadu siat pro arrangiare is guastos chi praticamente sunt una cosa contìnua e siat pro comporare s’àcua chi arribat dae duos sondàgios privados e in prus in custa manera nd’ant bogare traballu meda dae s’ufìtziu tècnicu e dae s’ufìtziu tributos. Fatu istat ca dae s’opositzione e s’ex sìndigu e consilieri regionali Paolo Dessì non si arrendint e sunt arregollende firmas pro chi su consìliu comunali arritirit sa delìbera.
Custa cida puru at suladu bent’e sole e at fatu basca manna cun temperadus sìmbiles a su mese de austu de s’annu passadu. Custu clima “agiudat” is sòlitos male intraniados chi si ispassiant a atacare fogu: infatis domìniga a meigama in Carbònia est partidu unu fogu in sa zona de Rosmarinu e in su mentris chi is iscuadras de is pompieris e de sa protetzione tzivile fiant bonifichende s’àrea est iscopiadu un’àteru fogu in via del Minatore cun sa pampa chi est arribada acanta de sa ferrovia ponende in perìgulu la tzirculatzine de is trenos e est intervènnidu s’elicòteru dae sa base de Marganai pro mellus siguresa. E in contu de fogos parit chi in Carbònia si siat torrende a coa a sa metade de is annos 90 candu candu abrusiant is veturas a unda : ormai s’est perdìdu su contu de is màchinas distrutas sena de motivu e est crescende sa preocupatzione de is residentes.
Sa Scuola Basket Carbonia at at pèrdidu sa sèrie de finale de su campionadu de serie D contras a s’Oratorio Elmas 2 a 1 (at pèrdidu in domu sa gara decisiva 88-74) e duncas no artziat de categoria ma de siguru s’assòtziu isportivu mineràriu si podet cunsolare cun sa bìncida de su tìtulu regionale under 14 silver chi lassat isperare bene pro su benidore.
Roberto Pinna
