Mèrcuris sa diretzione de sa ASL 7 at atobiadu una delegatzione de is sìndigos de su Sulcis pro arresonare in contu de is problemas mannos meda de sa sanidade in su logu nostru, ma solutziones pro imoi e tanti no nd’ant agatadu e duncas su su pronto soccorso de su CTO abarrat serradu e incumentzat a aumentare puru sa tensione de is voluntàrios chi faent su servìtziu insoru in is ambulàntzias proita ca, a segunda de situatzione, depent abetare ora meda pro chi is patzientes insoru bengant atèndidos in d-una istrutura chi bortas meda andat in suferèntzia pro more de sa farta de personale in cunditziones “normales” e imoi, craramente, sa situatzione est male e peus. Su primu de mese argiolas totus is sìndigos sulcitanos, francu che is de Carbònia e de Igrèsias, ant atobiadu in Perdaxus pro sinnialare su fatu chi issos rapresentant 70mila residentes e duncas is problemas, chi impeuant dònnia die, non sunt sceti pro Carbònia e Igrèsias ma de totu su logu nostru e chi si sunt arròscidos de èsser cunvocados pro ascurtare chistiones semper noas ma ca est arribada s’ora lassare a una parte is responsabilidades de su passadu e de reagire totus impari pro agatare solutziones bonas e chi durint in su benidore.
In Bugerru sunt andende a innantis is traballos in su portu: infatis nd’ant tramuradu totu s’arena chi impediat s’atzessu a s’istrutura e si sunt liberados 60 postos pro is barcas e sa fungudia de su fundale est arribada a 2 metros. Est cuntenta meda de is traballos (1 milione de èuros su valore de su finantziamentu) su sìndigu Laura Cappelli chi at nadu chi fiant prus de 20 annos chi abetaiant custos traballos chi ant permìtere de donare una manu de agiudu a su setore de sa nàutica de diportu.
Su 30 de làmpadas depiant acabare is traballos in su ponte de Funtamare (chinde fiat arrutu in su mese de abrile de 2 annos a coa) ma s’amministratzione comunale de Gonnesa at cuntzèdidu una pròroga de 3 meses proite ca sa dita afidatària at tentu problemas mannos a corbare su materiale e at incumentzadu dae pagas dies a ghetare is pilastros. Is chi bolent andare a sa pràgia podent passare dae unu mori biancu gràtzias a s’acòrdiu intr’e su comunu e s’agentzia Forestas.
Cenàbara passadu is sìndigos de Teulada e de Frùmini Majori ant annuntziadu chi s’EGAS (s’ente de guvèrnu de s’àcua in s’àmbitu sardu) at autorizadu is amministratziones comunales a sighire a gestire s’àcua a contu insoru. Duncas Daniele Serra e Marco Corrias cunsiderant custu resurtadu unu sutzessu mannu, frutu de su traballu incumentzadu in su 2017 dae is funtzionàrios comunales e professionistas, ma ischint bene chi nc’ant a èssere investimentos de fàere impari a calincunu sacrifìtziu pro chi is cuntzitadinos insoru paghint is bulletas prus a baratu in cunfrontu a is chi sunt emìtidas dae su gestore regionale (Abbanoa) chi est berus ca est prus caru ma bogat traballu meda dae is ufìtzios comunales e permitit de arrisparmiare dinari pro is infrastruturas gràtzias a s’economia de iscala.
Semper cenàbara ant apicadu sa bandera asulla in Maladroxa (pro su de 4 annos de sighiu) e in Co’e Cuaddus (pro sa primu borta). Pro otennere custu reconnoschimentu de prestìgiu mannu, chi donat s’organizatzione internatzionale “Foundation for Environmental Education”, no bastat sceti chi s’àcua siat “lìmpia” ma si tenent in cunsideru puru àteros fatores comente sa sustenibilidade ambientale e s’atzessibilidade a is servìtzios e su comunu de Sant’Antiogu cunfirmat de donare atentzione manna a custas chistiones chi tenent semper prus importu e sunt castiadas dae is turistas.
A bellu a bellu, a pustis de duos annos de pandemia, seus sighende a torrare a su connotu e duncas su 27 de làmpadas in Nuxis ant torradu a fàere sa festa de Santu Perdu (ma sena de ispetàculos tziviles sende chi no ant acurtu a ddos organizare) e domìniga est aproliada gente meda a sa pratza de su medau de Sa Crèsia, in su sartu de Villaperùciu, pro afestare a Nostra Sennora de is Gràtzias.
a cura di Roberto Pinna
