Mèrcuris totus is sìndigos de su territòiu de sa ASL de Carbònia ant firmadu sa rechesta de sa decraratzione de s’istadu de emergèntzia de sa sanidade sulcitana. In d-unu documentu longu meda is amministradores sulcitanos, dae chi faghent una disàmina de sa crisi de sa sanidade e cunsiderende chi is solutziones propostas dae s’assessore Mario Nieddu s’ant a poder atuare in 2 annos, narant craru ca “a situatziones de emergèntzia si depet arrispùndere cun atziones de emergèntzia” e faghent unas cantu propostas in su mentris chi arribit custa benedita reforma de sa sanidade. Duncas pro prima cosa is sìndigos dimandant chi torrit a abèrrere prontamente su pronto soccorso de su CTO, pustis chi torrint is anestesistas (2 unidades) “imprestados” a Casteddu in su perìodu pandèmicu, chi si pongat manu a is protzeduras de seletzione de su personale a manera de ddas allestrare e chi is incàrrigos de dirigente de unidade cumplessa durint 5 annos aici chi si donit siguresa a is chi scioberant su Sulcis comente “destinatzione” e ùrtimu ant fatu puru sa proposta de aumentare su massimale a 1800 patzientes pro dònnia dotore de famìlia e de averiguare sa disponibilidade de is chi sunt in pentzione de fàere su servìtziu de guàrdia mèdica diurna. In custa manera de siguru s’at a allebiare su càrrigu a pitzus de s’atividade de su pronto soccorso chi est in suferèntzia manna e est causende disàgiu e istrobbu a is malàdios, a is traballadores e a is volontàrios.
Cenàbara sa Corte de Assise de Casteddu at cundennadu a su presone a vida a Andrea Pinna chi fiat s’ùnica persona imputada de sa morte de Fabio Serventi, su piciocu de 21 annos isparèssidu dae Perdaxus su 21 de martzu de su 2020 e chi non ant agatadu mai. Is giuges ant postu mente a is rechestas de su PM Rossana Allevi chi aiat circadu sa pena màssima e s’imputadu, chi s’est semper decrardu inotzente, dae chi dd’ant lìgidu sa sentèntzia s’est sètzidu disisperadu.
Semper cenàbara ma a merie ant incingiandu su ponte de su Camminu mineràriu de Santa Bràbara chi passat a pitzus a sa SS 126 e permitit duncas a is pellegrinos chi arribant dae sa zona archeològica de Monte Sirai de lòmpere in siguresa a Sa Grande Miniera de Serbariu.
Domìniga a note, a 74 annos sceti, s’est ispaciadu s’archeòlogu santadesu Remo Forresu chi pro 40 annos at traballadu impari a professor Enrico Atzeni in totus is isgavos archeològicos fatos in zona de su Sulcis (Montessu, Pani-Lòriga, Monte Crobu, Is Loccis-Santus, Su Gorropu e S. A. Arresi) e dae su 2001, pro 16 annos, est istadu su curadore de su museu archeològicu de Santadi.
De su covid no nd’eus torradu a iscriere ma est torrende a ispainare: is comunos non comunicant prus datos ma in foras de is potecarias si osservat gente meda abetende su turnu pro fàere su tampone. Dae fontes ufitziales asserit chi in Villaperùciu nc’at 15 positivos (ma a intru de custos nc’at gente chi s’est negativizada giae dae 2 cidas e duncas su sistema de comunicatzione de sa ASL est torrende a andare in titl) e su totale de is casos registrados in custu comunu est arribadu a 245, chi asserit a èssere prus de su 25% de is residentes efetivos e nc’at 7 personas chi nd’ant aciapadu su covid 2 bortas. Duncas mancai a bellu a bellu seus provende a torrare a sa normalidade su perìgulu no est passadu ancora. Berus est chi sa parte prus manna de sa gente ddu passat sena de si-nde acatare o mancai cun pagas dies de calentura (e dae chi passant is sìntomos sa persona costumat a abarrare istasida) ma depeus sighire a donare atentzione massimamente pro chi non cassit a personas dèbiles chi arriscant de si-dda passare male de diaderus.
Roberto Pinna
