Parit ca ocannu sa basca manna non si bollat lassare assèliare. Infatis is temperaduras màssimas sunt a abarradas a giru de 35 grados cun tassos de umididade fortes meda chi a primu note non lassaiant torrare sulidu. Sceti custu fin’e cida passadu est torradu a intrare su bentu estu chi at limpiadu su celu e rinfriscadu unu pagheddu ma est sighende a fàere calentare e no nc’at nemus, nemancu is prus bècios, chi tengat arregordu de una situatzione sìmbile in custu tempus.
A pustis de 2 annos de firma pro mori de su covid, su 5 de cabudanni at torradu a incumentzare sa campagna de isgavos archeòlogicos in sa gruta de Su Montixeddu, in su comprensòriu de sa ex miniera de Sa Marchesa in comunu de Nuxis, ghiada dae su professore Riccardo Cicilloni. Duncas po totus su mese de cabudanni unos 30 istudentes de is universidades de Casteddu e de Ferrara ant a isgavare in sa gruta cun s’iscopu de agatare collegamentos intr’e su passàgiu dae s’edade de su ràmine (2.200 a.C.) e s’edade de su brunzu (1.600 a.C.) e ant a provare a cumprèndere a comente is òmines de intzaras si siant “postos meres” de su territòriu sulcitanu. Una de is cosas prus interessantes est chi custa campagna de isgavos est aberta a su pùbblicu e duncas is chi ant a bòllere podent bisitare su situ e osservare is archeòlogos traballende.
No est cuntentu pro nudda su sìndigu de Frùmini Majori, Marco Corrias. Infatis a s’acabu de austu aiat promòvidu una circa de dinari online pro agiudare a torrare in Sardigna a una paisana sua, Mara Farci, chi est ricoverada dae 2 meses in cunditziones graves meda in Australia aundi fiat partida pro traballare. Pro dda fàere torrare serbit unu bòlidu cummertziale spetziale chi cramente est caru meda. In pagas dies s’obbietivu de regòllere 50mila èuros est arribadu e su 5 de cabudanni Corrias at annuntziadu chi firmaiant sa regorta de dinai e chi fiant prontos a ddu trasferire a sa famìlia de sa giòvuna. Fatu istat ca Selvaggia Lucarelli, giornalista bene connota in su mundu de su social network, chi in ùrtimos annos est indaghende a pitzus is circas de dinari at ghetadu umbras a pitzus de s’atzione de sustegnu incarrerada dae sa comunidade fluminesa in favore una picioca chi istat male. Est berus chi a bortas custas circas cuant iscopos pagu nòbiles, ma Marco Corrias chi est unu cronista cun 40 annos de esperièntzia a livellos artos meda, at circadu de cuntatare sa giornalista lassende fintzas is cuntatos suos pro ispiegare sa situatzione ma no at tentu nisciuna sceda.
Parit chi s’undada manna de isbarcos de algerinos in sa costa sulcitana non firmit prus. In s’ùrtimu isbarcu (sa note intr’e su 7 e s’8 de cabudanni) sunt arribadas 52 personas chi si aciungint a is prus de 200 chi sunt arribadas a s’acabu de austu. Duncas traballu meda pro is Carabineris chi comente semper nche-ddos ant lòmpidos a su tzentru de Collidura de Muristenis pro incarrerare is protzeduras de identificadura e de espulsione. A dolu mannu tocat a signalare ca unu (o fortzis duos) tentativu de isbarcu est acabado in tragèdia: infatis su 31 de austu, a pagu tretu de Cabu Teulada, is motovedetas sa Capitaneria de Portu ant recuperadu in totu su corpus de 5 personas e sa Procura de Casteddu at abertu s’indàgini pro tràficu de personas e naufràgiu colposu.
Est giai arribadu a sa de 4 giorronadas su campionadu de Ecellentza de fùbalu e is iscuadras sulcitanas no ant incumentzadu bene. Infatis fintzas a imoi su Carbonia at pèrdidu 3 partidas e nd’at bintu 1 sceti, su Iglesias invècias tenet 1 partida binta, 2 pèrdidas e 1 paregiada. Siguramente est ancora chitzi pro fàere previsiones pro is iscuadras nostras, ma siguramente toteduas punnant a si sarvare cun trancuillidade. In su mentris, a s’acabu de austu, a pustis de 3 annos s’est torradu a giogare su derby chi baliat pro is otavos de finale de Coppa Italia. Su turnu dd’at passadu su Carbònia sende chi at bintu 3 a 0 in domu e at pèrdiu 3 a 1 in Igrèsias.
Roberto Pinna
