Lunis in Sant’Antiogu ant incumentzadu a sciusciare s’ex mercadu tzìvicu pro ddu trasformare in d-unu teatro modernu e polifuntzionale de dedicare a medas atividades artìsticas. Aici Sant’Antiogu at a tenni a disponimentu s’Auditorium nou chi est su resurtau de unu programma incumentzadu 4 annos a coa gràtzias a su salvatàgiu de unu finantziamentu de 2 miliones de èuros pro is Ìsulas Minores.
In Igrèsias arribat àteru dinai dae is fundos europeos. Infatis ant finantziadu cun 3 miliones de èuros su faimentu de s’asilu-niu in bia Pacinotti in su cuartieri de Serra Perdosa. S’interventu prevedit de nde sciusciare s’asilu bèciu, chi no at funtzionadu mai, e de nde pesare de nou un’istrutura de 1400 metros cuadros totu ecosustenìbile. Su sìndigu Mauro Usai at ispiegadu ca in custa manera s’ant a dedicare 7 miliones de èuros pro sa rigeneratzione urbana de su cuartieri prus mannu Igrèsias.
Cenàbara in Igrèsias at serradu s’hub vacinale chi iant postu in sa palestra de bia E. Toti, chi fiat abertu de su 1 de maju 2021 e duncas sa palestra torrat a disponimentu de is assòtzios isportivos locale. Duncas su tzentru vacinale movit in d-un’ala de s’istrutura sòtzio-sanitària locale “La Residenza del Parco” de Domunosa, chi permitit de vacinare fintzas a 400 personas a sa die. Isperende chi non torrit prus sa netzessidade de fàere vacinatziones de massa, s’istrutura pro imoi at a traballare sceti su domingu.
A pustis de unu muntone mannu de chèscias e de protestas de is sìndigos de su Sulcis, tanti chi si nd’est pèrdidu su contu, s’ ANAS at comunicadu a is comunus de S.G. Suèrgiu, Giba, Piscinas, Villaperùciu e Santadi chi est incarrerende su progetu esecutivu po s’adeguamentu de sa SS 195 (in su tretu chi andat dae S.G.Suèrgiu a Giba) e su ponimentu in siguresa de sa SS 293 (dae s’istressiadòrgiu Villaperùciu/Santadi a Piscinas). Duncas a lestru s’ANAS at a protzèdere a espròpriare is terrenos pro permìtere de fàere totus is òperas chi serbint a custos istradones fundamentale pro sa zona de su Sulcis de Bàsciu.
At tentu unu sutzessu mannu sa de ses giornadas natzionale de sa “Camminada in mesu de is olias” organizada dae is Amministratziones Comunales de Giba e Masainas e promòvida dae s’Assòtziu Natzionale de is Tzitades de s’ollu. Infatis 120 personas sunt partidas dae sa Mata de sa Gruxi (un’ollastru seculari in mesu de Masainas) e a pee, passende is s’àndala de su Camminu Mineràriu de Santa Bràbara, sunt arribadas a su Parcu de Su de is Muras (apena foras de Giba) aundi s’assòtziu Janas at cuncordadu ispàssiu e istentu pro is prus minoreddos e invècias is mannnus ant pòtziu tastare unu cumbidu totu a base de pane e de ollu cuncordadu dae is Pro Locos de is duos comunos.
E duncas est acabadadu puru mese de ladàmine e est giai tempus de iscùdere olia. A pustis de s’annada de iscàrrigu normale de s’annu passadu, si bidet un’aumentu de sa produtzione, ma mancai sa cualidade siat semper arta meda, ma sa resa, pro mori de su calente anòmalu (is temperadurs màssimas sunt a ancora giru de 28 grdos) chi est faende torrare a vegetare is matas est bastante bàscia. Infatis in is molinos de sa zona de su Sulcis de Bàsciu unu cuintale de olia mòllida torrat in mèdia unos 11 kilos de ollu (cun puntas raras de 16), candu in àteras annadas de produtzione arta s’est arribadu puru a sa mèdia de 15 kilos de ollu a cuintale.
Eus iscritu de su clima anòmalu e de siguru custa basca est faende a manera chi non si nde isperdat su sintzu chi trasmitit a si brebeis sa “lìngua asulla” sa mortalla chi dae 20 annos est faghende dannos mannos a is pastores. Praticamente totus is allevadores de Villaperùciu ant tentu assumancus unu pegu mortu e de siguru si su tempus non mudat a frius sa mortalla s’at a torrare a ispàndere a totu zona.
Roberto Pinna
