Aici a comenti at fatu s’atòngiu, s’ierru puru nd’est lòmpidu totu paris: dae mèrcuris is temperaduras màssimas, pretzèdidas dae maestrale forte meda, sunt abasciadas de 10 grados totu a una, giòbia e cenàbara at ghetadu àcua meda in pranu e, pustis de unas cantu annos, at niadu bene in is montes de Sulcis e de Igrèsias fintzas a sa cuota de 700 metros e duncas si incumentzant a biere is arrios chi current allirgos. Totu àcua bona pro su sartu e pro is digas: in s’ùrtimu rilevamentu fatu dae s’Autoridade de Bacinu Regionale (31 de mese de idas 2022) asserit ca is batzinos sulcitanos fiant a su 55% de sa capatzidade (s'annu passadu in custu tempus etotu fiant a s'85%), e cust’àcua iat a- deper permìtere de istransire is provedimentos de limitatziones de s’impreu, sende ca sa diga de Monte Pranu (Tratalias) fiat in preallerta e sa de Punta Gennarta(Igrèsias) giai in allerta.
Est semper prus manna sa cimbella pro sa firmada totale de sa Portovesme SRL: su presidente de sa RAS Solinas at annuntziadu ca nc’at possibilidades bonas de istransire sa cassaintegratzione gràtzias a cuntratos prus vantagiosos cun is produtores de energia, ma custu giòbia passadu a chitzi mannu, de is 5 a is 8:30, unu grupu de operàios metalmecànicos de is ditas de apaltu de s’ENEL e de sa Portovesme srl, at blocadu s’atzessu a s’àrea industriale de Portovesme. Custa protesta non annuntziada est non ammostrat cantu manna est sa preocupatzioni de chini traballat in su polu industriale. In su mentris a pustis de 10 annos de sa serrada, 5 annos de progetatziones e de arrociallas burocràticas, est torradu in produtzione s’istabilimentu ex Alcoa: est intrada in funtzione sa fonderia chi at bogadu placas de allumìnniu, e imoi si abetat chi partat sa lìnnea de is billetas (a intrus de làmpadas chi benit) e chi acabit su modernamentu de sa sala eletròlisi (metadi de s’annu chi).
Un’àteru lutu in sa polìtica locale: cenàbara a 76 annos, s’est ispaciadu Sandro Masciarelli: est istadu consilieri e assessore in Carbònia e at fatu fintzas s’assessore in sa chi fiat sa Provìntzia de Casteddu e su consilieri in sa provìntzia de Carbònia-Igrèsias. Però su nùmene de Sandro Masciarelli fiat acapiadu a s’autoscuola aundi sulcitanos medas ant leadu su patente e fiat connotu fintzas pro èssere òmine de isport: grandu allenadore de fùbalu, iat fundadu s’assòtziu Carbosarda e istadu puru dirigente de su Carbonia Calcio in is annos chi custa oteniat sutzessos mannos a livellu regionale.
Est torradu su tempus pro fàere sa dimanda pro partetzipare a “Promemoria Auschwitz ”, su progetu incarreradu dae “Arci Sardegna” e s’assòtziu Deina cun is is comunos de Carbònia, Portescusi, Sant’Antiogu, Nuxis, Santadi, S. G. Suèrgiu e Bidda Massàrgia chi ant a donare a unos cantu giòvunos residentes s’oportunidade de partetzipare a unu progetu de educatzione a sa citadinàntzia europea, chi incumentzat cun su contu de su tempus passdau e dae sa manera de ddu contare, pro chi potzant isvilupare s’ispìritu crìticu netzessàriu pro èssere tzitadios protagonistas in su presente e in su benidore. Totu is informos sunt a disponimentu in is sitos isitutzionales de is comunos interessados.
In Masainas s’amministratzione comunale provat a fàere crèschere sa sagra de sa candicofa, unu de is eventos enogastronòmicos prus de importu de su Sulcis, cun s'arte. Infatis pro sa de 20 editziones, prevèdida dae su 21 a su 25 de abrile, ant abertu unu cuncursu artìsticu destinadu a totus is residentes in Sardigna: sunt ammìtidas totus is òperas chi tengant pro tema sa canciofa. Ant fatu modernamentus puru in su museu archeològicu de Santadi: infatis gràtzias a unu contributu comunale, is gestores anta aprontadu 40 pannellos illustrativos a intrus de is vetrinas chi agiudant is bisitardores a cumprèndere mellus a comente biviant is antenados nostros dae su neolìticu fintzas a s’edade romana.
Roberto Pinna
