Sa cida sulcitana in curtzu Dae su 15 a su 21 de mese de argiolas
Lunis 15: su bentu de maestrale, chi a pustis una cida de basca manna at portadu unu pagu de friscura, at donadu s’ocasione bona a is piròmanes de atacare fogos. In su territòriu de Carbònia nd’ant postu 4 unu avatu de s'àteru: su primu in d-unu terrenu acanta de s’uspidale Sirai, pustis duas bortas in Barbusi, a ùrtimu nd’ant atacadu un’àteru in d-unu campu acanta de arruga Roma in su centru de sa tzitade. Dònnia borta voluntàrios cun s’agiudu de is pompieris sunt arrinnèscidos a nde-ddos istudare a lestru.
Martis 16: una màchina nc’est arruta in d-unu scaràsciu de 5 metros in s’istrada chi impunnat a is grutas de Santu Giuanni in Domus Noas e at pigadu fogu. Iss primas personas chi sunt arribadas pro donare una manu de agiudu ant agatadu s’autista e unu passegeru foras dae sa vetura unu pagu afartados, cun calincuna ferida pagu grave ma ddos ant ricoverados a s’uspidale de Sirai pro mellus siguresa e in su mentris is pompieris nd’ant istudadu su fogu.
Mèrcuris 17: Su GUP de Casteddu at mandadu a giudìtziu prus de 70 personas de is 95 indagados pro s’iscàndalu de s’IGEA, sa sotziedade de sa Regione chi iat a deper donare cura a is sitos mineràrios serrados e a is bonìficas. Is reatos cuntestados sunt turbativa de asta, peculadu, votu de iscàbiu e àteros. Una parte pitica de is indagados at scioberadu su ritu incurtzadu (si cundennados ant a tènnere un’iscontu de sa pena), is àteros ant scioberadu su ritu ordinàriu chi at incumentzare su 22 de donniassanti chi benit. In mesu de custos ddoe at su consilieri regionale Giorgio Oppi, s’ex presidente de s’IGEA G.B. Zurru e s’ex sindacalista M. Tuveri. Invècias a pustis de 4 annos nd’est essidu Mario Crò, ex sindacalista de sa UIL, de chi s’abogadu suo e su PM etotu aiant fatu sa rechesta de prosciollimentu.
Giòbia 18: Ant fatu polèmica manna in Carbònia pro s’editzione noa de Nottinsieme, sa manifestatzione pentzada pro avalorare su centru de sa tzitade. Infatis cummertziantes meda si sunt chesciados proite chi s’arruga Gramsci est abarrada serrada a su tràficu sceti fintzas a s’ingruxada cun arruga B.Sassari e duncas sa passillada fiat prus curtza meda. A custos cummertziantes ndi-ddos est partos de èsser istados escùlididos dae sa manifestatzione e pro protestare ant apicadu unu cartellu in is isprigos de is butegas insoru. Craramente s’oposizitione in consìliu comunale atacat s’Amministratzione, dae su Comunu s’assessora Sabiu narat ca cumprendit sa positzione de is cummertziantes ma sa decisione dd’at pigada sa Pro Loco e in prus at nadu ca tocat puru chi is citadinos si fatzant a innantis a propònnere initiziativas e a pustis s’Amministratzione at a donare una manu de agiudu.
Cenàbara 19: fiat prenu de gente in s’Arena Fenìcia de Sant’Antiogu (prus de 2mila personas) pro su cuntzertu de Vinicio Capossela, cantautore e poeta irpininu, chi at arregaladu a su pùbblicu momentos de poesia e de sìntesi de is sentidos umanos, ma fintzas mùsica bene cuncordada torrende a pigare is melodias sardas prus connotas comente Gambale Twistm in d-unu ispetàculu stravanadu chi at duradu giai 3 oras.
Sàbudu 20: est andada bene meda sa de 15 editziones de sa Rassegna de su folklore chi dònnia annu organizat su grupu Sant’Elia de Nuxis. Ocannu fiat òspite una delegatzione de su MUSEC, chi est su museu de is costumes de su Molise, e duncas in d-unu cunvegnu fatu a mericeddu in sa sala consiliere s’est chistionau de is “indianinas” e de s'impreu de custa genia de arroba pro fàghere bistiris. Pustis, a de note, in sa pratza bianca ant fatu un’ispetàculu dedicadu a su mundu de is fèmminas cun is esibitzione de su coru femminile “Moristeni”, de sa cantadora nuxaia M.A. Pinna e a ùrtimu su diretore su diretore de su MUSEC Molise at presentadu su bistiri de isposa de sa regione sua.
Domìniga 21: Cun su cuntzertu de Noemi, cantante romana chi est essida dae su talent X-Factor e chi at lassadu sa mùsica pop pro si dedicare a cussa prus impegnada, est acabada sa de 29 editziones de su Narcao Blues. Sa star prus manna de s’editzione de ocannu fiat sa “Blues Brothers Orignal band”, est a nàrrere su grupu musicale fundadu dae John Belushi e Dan Aykroyd e chi ant recitadu in su film omònimu. Is ùrtimos duos ispetàculos ant tentu totus is billetos bèndidos e a gente mede chi boliat intrare in pratza Europa ddis est tocada a ascurtare is cuntzertos dae foras. De siguru custa initziativa at mòvidu unu pagheddu s’economia de sa bidda de su Sulcis de Bàsciu sende chi, comente dònnia annu, at fatu traballare una bintina de giòvanos de su logu e s’est bista gente meda (nd’at allòmpidu apostadamente fintzas dae “Continente”) passillende in mesu de su centru istòricu abetende de si gosare is’ispetàculos.
Roberto Pinna
