Sa cida sulcitana in curtzu. Dae su 30 de martzu a su 5 de abrile
Sa de cuàturu cidas de corentena est incumentzada cun sa Protetzione Civile Natzionale chi cun d-una ordinàntzia, at postu 400 miliones de èuros a disponimentu de is comunos chi ddos ant a furriare in bonos pro comporare ispesa chi ant a èsser donados a cussas famìlias chi si agatant in disacatu mannu pro mori de s’emergèntzia de su covid-19. In totu in is càscias de is amministratziones de su Sulcis-Iglesiente arribat giai unu milione de èuros (si andat dae is 220mila de Carbònia, 196mila a Igrèsias, passende pro is 92mila e prus de Sant’Antiogu fintzas a arribare a is 8.100 de Piscinas). Custu dinari serbit pro donare una manu de agiudu a cussas famìlias chi sunt abarradas sena dònnia fonte de rèdditu e duncas sunt in peleas mannas. De siguru non s' ant a risòlvere is problemas econòmicos causados dae sa tancadura de is atividades econòmicas pro cuntrastare s’epidemia ma assumancus at a fàghere girare unu pagheddu de dinai in su mentris chi at a arribare su bonus de 600 èruso pro is partidas IVA e sa cassaintegratzione pro tutus cussas personas chi non podent traballare prus.
Martis Salvatore Puggioni chi est su sìndigu de Carloforte at annuntziadu chi sa de 18 editziones de su Girotonno, non s’at a fàghere proite chi imoi est meda prus de importu a a traballare pro cuntènnre s’epidemia e duncas si nde torrat a chistionare diretamente s’annu chi benit. Mèrcuris nc’est istètia unu pagu de polèmica in Villaperùciu proite ca su sìndigu at cunvocadu su consìliu comunale in presèntzia. Is de s’opositzione ant nadu ca fiat perigulosu fàghere una riunione in d-una sala pitica cun 14 personas a intrus e duncas sa riunione si depiat fàghere in videoconferèntzia. Su sìndigu Antonello Pirosu at nadu ca sa lege permitit ancora de fàghere is setziadas in presèntzia e chi a dolu mannu sa connessione internet in su popolau no est bona pro nudda e duncas nche fiat s’arriscu de dèper annullare sa setziada si in casu calincunu de is consilieris non fessit arrinnèscidu a si cunnetere o essit pèrdiu sa cunnessione.
Giòbia a mangianu s’est arriscada una tragèdia manna candu si-nd’est sciusciadu su ponte de Funtanamare cun d-unu mezu de regorta de s’àliga chi fiat passende-ddoi. Sa bona sorte at bòffidu chi s’autista e su pessegeri de su mezu non si siant ingortos. Imoi su problema mannu est a chini tocat a agatare una solutzione chi permit custa istade chi benit a sa gente de arribare a sa pràgia. A su chi at nadu su sìndigu Hansel Cabiddu dae is cartas parit chi sa cumpetèntzia siat imboddiada in mesu de 4 entes diversos, e in su mentris at pedidu chi assumancus cuncordint unu ponte de linna provisòriu chi permitat de nche passare assumancus a pee.
Cenàbara nc’est istètiu primu casu de covid-19 in Caleseda. Dd’at annuntziadu su sìndigu etotu cun d-unu vìdeo in sa pàgina facebook cosa sua (ormai custa cosa de fàghere vìdeo in is social network est essida sa moda noa, at a èssere chi su messàgiu allompit a is destinatàrios prus a lestru). Su sìndigu at ispiegadu ca sa persona positiva est una picioca chi nd’est benia dae continente chi però fiat giai in autocorantena dae candu est lòmpida in Caleseda. Su sìndigu at nadu puru ca custa picioca istait bastante bene e est sighida dae unu dotore, e duncas no nc’at perunu perìgulu ma est craru ca tocat a abarrare in domu.
Is siendas prus mannas de su polo industriale de Portovesme (Portovesme SRL, Sarmed e ENEL) in pari a is àteras realtadis produtivas prus mannas de su territòriu sulcintanu (RWM, s’IGEA e sa Carbosulcis) ant abertu un’assiguratzione pro garantire is traballadores contras su cuntàgiu de covid-19. Custa de siguru est una nova bona po is totus cussas personas chi depint andare a traballare in logos aundi s’arriscu de cuntàgiu est artu.
Cun su Domìnigu de Prama est incumentzada sa Cida Santa chi ocannu in dònnia parròchia s’at a tzelebrare sena de is ritos e prucessiones. Ocannu no est beniu bene a andare a crèsia e duncas meda fideles ant postu unu arrampu de olia (e chini at pòtziu nc’at postu puru una folla de prama) in is gennas de is domos pro arregordare s’intrada de Gesus in Gerusalemme arricidu dae sa gente in festa.
Duncas nc’est passada sa de cuàturu cidas de inserru e de corantena. Chini iscriet custa rubrica si lassat cun is pròpius cuntzillos de cida passada: tocat a abarrare in domu, a nche nch’essire sceti si pròpiu si benit a marolla, a arrispetare is règulas de igene e sa distàtnzia interpersonale candu andaus a logos serrados. S’auguriu est de nche passare cun serinade sa Cida Santa e a de abarrare sanos.
a cura di Roberto Pinna
