Sa cida sulcitana in curtzu. Dae su 20 a su 26 de abrile
Nc’eus passadu sa de 7 cidas de inserru e parit chi in Carbònia chi siat giai acabada sa trègua polìtica intr’e magiorantza e opositzione chi fiat durada giustu s’ora pro s’aprovatzione de su bilànciu. Su sìndigu Paola Massidda chi at atacadu s’opositzione imputendidda de aere istrumentalizadu presuntos ritardos in sa pubblicatzione de su bandu pro is contributo regionales; s’opositzione de parti sua torrat a mandare a coa is crìticas de su sìndigu. Invècias in Igrèsias su consìliu comunale ant aprovadu un’òrdine de is traballos chi imepgnat su sìndigu e sa giunta comunale a promòvere, de fronte a sa Regione, s’abertura de unu fundu pro su reconnoscimentu de un’indennidade a su personale sanitàriu chi est traballende in custa s’emergèntzia covid-19 chi est prus espostu a is arriscus. In su mentris unas cantu consilieris de opisitzione ant fatu sa proposta de non fàgher pagare sa pesone a is chi bivint is domos de propriedade comunale, su sìndigu Usai at nadu ca de siguru sa giunta sua at a valutare sa proposta ma ca tocat a donare prus atentzione a totus is chi ant pèrdiu su traballu e chi pagant meda de prus de is 200 èuros a su mese afitu a su comunu.
In su mentris sunt torrende a abèrrere is campusantus comunales sceti pro is froristas chi a solos ant a pòdere intrare a portare frores in is tumbas e de chi is amministratziones comunales ant acabadu sa distributzione de is bonos pro fàghere s’ispesa (dinari de sa Protetzione Civile natzionale) sunt arricende is dimandas pro otènnere su contributu “de is 800 èuros” chi donat sa Regione pro is famìlias chi sunt in dificoltade. Su provedimentu iat a deper èssere lestru e lèbiu (bastat un’autocertificatzione pro fàghere sa dimanda), assumancus in s’idea de su guvernu regionale, ma nc’at unas cantu dudas chi at signaladu s’ANCI Sardigna dimandende un’interpretatzione originale de unas cantu normas pro resòlvere is problemàticas chi ant ammostradu is responsàbiles de is ufìtzios sociales de is comunos. Totus isperant chi is rispostas a arribint a lestru proite chi gente medas, pruscatotu is chi tenint partita IVA, chi sunt personas chi ant semper traballadu sena de pedire mai agiudu e chi imoi si agatat sena de nudda, sunt intrende in peleas mannas.
Intantis est arribada una bella novidade: su 27 de martzu sa Portovesme srl cun is RSU de Santu Aìngiu e Portovesme aiant promòvidu una regorta de fundos de is traballadores pro agiudare is uspidales de su territòriu. Imoi chi sa regorta est acabada sa sienda at a ponni tres bortas su tanti chi ant regortu is dipendentis: in totu sunt a disponimentu de is uspidales de Carbònia, Igrèsias, Santu Aìngiu e is RSA de su territòriu 76mila èuros chi ant a serbire pro comperare DPI, machinàrios e totu su chi serbit pro chi funtzionint mellus in sa mellus manera possìbile.
Sàbudu 25 de abrile fiat sa Festa de sa Liberatzione dae su nazifascismu, ma non si sunt fatas is cerimònias chi si costumaiant a fàghere in is annos passados. Duncas sceti in Carbònia, sigundu is dispositziones previstas pro firmare s’ispainadura de su covid-19, duas personas de s’ANPI ant postu una corona de frores asuta de su momentu dedicadu a is mortos de totus is gherras. De siguru in custu tempus lègiu sa festa de su 25 de abrile, chi in is ùrtimos annos fiat perdende de importu e inderetura nche fiat china dda cuntestaiàt, at torradu a pigare valore sende chi in medas si sunt acatados ca sa Libertade est bene pretzios chi comente totus is cosas non materiales nde cumprendeus su valore sceti candu ddas perdeus.
Custu fine de cida in Sa ‘Idda depiant èssere dies de grandu festa sende chi duas cidas a pustis de Pasca Manna si afestat Santu Antiogu chi est Patronu de Sardigna, ma aici a comente est acuntèssidu pro Pasca Manna, po mori de s’epidemia no est beniu bene ne a fàghere protzessiones e missas e nemancu ispetàculos làicos. De siguru in is ùrtimos annos sa festa fiat creschende meda ma in su benidore no ant a ammancare is ocasiones pro afestare a comente ddi amminescit a su Patronu de Sardigna.
Aici nc’est passada sa de seti cidas de corante e de accoru. Ormai est dae tres cidas, gràtzias a s’impegnu de is totus in su rispetu de is normas de noas de distàntzia sotziale, chi in logu nostru non si sunt registrados casos de positividade a su corona virus. Eis a èssere arròschidos de lìghere semper is matessis cosas ma... tocat a abarrare in domu, a nche nch’essire sceti si pròpiu si benit a marolla, a arrispetare is règulas de igene e de distàtnzia interpersonale candu andaus a logos serrados. S’augùriu puru est uguale: a abarrare semper sanos!
Roberto Pinna
