Sa cida sulcitana in curtzu. Dae s’11 a su 17 de Maju
Lunis pro mori de is normas de cuntenimentu de sa pandemia de covid-19 s’est pòtzia fàere sceti una tzerimònia cun pagu personas (2 ex minadores e is sìndigos de sa zona de s’Igresienti) e ant fatu sonare is sirenas de sa miniera de Campu Pisanu pro arregordare is cent’annos de sa strage de Igrèsias. Infatis fiat s’11 de maju de su 1920 candu in sa Pratza de sa Seu fiant aproliados prus de 1000 traballadores chi pro protestare contras sa diretzione de sa miniera pro otènnere cunditziones de traballu prus bonas. Is carabineris e is guàrdias règias aiant isparau contras a is minadores causende sa morte de 7 (5 in s’iistanti e 2 a pustis prus 24 fertus).
Mèrcuris a pustis de unu muntone de rinvios ant incumentzadu is traballos de dragàgiu de su canale de Sant’Antiogu: sa nave-ponte ARGO nd’ant a bogare prus de 2000 tonnelladas de sedimentos dae su fundu da sa laguna e a pustis nche-dd’ant a pònnere in d-un’àrea aprontada acanta de su ponte. Duncas fintzas a s’acabu de is traballos est proibia de su totu sa navigatzione in sa laguna.
Sèmper mèrcuris a pustis de tres cidas de sa prima rechesta fata dae s’ANCI Sardigna (22 de abrile) sunt arribados is acraramentos de sa Regione in contu de sa Lege n.12/2020 (sa de “is 800 èuros”) e duncas sunt medas is famìlias chi isperant is ufìtzios sotziales de is comunos isblochint is pràticas chi sunt abarradas suspèndias pròpiu proite chi sa normativa non fiat crara pro nudda. In su mentris su presidente de sa RAS Solinas s’est pigadu sa responsabilidade, in pràtica pighende su postu de is sìndigos, de abèrrere is atividades in is comunos chi no ant abertu dae s’11 de maju. Ma a contos fatos no at cambiadu nudda etotu: metadi de is sìndigos de su Sulcis aiant detzìdiu de lassare totu serradu proite chi s’ordinàntzia de su Presidente de sa Regione fata su 3 de maju fiat in cuntrastu cun sa normativa de su Guvernu natzionale e is atividades cummertziales e de is servìtzios a sa persona ant sighidu a abarrare serradas fintzas proite chi is titulares fiat abetende is lìneas-ghia de s’INAIL chi sunt arribadas pròpiu a mèrcuris a mengianu e duncas no ant acurtu a aprontare totu cantu.
In custas dies ant incumentzadu a fàghere matantza in is tunnaras de su Sulcis. Ocannu pro mori de s’emergèntzia in logu de 4 impiantos si-nd’at a oberare 2 sceti: su de s’Ìsula Prana (aundi cenàbara ant cassadu 129 tuninas) e su de Cabu Altanu.
Sàbudu in Carbònia s’est ispaciadu a 91 annos su dotore Enrico Pasqui chi est istètiu a incumentzare dae is annos 50 unu de is fundadores de su sistema sanitàriu sulcitanu. Dottor Pasqui, chi fiat unu de is màssimos espertos in Sardigna de malaria e de leucemia, at lassadu totus is incàrrigos in su 1995 a pustis de 40 annos de servìtziu in s’ùspidale Sirai aundi at dirigidu is repartos de pediatria, meighina generale de laboratòriu, a pustis su de cardiologia.
Podet èssere chi su Carbònia artzit deretu in Serie D si sa FIGC detzidat de firmare a manera definitiva su campionadu de Ecellèntzia. Infatis su Carbònia, de chi aiat bintu sa Coppa Italia regionale, a pustis de 23 giorronadas fiat primu a solu cun 6 puntos in prus de su Castiadas. De siguru iat a èssere una bella cosa pro totu su Sulcis e sa sotziedade ghiada dae Checco Fele s’est giai posta a circare unu sponsor nou e provat a risòlvere sa chistione de s’istàdiu Carlo Zoboli cun s’amministratzione comunale.
Dòminigu s’obispu nostru, monsignor Zedda, at annuntziadu chi non s’at a fàghere su pellegrinàgiu de Maria Munserrara a Tratalias. Su partentza fiat prevista pro su 21 de maju, sa torrada pro martis 26. Comente est acuntèssidu pro totus is ritos de Pasca Manna e pro sa Festa de Sant’Antiogu, est beniu a marolla a firmare custu pellegrinàgiu pro amparare sa salude pùbblica. Ma a comente pro Sant’Antiogu, siguramente in su benidore eus a agatare sa manera de afestare a comente ddi minescit sa Reina de su Sulcis.
Aici nc’eus passadu fintzas sa de duas cidas de sa Fase 2 e a bellu a bellu su nùmeru de is malàdios est abascende in totu s’Ìsula e in logu nostru est ormai de unu mese e mesu chi non si signalant casos de positividade a su covid-19. Duncas si podet nàrrere chi sa cosa est andende bene meda. Però Is crònacas natzionales nos imparant ca abastat unu momentu, un’atzione fata mancai in bona fide, pro pèrdere totu su sacrifìtziu mannu chi eus fatu fintzas a imoi. Duncas andat bene a nche essire e atobiare amigos e parentes ca a pustis de 2 meses serbit puru a si deviare sa conca ma est pretzisu a abarrare atentos: candu andaus a logos serrados e ddoi at àteras personas depeus oberare sèmper guantos e mascherinas e depeus mantènnere semper sa distàntzia sotziale. S’augùriu est semper uguale: a abarrare sanos!
a cura di Roberto Pinna
