Sa cida sulcitana in curtzu. Dae su 1 a 7 de làmpadas
Lunis in Carbònia, pustis de 8 meses de assèliu sunt torrados a incumentzare is trumentos in sa magiorantza a 5 Isteddas chi guvernat in comunu. Infatis lunis s’est dimìtidu Elio Loi chi est su de 4 consilieris a lassare is bangus de su consìliu comunale (2 sunt andados a s’opositzione) e a custu tocat a acìungere 6 assessores chi ant lassadu s’incàrrigu in custos annos. Su postu de Loi ddu pigat Carla Cannas chi tres annos a coa aiat firmadu unu documentu chi cuntestaiàt su sìndugu Pàola Massidda.
Mèrcuris cun is parcos archeològicos de Montessu e de Monte Sirai, ant torradu a abèrre giai totus is sitos culturales de su territòriu. Est de sinnialare sa protesa de is traballadores de su sistema museale de Carbònia chi cun su sindacadu CGIL-Filcams denuntziant su demansionamentu e sa consighente ismenguadura de s’istipèndiu chi at detzìdiu dae sa magiorantza de is sòtzios cooperativa Sistema Museo chi tenit sede in Perùgia. Depint ancora abèrrere a is bisitadores is grutas de Su Mannu (Frùmini Majori) e de Su de Is Tzuddas (Santadi) chi in is ùrtimos annos, postas in pari, ant tentu prus 50.000 bisitadores. De siguru sa fase 2 pro is grutas est meda prus difìtzile sende chi si tratat de un’ambientes ùmidos meda e serrados, aundi a tretos est netzessàriu a camminare aguantende passamanos e a bortas benit male a respetare is distàtnzias de siguresas e pro imoi dae su guvernu non est arribada nisciuna diretiva. A s’acabada at a tocare e is gestores de is duos sitos a agatare solutziones solos pro sarvare, pro cantu si podet fàghere, is postos de traballu de is guidas. In su mentris si annuntziant tempos longos meda pro arrangiare su ponte chi permit de arribare a sa pràgia de Funtanamare e in su mentris is Carabineris sunt indaghende pro averiguare de chini fiat sa responsabilidade de sa manutentzione de su ponte.
Giòbia est arribada una nova bona pro Igrèsias. Infatis su sutasegretàriu a sa Defensa Giulio Calvisi arrispundende a s’interrogatzione de s’onorevole Deidda Sasso de FdI at annuntziadu chi pro is annos 2022 e 2023 sunt previstos interventos de ricualificatzione chi balint 800mila èuros in sa caserma Trieste de Igrèsias chi est una de is 5 iscolas natzionales aundi si formant is Carabineris.
Su progetu de su ponte nou pro intrare a Sant’Antiogu est istadu firmadu a manera definitiva cida passada. Cust’òpera chi baliat sa bellesa de 58 miliones de èuros e fiat prevista in su Piano Sulcis. E imoi si tratat de cumprèndere a comente destinare is risorsas. At abertu sa chistione su deputadu de su M5S Pino Cabras chi a parridade sua custas su dinari depit èssere torradu a orientare in favore de initziativas cumpartzidas dae su territòriu, cunsiderende chi is 800 e prus miliones de èuros de dinari pùbblicu postos in su 2013 no ant otentu is resurtados isperados. A su pròpiu su grupu de sa Lega cun Michele Ennas at presentadu una motzione pro dimandare chi is risorsas abarrint in su territòriu e s’istitutzione de una unidade regionale pro sa gestione de is bandos e de is progetos suspèndios; aici etotu at fatu su PSdAz cun Fabio Usai at presentadu 3 interrogatziones dimandende una cabina de regia noa chi arrispundat de diaderus a is istàntzias de su territòriu siat informatziones in contu de s’istadu de s’arte. Custas essidas sunt bastante curiosas si teneus in contu su fatu chi eus votadu su 24 de friàrgiu de su 2019 e s’ùrtimu agiornamentu disponibile in su situ istitutzionale de sa Regione est de su 28 de friàrgiu 2019. A cantu parit is rapresentantes istitutzionales eligidos de su Sulcis nc’ant postu prus de un’annu a cumprèndere chi nc’at calincuna cosa chi no est funtzionende bene.
Duncas nc’st passada sa de 5 cidas de sa fase 2 e a bellu a bellu si torrat a sa normalidade. Dae mèrcuris in manera ridùsida, a pustis de totus is polèmicas de su passaportu sanitàriu intr’e su Guvernu Natzionale e su Presidente de sa Regione Solinas, ant torradu a abèrrere portos e areoportos. Pro imoi nisciunu controllu in intrada ma is chi arribant depint cumpilare un’autocertificatzione aundi si decrarànt su logu de permanèntzia, spostamentos eventuales, sìntomos de su covid-19 opuru si s’est intrados in cuntatu cun su personas chi ant tentu su covid-19. In du mentris est arribadu s’annùntziu chi fintzas sa ASSL de Carbònia, gràtzias a una donatziona de sa Fondazione Sardegna, at a tènnere su machinàriu pro protzessare is tampones e chi ant a èssere aumentados is postos destinados a curare is malàdios de covid-19 in s’uspidale Santa Bràbara. In logu nostru non si signalant casos nous dae duos meses ma cun s’abertura de is portos e de is aereoportos est mellus a èssere prontos pro calisiat cosa acuntessat. Pro imoi e tanti est andende totu bene e in su mentris nosi tocat semper a abarrare atentos sighende a mantènnere su distantziamentu sotziale e a oberare sa mascherina in logus serrados. S’augùriu pro totus est semper su pròpiu: a abarrare sanos!
A cura di Roberto Pinna
