Novas in limba sarda. Austu in curtzu
Mese de argiolas fiat acabadu cun sìndigos de is comunos costerinos de sa zona de s’Igresienti (Gonnesa, Portescusi, Igrèsias, Frùmini Majori, Bugerru, Arbus e Carloforte) chi aiant nadu ca no a su parcu eòlicu (42 turbinas artas 225 metros) de fronte a sa coste chi bolet fraigare sa sotziedade Ichnusa Wind Power. Custos sìndigos ant fatu riunione su 6 de austu cun s’assessore regionale a s’ambienti Gianni Lampis chi at donadu su sustegnu de sa Regione a is chèscias de is amministradores locales (non si conoscit s’impatu ambientale e nimancu si nci potzat èssere calincunu benefìtziu econòmicu pro is comunidades locales). Invècias ant pigadu positzione favorevole is ambientalistas de su WWF e de Legambiente.
In sa segunda cida de austu su virus SARS-CoV2 est arribadu in fèrias in logu nostru. Si sunt registrados prima 1 casu in Bidda Massàrgia e pustis 3 in Carloforte. Dae s’indàgine fata dae is tècnicos de s’ATS regionale est assèridu chi su cuntàgiu est incumentzadu in discotecata su 29 de mese de argiolas e in d-una festa privada fata su 4 de austu. S’ATS Regionale at organizadu unu screening de massa a su cali sa gente at partecipadu cun grandu responsabilidade: in totu ant fatu prus de 800 tampones (nd’ant fatu puru in Sant’Antiogu) e ant agatadu in totu àteros 18 positivos (de custos 3 in S.Antiogu e 1 in S.Giuanni Suèrgiu, is àteros in Carloforte). Su 13 est arribada sa nova de unu positivu in Narcau, pustis s’est scìpidu de unu carabineri de Nuxis, de unu casu in S.A. Arresi, duus Igrèsias, in Caleseda e in Carbònia. Custos ùrtimos fiant totus personas giòvunas cun pagos o sena de sìntomos chi si sunt giai negativizados.
Is algerinos ant sighidu a isbarcare a tropas sa costa Sulcitana. A metadi de su mese fiant giai 100 (intr’e custos fintzas 1 fèmmina prìngia e 3 pipieddas) totus arribados a barchita deretos a barchita o nche-ddos ant tragados a terra is motovedetas de sa Guàrdia de Finantza o de sa Guàrdia Costera. Duncas traballu mannu pro is Fortzas de s’Òrdine chi nche-ddos at lòmpidos a su tzentru de collidura de Muristenis chi s’est prenu a intipu. Sa situatzione fiat ancora prus grave pro mori de sa presèntzia de piciocos positivos a su coronavirus e si sunt criadas situatziones de tensione cun is comunidades de su Campidanu de Bàsciu. Is isbarcos ant torradu a incumentzare in is ùrtimas dies de su mese candu nd’at arribadu àteros 26 cun 2 barcas.
Calincunu datu in contu de su turismu. De siguru mese de argiolas fiat andadu male meda, sende sunt ammancados giai totus is istràngios, austu est andadu prus bene. Infatis in tèrmines numèricos is presèntzias sunt meda prus pagu (dae is primos datos parit chi siant su 50% de mancu cunfronta s’annu passadu in sitos de interessu) ma bona parte de is gestores de is istruturas e de is sitos de interessu teniant aspetativas prus bàscias. De siguru at aguantadu bene Carloforte mancai nche fessit su covid e fintzas Sant’Antiogu, est andada bene meda in Porto Flàvia (chi at fatu prus bisitadores de s’annu passadu) e in su nuraghe de Seruci chi fiat prenu dònnia die, custu ammostrat chi s’atzione de propaganda fata dae is amministratziones comunales de Igrèsias e Gonnesa est andada bene meda. Invècias sinnialant pèrdidas in sa zona de su fruminesu e totus is sitos de su Sulcis e custu bolet nàrrere chi ancora is amministratziones locales e is operadores no arrinnescint a si pònnere totus in pari pro prommòvere su territòriu. Imoi tocat a bìere a comente at a andare custu mese de cabudanni, ma de siguru sa propaganda negativa fata dae is mass media natzionales pro is casos de sa Costa Smeralda non faghet bene a totu sa Terra Nostra.
Ocannu pro mori de is normas chi proibint is avollotos nudda festas patronales (sceti missas opuru prutzessiones cun s’essida de is Patronos cun pagu genti avatu) e nudda ispetàculos mannos in is pratzas e custu at favorèssidu siguramente eventos musicales cun pagu ispetadores (est acabadu bene sa de 30 editziones de su Narcao Blues fata cun artistas sardos) e pruscatotu is atòbios de tipu culturale (teatru e presentadas di libros).
Fatu-fatu is sòlitos male intranniados ant atacadu fogu in su sartu, ma is volontàrios de Protetzione Civìle e is Pompieris nde-ddos ant sèmpiri istudados a lestru a bortas cun s’agiudu de s’elìcoteru de sa base de Marganai. Est istadu unu mese de temperaduras artas chi est acabadu cun strossas de àcua e travessuras de bentu chi ant causadu allagamentos in Sant’Antiogu e naes de matas arrutas in Carbònia.
Dd’eus iscritu in s’abertura: su coronavirus est girende e podet èssere perigulosu, su cuntzillu est cussu de oberare sa mascherina in logu serradu e a aguantare sèmperi sa distàntzia de unu metru dae is àteras personas. S’augùriu est de abarrare sèmpiri sanos!
Roberto Pinna
