Sa cida sulcitana in curtzu. Dae su 14 a su 20 de Cabudanni
A pustis de unu pagheddu de “pàusa” pro mori de su tempus malu is algerinos ant torradu a isbarcare in su Sulcis. Intr’e lunis e martis sunt isbarcads 49 personas e tocàt a ddoi aciungere is de mèrcuris, candu una barchita cun 14 personas est aciuvada a-i largu dae s’ìsula de Santu Perdu. Una nave mercantile in trànsitu at mandadu s’allarme e est intervènnida e at sarvadu 7 personas e àteros 6 nde-ddos at regortos sa motovedeta de sa Guàrdia Costera. A s’apellu ammancat una persona chi ant circadu pro unas cantu dies fintzas a elicòteru ma no dd’ant agatada. A contos fatos is chi sunt lòmpidos custa cida in su Sulcis (in su portu de Teulada, Porto Pino, e Sant’Antiogu) sunt 63 – in mesu de custos nci fiant fintzas fèmminas e pipios – e su totale de ocannu est giai prus de 1000: s’annu passadu s’est firmadu a 980 e siguramente nd’at a arribare àteros.
Su 24 e su 25 de su mese chi intrat si recuperant is eletzionis comunales chi non si sunt fatas in beranu pro mori de s’emergèntzia sanitària. In Santadi si candiant Màssimo Impera e Marco Loi (tot’e duos assessores in sa giunta de Èliu Sundas chi si arritirat) chi tenint is iscuadras giai prontas e ant incumentzau sa campagna eletorale insoru cun vìdeos e fotografias in Facebook; in Tratalias a pustis de 15 annus si ritirat Marco Piras: su vicesìndigu Andrea Pes at a circat de nde leare su postu e si dda giogat cun Mariano Balia; in Giba e in Piscinas si torrant a candidare de siguru Andrea Pisanu e Mariano Cogotti ma non scit ancora chini ant a èssere is avèrsarios insoru. Cida chi benit, candu ant a presentare totus is listas (si votat fintzas in Musei e in Bidda Massàrgia) eus a donare una panoràmica prus cumpleta.
Aici a comenti fiat prevèdiu in s’acòrdiu chi in firmadu su Ministeru della Difesa e sa Regione Autònoma de Sardigna in s’acabu de su 2017, s’Esèrcitu est lassende de su totu sa pràgia de Portu Tramatzu in comunu de Teulada. Infatis mèrcuris 16 is ruspas de su Gèniu ant incumentzadu a sciusciare is gabinas chi fiant òperas abusivas fatas in d-una pràgia pùbblica de sa cale s’Esèrcitu teniat una cuntzessione demaniale.
Mèrcuris a chitzi mannu in s’ ispidale de Sirai ant fatu su primu espiantu de òrganos. Duas iscuadras de dotores (una de su Brotzu de Casteddu e una arribada de Torinu) ant prelevadu is òrganos de una fèmmina decrarada morta a livellu tzelebrale. Sa ATS-ASSL de Carbònia agratziat is parentes chi in unu momentu de dolore mannu ant ammostradu una sensibilidade e una generosidade manna meda. In su mentris si provat a torrare a partire cun is bìsitas ambulatoriales in s’ispidale e in su territòriu: sunt 15mila is prestatziones chi sunt abarradas a coa pro mori de su lockdown. Pro imoi sunt faghent is bìsitas de urologia, oncologia, oculìstica, otorinu, chirurgia e ortopedia e a lestru torrat a cumentzare puru neurofisiologia, biopsias e cistoscopias. E in prus torrat a cumentzare s'atividade chirùrgica a cumplessidade bàscia. De siguru su traballu de fàere est mannu meda e si signalant is chèscias de sa gente chi abetat istrantàrgia su pre-triage infermieristicu asuta de su sole.
Si su coronavirus dd’at a permìtere su 27 de custu mese torrant a incumentzare is campionados diletantes de fubalu. Passadas is polèmicas de austu pro sa gestione de s’istàdiu comunale intr’e s’Amministratzione Comunale e sa dirigèntzia sua, su Carbonia Calcio est aprontende-sì pro su campionadu de serie D: dd’ant posta in su girone D in pari a is àteras iscuadras sardas, s’obbietivu est de si sarvare cun trancuillidade. In su girone A de Promotzione sa Monteponi puntat a is pianos artos de sa classìfica, su Villamassargia circat sa sarvesa trancuilla e siguramente assumancus a comentzu at pagare is 2 cidas de stop obbligatòriu po is casos de positividade in s’iscuadra. In su campionadu de prima categoria s’Atlètico de Villaperùciu, s’Antiochense 2013, su Narcau e sa Fermassenti de Santuanni sunt in su girone B chi acarraxt una zona ampra meda: arribat fintzas a Crabas, passende in su Campidanu de Mesu e Cabuderra. Totus is iscuadras meurreddinas punnant a fàghere unu campionadu bonu.
Sighit a crèschere is casos de positividade a su sars-cov-2. Custa cida nd’ant registradu 7 in Gonnesa (cun totus is manifestatziones suspèndias), àteros 3 in Bidda Massàrgia (funt 7 totalis), unu casu in Domus Noas, unu in Villlaperùciu e un’àteru ancora in sa base militare de Teulada. Is personas interessadas non tenint sìntomos e istant totus bene.
Torraus a iscriere is sòlitos cuntzillos: est a donare cura manna a s’igène de is manos e de is bias respiratòrias; a oberare sa mascherina candu seus in logu serrau o dònnia borta chi non podeus abarrare assumancus a unu metru de is àteras personas. S’augùriu est a abarrare sanos!
Roberto Pinna
