Sa cida sulcitana in curtzu. Dae su 26 de mese de ladàmine a su 1 de donnisantu
Domìniga 25 e lunis 26 passados s’est votadu pro is eletziones amministrativas in 6 comunos de su Sulcis. In Giba resurtadu praticamente idènticu a su de 5 annos a coa: Andrea Pisanu at pigadu su 60%, Learco Fois su 40%; est de sinnialare sa grandu prova personale de Emanuele Pistis chi at pigadu a solu 262 preferèntzias a pitzus de 798 votos de sa lista sua. In Piscinas Mariano Cogotti curriat a solu e s’afluèntzia a su 71,5% testimongiat sa stima de is piscinaios pro su sìndigu insoru chi ant cunfirmadu pro sa de tres bortas. In Santadi cun s’afluèntzia bastanti bàscia pro un’eletzione comunale (pagu prus de su 60%) at bintu Massimo Impera donende prus de 300 votus de iscartu a s’ex vicesìndigu Marco Loi. In Tratalias affluèntzia arta meda (76,31%) aundi si cunfirmat su grupu chi pro 15 annos at sustènnidu Marco Piras infatis at bindu su vicesìndigu Andrea Pes cun 55%. In Bidda Matzraxa plebiscìtu po Debora Porrà cunfirmada cunsu 75% de is votos vàlidos. In Musei, a pustis de un’annu de cumissariamentu, record de afluèntzia (78%) e at bintu in manera crara Sasha Sais cun su 69%.
Màrtis est istètia una die de polèmica in Igrèsias pro mori de unu vìdeo promotzionale giradu dae unu youtuber chi at parghegiadu sa moto sua a intrus de su munitzìpiu. Is consilieris de opositzione ant presentadu un’interrogatzione e su sìndigu puru fiat pagu cuntentu de custa scena chi est essida “virale” in su web. Su presidente de su Consòrzio Turistico per l’Iglesiente at ammìtidu s’errore fatu in bona fide e s’est iscusadu ma at invitadu puru a castiare su traballu mannu chi faent is volontàrios de su consòrtziu pro sa promotzione de Igrèsias e de su territòriu suo.
In logu nostru pro su chi pertocat su covid custa cida passada est istada difìtzile meda. Portescusi at tentu is primos casos lunis e ma su nùmeru est arribadu deretu a 13 a fin’e cida, sunt nova de cenàbara is primos casos in Perdaxus e in Tratalias. In Carloforte ant agatadu àteros 7 positivos (19 su totale cun 1 ricoveradu in Casteddu). Àterus 2 casos in Teulada; in Carbònia si prangit su primu mortu de covid (un’òmini de 78 annos) e custa cida si contant 18 casos in prus (comunicados a s’Amministratzione giòbia 29 ma agatados dae s’ATS de 22 a su 28); in Bidda Massàrgia su cuntàgiu non firmat: 6 positivos in prus chi portant su totale a 18 cun àteras 12 personas in corantena; in Igrèsisas si contant àteros 27 casos positivos chi ant agatadu gràtzias a s’atividade de screening incumentzada cida passada. In su mentris ant a abarrare serradas is iscolas fintzas a su 12 de custu mese.
Nc’at unu pagu de cimbella in su Sulcis de Bàsciu: su covid-19 est intradu fintzas in sa RSA de Nuxis: giòbia su sìndigu at annntziadu 11 casos positivos (5 òspites e 6 operadores) aintru de s’istrutura chi intr’e residentes e traballadores contat 350 personas. In Santadi is positivos de 1 solu sunt passados a 10 e finas a cida passada sa bidda fiat in campagna eletorale cun gente meda chi est andada, in manera legìtima, de domu in domu a circare votos e est craru chi su perìgulu de tènnere cuntàgios meda est artu.
Is pagas novas bonas arribant dae Gonnesa (dae 55 chi fiant abarrant in 8 is chi si depint negativazare) e dae Domus Noas aundi abarrat sceti 1 positivu.
Ormai su sistema no aguantat prus: is sìndigos non si chesciant prus pro is ritardos de s’ATS in sa comunicatzione de is cuntàgios sende ca sunt tropos is casos e tropu pagu su personale pro ddos pònnere in fatu. Bortas meda pro chi unu tzitadinu scipiat s’èsitu de unu tampone nci passant 4 dies e un’àteru tanti pro chi sa ATS comunichit a is comunos s’elencu agiornadu de is positivos e de is chi sunt in corantena fiduciària. Ormai est craru ca pro motivos diferentes is istitutziones non si podent amparare e nosi benit a marolla a si amparare nosu etotu cumportende-sì in manera resposàbile: non bastat a respetàre is normas de igene e de distàntziamentu sotziale ma si seus positivos o si intraus in cuntatu “istrintu” cun una persona positiva si depeus inserrare in domu e cun passièntzia depeus aspetare, pro cantu siat cosa infadosa, s’èsitu de su tampone pro non pònnere in perìgulu is àteras personas.
Domìnigu 1 de donniassantu est istada una die de isbarcos in sa costa sulcitana. Sa Guàrdia de Finàntza nd’at intercetadu 13 a-i largu de Teulada e nci-ddos ant tragados a su portu de Ponti; is Carabineris ant firmadu duos grupos de 12 personas in sa zona de Porto Pino; àteros 12 is Carabineris de Sant’Antiogu ddos firmados acanta de Is Pruinis. Duncas in totu 49 personas, giai totus dae Algeria ma in s’ùrtimu grupu si contant 9 personas chi arribant dae s’Àfrica Sahariana e Sub Sahariana.
Is racumandatziones ddas eis giai lìgidas, s'augùriu est a abarrare sanos!
a cura di Roberto Pinna
