Sa cida sulcitana in curtzu. Dae su 14 a su 24 de mese de idas. Salude e augùrios de bona Paschixedda!
Mèrcuris 16, pustis de annos de arrociallas burocràticas, s’amministratzione comunale de Santu Giuanni Suèrgiu est arrinèscida a resòlvere sa chistione de s’impiantu de sollevamentu fognàriu de Pramas. Infatis in 2009 a sceti 30 metrus de su populau aiant fatu unu fossu de cuntenimentu chi depiat regòllere is àcuas nieddas de Pramas e de Tratalias e a pustis nche-ddas depiat mandare a su depuradore de Santuanni. Siguramente custa est òpera de interessu istratègicu pro su territòriu e però s’at a fàere a 250 metros dae is domos e in prus est previstu su riprìstinu de su logu aici a comente fiat in antis a s’isgavu de su canale.
S’amministratzione comunale de Sant’Antiogu iscummitit in su padel, unu isport nou chi assimbillat meda a su tennis (si giogat in còpias in d-unu campu serradu) e chi est ispainende-sì semper de prus. Infatis giòbia 17 sa giunta comunale a detzìdidu de oberare giai 87mila èuros pro fraigare 2 campos in su lungomare chi ant a pòdere serbire comente atratores turìsticos.
Cenàbara 18 su consilieri regionali de su PSdAz Fabio Usai cun d-unu comunicadu aparèssidu in sa pàgina Facebook s’est chesciadu pro sa situatzione de Sulcis-Iglesiente chi <<amminescit de èssere rispetadu dae sa polìtica>>. In bona sustàntzia Usai narat chi s’assetu de medas entes chi iant a deper èssere a servìtziu de su territòriu e de is siendas non currispundit a is mudas acuntèssidas in is amministratziones locales e in s’Amminestratzione Regionale. Imputat de custu siat sa gestione pretzedente de su tzentru-manca ma fintzas s’Amministrazione Regionale e sa magiorantza de tzentru-dereta chi sustenit issu etotu in consìliu regionale e faghet s’elencu de is chistiones prus mannas chi pertocant su territòriu: arremonat infatis sa Sotacarbo, s’IGEA, sa provìntzia de Sud Sardigna e sa ASSL noa de su Sulcis-Iglesiente ancora commissariadas, sa Carbosulcis e su Consòrtziu Industriale. A parridade de chini iscriet custa rubrica Usai tenet una parte de arrexone ma est berus puru chi is consilieris regionales elìgidos in su Sulcis sunt 2 sceti in logu de 4, e duncas cumbenit chi issu etotu si impegnit pro chi si agatit una solutzione chi curregiat sa lege eletorale a manera de assigurare a dònnia territòriu sa giusta rapresentàntzia.
Domìniga 18 in Frùmini Majori ant prantadu una mata de opinu chi in s’idea de s’amministratzione ghiada dae Marco Corrias at a dèpere leare su postu, in manera ideale, de sa mata de opinu seculare chi nd’est arruta a sola unas cantu annos a coa. S’Amministratzione est regolende dinari pro creare unu parcu pùbblicu totu a giru de aundi fiat sa mata bècia chi est giai istadu progetadu Paola Thiella.
Su tempus, a pustis de unas cantu cidas de àcua e bentu, s’est torradu a asetiare e pretzisos is algerinos sunt torrados a arribare in su Sulcis. In tres isbarcos ( su primu lunis 21 e is àteros duos mèrcuris 23) is Carabineris de s’istatziones de su Sulcis de bàsciu ant firmadu in totu 29 personas (intru de custas puru unu minorenne). Comente dònnia borta nche-ddos ant lòmpidos a su tzentru de collidura de Muristenis pro incarrerare is protzeduras de identificadura e de espulsione.
Si nd’est andadu un’àteru sulcitanu de gabbale: mèrcuris 23 in Igrèsias s’est ispaciadu a sceti 60 annos s’abogadu e polìticu Roberto Frongia. Frongia fiat una persona sèria e amàbile, capassu de faeddare cun totus sena de castiare su colore polìticu e connotu pro èsser un’òmine pretzisu chi costumaiat a incarrerare atziones cuncretas in favore de is territòrios. Aiat incumentzadu sa carriera polìtica in su 1993 candu aiat fatu su visusìndigu de Mauro Pili in Igrèsias, e a pustis est istadu aassessore regionale a su turismu dae su 1999 a su 2004 e fiat torradu in regione in su 2018 cun su ruolu de assessore a is traballos pùbblicos. Est istètiu fintzas su presidente de is Riformatori Sardi e fiat impegnende-sì pro pònnere in sa Costitutzione su printzìpiu de s’insularidade.
Ant tentu unu sutzessu mannu is manifestitatziones de solidariedade chi ant cuncordadu in medas logos de su Sulcis (Igrèsias, Domonosa, Santadi, Sant’Antiogu, Carbònia, Villaperùciu): non benit bene a nàrrere in cale logu sa gente siat istada prus generosa ma una cosa est sigura: su coru de is sulcitanos, mancari si bivat in tempus malos, est mannu de diaderus!
Agiornamentu de sa situatzione covid-19. Dae is ùrtimos datos comunicados dae is amministratziones comunales de su territòriu si bidet craramente chi in generale sa situatzione est ammeliorende, ma tocat a cumprèndere ita at a cuntèssere a livellu territoriale a pustis de s’allarme partidu su martis 22 dae s’ ispidale Sirai de Carbònia (20 ricoverados cuntagiados in su repartu de meighina generale prus 8 personas de su personale sanitàriu). In su mentris, cun prus de una cida de ritardu, est operativa sa piataforma regionale chi permitit a is sìndigos de atzedere dònnia die a is nominativos de is personas positivas, negativizadas e in coranta sene de abetare is comunicatziones de ATS chi bortas meda arribaiant cun 5 e prus dies de ritardu.
In Carbònia abarrant sceti 39 positivos, in Igrèsias 52 (43 sanados e 9 casos novos sunt 9); in Domunosa su sìndigu at fatu ischire chi is positivos sunt calados a 16 ma chi sa cooperativa chi gestit un’istrutura pro antzianos dd’at informadu nc ’at 13 òspites positivos. Abasciant is positvos in Villaperùciu (14 e duncas 4 de mancu cunfronta a s’ùrtimu agiornamentu cida passada ma 11 personas sunt in corantena) aici etotu in Bidda Massàrgia (5 cun 7 personas sunt in corantena). In Santu Giuanni Suèrgiu is positivos sunt 15 e 3 personas sunt ricoverados. Invècias in Sant’Antiogu is positivos artziant a 28; in Caleseda ddoi at 7 positivos e 11 in Carloforte. A pustis de 3 cidas torrat a comunicare su comunu de Santadi: nc’at 12 positivos e 19 personas in corantena; In Giba si registrat su de duos casos e est tocadu a su sìndigu Andrea Pisanu a comunicare sa positividade sua; in Piscinas su sìndigu at comunicadu no nc’at àteros casos e duncas abarrat 1 sceti; In S.A. Arresi su sìndigu at comunicadu 2 casos positivos e 2 personas in corante. In Narcau s’Amministratzione comunale at fatu scire chi cun sa collaboratzione is dotores de famìlia est organizende unu screening volontàriu pro 1300 personas e duncas est possìbile chi su nùmeru de positvos siat bastante artu.
Chini iscriet custa rubrica agratziat meda a su diretore de www.tentatzionidellapenna.com Tito Siddi pro s’oportunidade de contare in sardu su chi acuntessit in logu nostru e si donat s’apuntamentu a s’acabu de s’annu pro lìgere su resumu de su chi est acuntèssidu in su 2020.
S’augùriu est de nche passare bene custas festas de Paschixedda e de abarrare semper sanos!
Roberto Pinna
