Sa cida Sulcitana. Dae su 29 de martzu a s’11 de abrile
Is festas de Pasca Manna sunt passadas cun trancuillidade, e francu che un’incidente acuntèssidu in Santadi aundi tres giòvunos dd’ant acabada ricoverados a s’ispidale (unu nche-dd’ant lòmpidu in còdighe arrùbiu a su Brotzu de Casteddu) no nc’at fatos de importu de sinnialare.
Invècias est interessante meda su finantziamentu de € 50.000 chi sa RAS at donadu a su PLUS de Igrèsias pro chi si fatzat unu progetu pro is personas antzianas residentes in is comunos de su distretu chi non sunt autosufitzientes chi punnit a ddas avalorare a intru de su cuntestu insoro. Duncas sunt abertas is manifestatziones de interessu pro presentare is propostas: sunt ammìtidos is assòtzios de volontariaus, is assòtzios de promotzione sotziale, cooperativas sotziales aunidos in grupu de assumancus 6 entes. Is chi bolent partetzipare depent tènnere sa sea legale in unu de is comunos de su distretu e depent tènnere esperientzia de in progetos e formas de agregatzione dedicadas a is antzianos non autosufitzientes. S’iscadèntzia est istabilida a su 15 de maju.
Mèrcuris 7 de abrile s’elissocorso at portadu una fèmmina de 70 annos de Carloforte a s’istàdiu de Carbònia pro chi s’ambulàntzia nche-dda lompessit a s’ispidale Sirai ma sa genna fiat serrada e s’ambulàntzia no est pòtzia intrare e a pustis de 20 minutos s’elicòteru at dèpidu torrare a decollare e at aterradu in su piatzale esternu ma sa fèmmina s’est morta candu est arribada a s’ispidale. Su Pùbblicu Ministeru at abertu s’indàgine pro morte curposa e at ordinadu s’autopsia.
Dae su 9 de abrile sa cumpangia de is barracellos in Sant’Antiogu tenet 12 òmines in prus. Imoi cun custas ùrtimas intradas sa cumpangia contat 30 volontàrios in totu, chi dònnia die “castiant” su sartu de santantioghesu: su traballu insoru, pretziadu meda, andant dae sa vigilàntzia ambientale a su presìdiu de su territòriu, fintzas a is controllos pro cuntènnere s’ispainadura de su Covid-19.
In Santu Giuanni Suèrgiu est operativu s’ isportellu Antiviolèntzia-Antistalking chi at a collaborare cun totus is istruturas sanitàrias e sotziales de su territòriu, sa Prefetura, is Fortzas de s’Òdine e is Amministratziones Giuditziàrias. S’isportellu donat ascurtu, cumpartzidura e sustegnu a is fèmminas pro ddas agiudare a elaborare su trauma e pro chircare de torrare a tènnere una vida indipendente. S’isportellu est abertu su mèrcuris a merie de is 17:00 a is 19:00 e s’agatat in su setore de is servìtzios sotziales a costau de sa biblioteca comunale.
Sa Sardigna at mudadu de colore: dae zona in colore de aràngiu est passada a zona arrùbia cun restritziones a sa libertade de movimentu fortes meda. In su mentris sa campagna de vacinatzione, chi est fundamentale pro torrare a sa normalidade, no est andende bene pro nudda: infatis sàbudu a mangianu s’est bennidu a ischire chi in Sant’Antiogu e in Santu Giuanni Suèrgiu fintzas a sa cida chi benit firmant de vacinare e ant suspèndidu puru is prenotatziones proite chi non sunt arribende is fialas de vacinu.
Agiornamentu de sa situatzione covid-19 in su territòriu.
Duncas sa Sardigna est intrada zona arrùbia ma is nùmeros in logu nostru sunt istàbiles o assumancus aici parit a chini iscriet custa rubrica. Infatis su datu de Carbònia (agiornadu a su 7 de abrile) narat ca in 18 si sunt sanados, 12 sunt is casos novos e su nùmeru totale de is positvos est abasciadu a 24 (4 ricoverados) cun 63 personasin corantena; in Igrèsias (datu de su 10 de abrile) is positivos sunt 19, con 5 ricoverados. Duncas sa situatzione est bastante bona in is tzidades, est prus preocupante in is comunos mesanos: In Carloforte in is positivos sunt 32 (2 in s’ispidale) e 89 in corantena; 32 is casos puru in Domunosa, In Sant’Antiogu 30 is positivos. S’ùrtimu datu de Giba (5 de abrile) narat 9 positivos e 32 in corantena, in S.A. Arresi ( datu de su 2 de abrile) 4 positivos e 7 in corantena. Unu casu sceti in Villaperùciu e 2 in corantena ma innantis de Pasca Manna nche-nde fiat 29 in corantena; istàbile sa situatzione in Santu Giuanni Suèrgiu cun 4 positivos. Positivos a su covid puru su sìndigu de Gonnesa Hansel Cabiddu (chi s’est fatu una cida de ispidale) s’assessore a su turismu Simone Franceschi. Chini iscriet no at agatadu àteras novas dae is comunos de su territòriu si non chi Portescusi est torrada a zero e chi su sìndigu de Nuxis at serradu s’asilu e s’iscola elementare pro mellus siguresa.
Duncas nos tocat a sighire a tènnere passièntzia a rispetare ancora de prus is règulas de distantziamentu sotziale e de igene chi totus connoschimos. S’augùriu, comente dònnia borta, est de abarrare sanos!
