A cantu parit, a bellu a bellu est arribende s’atòngiu cun is temperaduras (e fiat ora!) chi in is ùrtimas dies ant abasciadu de 4-5 grados, mancai sigant a abarrare a volores prus artos de sa mèdia. Lunis a chitzi mannu at ghetadu un’istrossa de àcua in Carbònia cun d-unas cantu arrugas de su tzentru chi a comente su sòlitu si sunt allagadas. A logos at torradu a istiddiare puru unu pagheddu cenàbara a note e sàbudu a de die, ma est craru ca no at mancu cuntentadu terra e serbit àcua meda a pustis de un’istade calente cantu longa.
Is sìndigos sulcitanos ant torradu a fàere intèndere sa boghe insoru. Lunis a merie si sunt atòbiados in sa sala dedicada ais Frades Fois in sa biblioteca comunale de Portescusi e in pari a totus is partes sotziales ant analizadu sa situatzione de su polu industriale de Portovesme. Dae s’atòbiu est essidu a pillu chi totus sunt de acòrdiu chi sa siguresa e sa salude sunt printzìpios de fundamentu impari a sa sustenibilidade ambientale pro s'isvilupu de su territòriu e ant dimandadu chi: totus is infrastruras siant postas a lestru a disponimentu de is imprendidores; su fràigu de una piataforma chi pongat impari totus is portadores de interessos locales (dae is atores sotziales e econòmicos fintzas s’Autoridade Portuale e sa Regione); una mesa territoriale permanente chi siat espressione de sa piataforma etotu pro chi custa potzat abarrare agiornada in manera fitiana a pitzus de is propostas chi ant a essire dae sa piataforma; chi totus is propostat cumpartzidas in su territòriu intru de is istitutziones perifèricas (Comunos e Provìntzia) e partes sotziales si trasformint in acòrdiu de programma chi depet èsser firmadu dae sa RAS e dae su Guvernu Tzentrale.
Invècias non tenent nisciuna bidea de atzeratare su dimensionamentu iscolàsticu: infatis sende chi sa normativa natzionale prevedit pro dònnia autonomia iscolàstica assumancus 900 istudiantes (dae 500 chi fiant), in sa proposta fata de su Commissàriu de sa Provìntzia de su Sud Sardigna martis passadu, asserit chi su territòriu nd'at pèrdere sa bellesa de 7 e pro nde sarvare cantu prus possìbile tocare a mòvere iscolas dae una “presidèntzia” a s’àtera. Est contràriu meda su sìndigu de S.Antiogu Nàssiu Locci chi non bolet pèrdere s’istitutu globale (chi ponet impari is iscolas superiores cun s’iscola de s’òbbligu) ma totus dimandant a is polìticos regionales, a cumentzare dae s’assessore a sa Pùbblica Istrutzione Andrea Biancareddu, de fàere ballere cantu est prevèdiu in s’Istatudu Ispetziale de sa Sardigna: est a nàrrere s’autonomia in su chi pertocat s’istrutzione pùbblica cun sa RAS chi si depet impegnare a pònnere resorsas de bilànciu pro assigurare s’istabilidade servìtzios chi sunt de fundamentu: est craru chi sa tancada de is autonomias iscolàsticas est s’antitzipu de sa serrada de is iscolas prus piticas.
Mancai apat fatu calincunu istìddiu de àcua, andada bene meda sa de XXII sagras de is olias in Bidda Massàrgia chi est in su programma de is eventos mannos finantziados dae sa RAS. Is ispetàculos prevèdidos sàbudu a mengianu ddos ant mòvidos in istruturas serradas, invècias ant fatu in manera regulare in s’Ortu Mannu is cuntzertos de Orietta Berti e Edoardo Bennato, e aci etotu est istètiu pro totus is eventos enogastronòmicos e musicales de domìnigu cun su treneddu elètricu chi andaiat e torraiat semper prenu gente dae su tzentru de sa bidda a s’olivariu.
Sunt cuntentos puru is amministradores de Teulada pro su sutzessu chi ant tentu is 3 dies dedicadas a sa sensibilizatzione a s’amparu de s’ambiente. Infatis a s’initziativa ant partetzipadu is piciocheddos de is iscolas impari a is assòtzios locales, sa Guàrdia Forestale cun is Carabineris e su Tertzu Regimentu Bersaglieris e siendas privadas. Ant regortu e seberadu àliga a casciones cun su vicesìndigu Gianluca Urru at nadu chi custos eventos chi bident semper sa partetcipatzione de una parte manna de sa comunidade, non sunt sa solutzione a su problema de s’incuinamentu ma serbint pro mudare “sa conca” de is personas chi ancora no ant cumprèndidu s’importu de amparare su logu aundi nosu etotu bivimus.
a cura di Roberto Pinna
