NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
05
Mon, Dec
53 Nuovi articoli

Sa cida sulcitana in curtzu Dae su 6 de martzu a su 12 de martzu

Novas in Sardu (LSC)
Aspetto
Condividi

Sa cida sulcitana in curtzu Dae su 6 de martzu a su 12 de martzu a cura di Roberto Pinna


Domingu 6 de martzu: Operatzione de su Commissariadu de Politzia de Iglèsias contras a s'ispàciu de droga. In totu ant identificadu 90 personas e ant arrestadu a un'òmine chi teniat duus grammos de marjuanna e 600 euros. A pustis ant percuisidu sa domu e su logu in ue traballat e ant agatadu puru 6mila èuros, prus de 100 grammos de marjuanna, una rivoltella e 50 cartùcias de càlibru 6,35.

Lunis 7 martzu: In Carbonia s'assessore regionale a is Entes Locales Cristiano Erriu at atobiadu a is sìndigos sulcitanos e at ammostradu sa lege de riforma de is Entes Locales. S'assessore Erriu, at promìtidu ca sa Regione no at a lassare a solos is comunos proita ca at pònnere resursas finantziàrias e personale cualificadu in custa fase de càmbiu e in prus sunt previstos istrumentos de perecuatzione econòmica pro is areas prus isvantagiadas.


In Sant'Antiogu sa grefa chi furat s'alcol etìlicu nc'est torrada a intrare in d-unu supermercadu. Custa borta est tocadu a su Lidl de s'arruga Matteotti e nd'ant pigadu 65 butìllias de alcol puru pro unu valore de 900 euros.


Martis 8 de martzu. In Santu Giuanni Suèrgiu s'est fatu unu cunvènniu a pitzus de su rolu de is fèmminas in sa primu gherra mondiale. Sende ca is òmines fiant cumbatende in is trinceas, a is fèmminas est tocadu a nde pesare is fillos e a castiare sa domu a solas, ma cussu chi est istètiu unu passu a innantis de importu est su fatu chi ant sostiuidu is òmines in medas traballos chi fiant prerogativa esclusiva de issos.


Mèrcuris 9 de martzu. Is carabineris de Tratalias cun cussus de sa radiomòbile de Carbònia ant arrestadu duos giòvanus chi fiant pesende ballarocu in Sant'Antiogu. Is piciocos fiant imbriagos meda, no ant postu mente ne a is sanitàrios de su 118 e nemancu e a is Carabineris, antzis ddos ant faeddados male e si sunt cravados puru. Duncas a is Carabineris est bènnidu a marolla a ddos arrestare e a unu est tocadu a ddu fàere puru su TSO.


Giòbia 10 de martzu: In Carbònia is Carabineris ant denuntziadu 20 personas proita ca fiant furende s'àcua dae sa retza de Abbanoa. Totus custas personas aiant fatu unu by-pass a su contadore de sa domu insoru e duncas arrennesciant a pigare s'àcua dae sa retza ìdrica sena de dda pagare. Is tènnicos de Abbanoa ant disativadu is allàcios abusivos.


S'impresàriu iglesiente Ninetto Deriu at bintu su bandu de sa RAS pro su cuncessione de su portu turìsticu de Sant'Antiogu. S'ispera de totus est chi custu imprendidore, chi at sempre traballadu in su polo industriale de Portovesme e est connotu pro èssere una persona de gabbale, coitit a ddu torrare a abèrrere proita ca s'istrutura est una aina pretziosa pro sa promotzione turìstica de totu su Sulcis.


Cenàbara 11 de martzu: In su centru sociale de Masainas s'agentzia Laore at aparitzadu un atòbiu a pitzus de is mensas iscolàsticas. Ant pigadu parte amministradores e funtzionàrios comunales, insignantes e dirigentes de iscolas, gestores de mensas e meres de siendas agrìcolas e rapresentantes de assòtzios de categoria. S'iscopu de s'atòbiu fiat cussu de creare unu comitadu chi iscriat unu capituladu-tipu pro is bandos de is mensas a manera chi siat garantida sa cualidade de is pastos chi papant is pipios e chi su dinari ispèndiu dae is amministratziones pùbblicas e dae is famìlias abarrit in su territòriu.


In Santu Giuanni Suèrgiu nc'est istètia una riunione de su GAL Sulcis. Is atores sociales, econòmicos e politicos in pari cun is funtzionàrios de su GAL, sighint in sa progetatzione partecipada de is resursas econòmicas postas in sa programmatzione noa de is fundos communitàrios. S'est fata sa chi si narat analisi SWOT de su territòriu, est a nàrrere chi ant analizadu is puntos de fortza, de debilesa, is oportunidades e is meletzas e ant partzidu totu in tres macroareas. In su pròssimu atòbiu, chi s'at a fàere in Biddemassàrgia su 24 de martzu, s'at a resonare a pitzus de su chi serbit a su territòriu.


Sàbudu 12 de martzu: in Sa Baronia – Villaperùciu, mancai su tempus non fessit bellu meda, est andada bene sa gara sa gara de mountain bike organizada dae sa Moros Bike – scuola di ciclismo. Defatis prus de 70 ciclistas, tra òmines, fèmminas e piciocheddos e piciocheddas, ant curtu in su circuitu longu giai 10 km fatu de istradas asfartadas, moris e andaleddas, in mesu de su sartu baroniesu. Alice Salidu de su GS Portoscuso est lòmpida prima intr'e is fèmminas, Federico Selis de s' Esercito Italino est su primu de is òmines.

Roberto Pinna

Iscriviti!! E' Gratis

Iscriviti attraverso il nostro servizio di abbonamento gratuito di posta elettronica per ricevere le notifiche quando sono disponibili nuove informazioni.
Pubblicità