NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
09
Fri, Dec
63 Nuovi articoli

Sa cida in crutzu. Dae su 18 a su 24 de abrile

Novas in Sardu (LSC)
Aspetto
Condividi

Sa cida in crutzu. Dae su 18 a su 24 de abrile

Lunis 18 de abrile: in s'ex provìncia de Carbònia-Iglèsias s'afluèntzia a su referendum contras a is trivellas èst istètia prus bàscia de sa mèdia natzionale (32,15%). Defatis at votadu sceti 32.208 personas, chi sunt su su 29,32% de is chi teniant su deretu. Si pigamus a cunsideru ca medas giovànos sunt foras pro traballu e chi nche tenemus meda antzionos chi a votare pròpiu no ddoe podent andare, est probàbile meda chi su datu fessit istètiu idènticu si non prus artu de cussu natzionale. Caleseda e Carbònia sunt is comunos in ue is eletores at votadu de prus (33,90 e 34,15%), Carloforte su comunu in ue sa gente at votadu prus pagu (18,35%). In totu s'ex provìncia su eja at pigadu su 91,10% (su datu natzionale est 86,44), Bugerru est comunu in ue su no at pigadu de prus (16,3%).

Martis 19 de abrile: Su magiorantza de su Consìliu Comunale de Sant'Antiogu at refudadu sa proposta de sa minoranza de suspèndere s'iter pro fabbricare unu ponte nou chi colleghit s'ìsula de Sant'Antiogu a sa Sardigna. Sa minorantza pediat chi s'assessoradu a is traballos pùbblicos de sa RAS torressit a pigare in cunsideru sa possibilidade de isgavare unu tunnel chi giae fiat istadu progetadu dae sa Società Montaldo is is primos annos 90. Sa decisione de acetare su ponte nou intamis de su tunnel est istètia pigada a pustis de 4 oras de dibata proita ca a parridare de sa magiorantza nci fiat s'arriscu mannu de pèrdere prus de 90 miliones de èuros postos pro finantziare is òperas previstas in su Piano Sulcis

Mèrcuris 20 de abrile: Si naraiat Alessandro Pia, teniat 33 annos e biviat in Masainas, s'òmine chi est mortu a pagu tretu dae su canale di iscolu de sa diga de Tratalias. Paret chi Pia fessit andende a piscare e apat pèrdidu su controllu de sa vetura e comente s'est acapotada dd'at istrecadu.

Giòbia 21 de abrile: Paret chi s'ex presone de Iglèsias at a èssere oberadu pro ospitare 500 migrantes e chi giae 200 ant a lòmpere cida chi benit. Sa polèmica est cumentzada sùbitu: defatis a parridade de Gianluigi Rùbiu, capugrupu de s'UDC in su Consìliu Regionale, <<custa decisione non portat sètiu perunu. Su Guvernu centrale at serradu s'istrutura proita ca no dde fiat dinari pro dda arrangiare e pro dda pònnere a norma e imoe invècias dda torrant a abèrrere ispendende duos miliones de èuro pro ospitare is migrantes>>.

Cenàbara 22 de abrile: su GIP de su tribunale de is minores at archiviadu pro irrilevàntzia su casu de tres piciocheddas minorennes chi su 3 de donniassanti de s'annu passadu fiant istètias denuntziadas proita ca fiant intradas in su polìgonu de Capo Teulada in su mentris chi fiant faende s'esercitatzione Trident Juncuture. Is ativistas antimilitaristas chi aiant organizadu unu sit-in a foras de su Tribunale de is Minores ant saludadu cun prexu mannu e tzacande is manos sa decisione de su GIP.
Sàbudu 23 de abrile: S'est scìpidu ca cincu istudentes santantioghesos (tres mascros e duas fèmminas) e una de Caleseda ant a rapresentare totu s'ìsula de Sant'Antiogu a sa finale natzionale de is giogos de matemàtica chi s'ant a fàere a s'universidade Bocconi de Milano su 14 de maju chi benit. Is piciocheddos ant otentu resurtados bonos meda in sa de 19 editiziones locale chi s'est fata su 12 de martzu passadu in sa citadella universitària Pauli Pirri.

Domingu 24 de abrile: Est istètiu unu fine de cida ricu de eventos in su Sulcis. In Iglèsias s'est fata sa fiera de su libru, in Carloforte ddoe fiat sa sagra de su cuscuss, in Sant'Antiogu ant fatu Monumenti Aperti, in Gonnesa s'assòtziu culturale S.Andrea mostra folkoristica "In die de infatu e in die nodia", in Masainas sa segundu tapa de Primavera Sulcitana. Dònnia manifestatzione at tentu unu sucessu bonu de pùbblicu mancari su maiestrale fridu apat suladu a forte e prus de èssere in beranu mannu pariat de èssere in d-una die de atòngiu. Calincunu problema nc'est istètiu in Portescusi: defatis su traghetu pro Carloforte chi depiat partire a is 11:50 est andadu in overbooking, est a nàrrere chi ant bèndidu cincuanta billettos in prus de is postos chi fiant efetivamente disponìbiles in sa nave. Sunt intervènnidos is carabineris e is òmines de sa Capitanèria de Portu pro calmare sa gente chi fiat protestende. In s'interis sa cumpangia Delcomar nd'at fatu lòmpere un'àteru traghetu e totus is chi aiant comporadu su billetu sunt pòtzidos andare a Carloforte.