Sa cida sulcitana. Novas in curtzu Dae su 13 de a su 19 de donniassanti
Domingu 13: In Masainas est acabada sa de X editziones de “Dalla Terra e Dalle mani”. Sunt istadas 3 dies de debatas cun espertos e presentatziones de initziativas noas a pitzus de sa temàtica de s’acullièntzia bista comente oportunidade siat pro cumpartzire risorsas e conoscèntzias siat pro sa crèscida de su turismu sustenìbile. Interessantes meda is presentatziones de su Camminu de Santa Bràbara – su camminu religiosu longu 400 km ispartzidu in 22 tapas, chi at a tocare sitos de interessu istòricu, naturalìsticu e archeològicu in sa zona de su Guspinesu e de su Sulcis-Iglesiente – e de sa retza Visit Sulcis, chi regollet prus de 120 siendas privadas a 15 amministratziones pùbblicas sulcitanas. A s’acabu de sa manifestazione unu grupu de amministradores sulcitanos, a manera informale, at incumentzadu a resonare de is atziones chi is amministratziones podent portare a innantis pro agiudare s’isvilupu turìsticu de sa zona.
Lunis 14: Su sìndigu de Sa Baronia, Antonello Pirosu at ritiradu is dimissiones de presidente de cunferèntzia de is sìndigos de sa ASL 7. Pirosu si fiat dimìtidiu su 27 de cabudanni, in pari a su vicepresidente Marco Piras (sìndigu de Tratalias), in polèmica forte cun su commissàriu istraordinàriu de sa ASL Antonio Onnis. Pirosu at dimandadu a is collegas de non pigare decisiones a solos, ma de resonare totus in pari, duncas in sa sede de sa cunferèntzia de is sìndigos, dònnia initziativa pro ampare su sistema socio-sanitàriu sulcitanu. A pustis is sìndigos ant atobiadu a su commissàriu Onnis e ant torradu a denuntziare totus is problemàticas de sa sanidade sulcitana. Onnis at rispùndiu ispieghende ca calincunu passu a innantis s’est fatu ma d’est tocadu puru a nàrrere chi meda dotores ispecialistas non bollent prus traballare in is istruturas de sa ASL 7. Custu fatu si podet interpretare comente un’àteru sinniale malu de sa situazione sulcitana.
Martis 15: A mengianeddu is dipendentes su supermercadu Conad de Carbònia ant iscobertu una fura atrivida. A cantu paret assumancus duas personas si sunt apicuedadas in sa cobertura de su supermercadu e nc’ant abertu un’ istampu e a pustis, cun d-una un’iscala, nche sunt calados a intrus e sena de tocare iscafales o àtera mobìlia collegada a s’allarme sunt andados deretos a unu armadiu blindadu. Nd’ant iscanciofadu is antas e nd’ant aciapadu unus 20mila èuros e si-nde sunt fuidos. Custa fura assimbilat meda a cussa chi ant fatu su mese passadu in su Conad de Cuartu Sant’Aleni. Is Carabineris de Carbònia sun indaghende.
Mèrcuris 16: In s’àula de su Consìliu Comunale de Santu Giuanni s’est fata una riunione pro protestare contras a s’aumentu de is tassas fatu dae su commissàriu istraordinàriu de sa provìncia de su Sud Sardigna. A s’atòbiu, organizadu dae Sindacadu Natzionale de is Agentes de assiguratzione, sunt andados sìndigos, rapresentantes sìndacales e de is imprendidores e meda gente comuna. Totus de acòrdiu contras a s’aumentu de is tassas provinciales – TOSAP, s’imposta de trascrizione de sa propriedade de is veìculos e sa RCauto – chi andat a infèrrere in d-unu territòriu chi giai sunfrit meda pro sa crisi econòmica. Duncas is chi fiant presentes ant firmadu una motzione cun sa cale dimandant a su commissàriu de nde arritirare is aumentos e de ddos cambiare cun provedimentos chi siant prus rispetosos de is citadinos e chi arridusant is tassas etotu.
A primu note in Sant’Antiogu gente loca at fatu una brulla scimpra. Defatis faci a is 8 un’ambulàntzia a sirena alluta est lòmpida in su cursu Vittorio Emanuele. Duos volontàrios nde sunt calaus dae su mezu e de presse sunt intrados in d-unu bar ma ant bistu chi no nci fiat nemus chi teniat abisùngiu de agiudu. Est craru chi custas sunt cosas chi non depent acuntèssere e est giustu a denuntziare custa gente chi faghet custas tontesas mannas pro si ispassiare.
Giòbia 17: est ufìtziale chi s’ALCOA e Invitalia (s’agèntzia pro s’isvilupu de is investimentos e de is impresas) ant firmadu un’acòrdiu preliminare chi impegnat is partes a nde agatare unu definitivu in 2 meses. Custu acòrdiu prevedit chi ALCOA arritirit sa decisione de nde sciusciare s’istabilimentu pro un’annu e chi abarrit responsàbile pro sa bonìfica; Invitalia at a circare investidores chi torrint a pònnere in funtzione is impiantos. Si Invitalia agatat investidores Alcoa dd’at a donare a indonu is impiantos cun sa dotatzione de capitale chi serbit pro ddos torrare a fàere partire. Si in casu, a intrus de un annu, Invitalia no agatit comporadores, in pari a s’ALCOA at a sciusciare is impiantos, serrende pro sempre s’istòria de s’impiantu produtivu.
In s’aeroportu is sindacalistas e is traballadores de s’Eurollumina ant atobiadu a su Capu de su Guvernu e a su Presidente de sa Regione. Ant dimandadu a Renzi un’ agiudu istituzionale forte, chi si agiungiat a cussu giai donadu dae sa RAS, pro chi sa vertèntzia chi durat dae annos s’isblochit una borta pro sempre. Su 29 de custu mese iat a dèpere lòmpere s’autorizatzione de su SAVI de sa RAS
Cenàbara 18: S’est scìpidu chi La Casa dell’Anziano de Carbònia, abundi sunt ospitadas 20 personas e nde traballant un’àteru tanti, at a serrare. Non sunt abastadas is 90 dies de tempus chi su Prefetu de Casteddu at donadu a is meres (s’AREA) e su locatàriu (sa cooperativa CAM) pro pònnere a norma s’istrutura. Duncas a Paola Massidda, sìndigu de Carbònia, dd’est beniu a marolla a ordinare s’ isgòmberu. Sa dita Codess chi est gestende sa RSA Sant’Elia de Nuxis at fatu sa proposta de regòllere totus is ospites e de si pigare in càrrigu 8 traballadores in 2 turnos, donende aici su tempus a sa CAM de agatare una solutzione. Perou siat sa CAM siat s’assòtziu de is familiares de is antzianos ant arrefuradu sa proposta e cantu paret iant a bòllere a sighire a abarrare in s’istrura gestende-dda a solos.
Sàbudu 19: Ferdinando Imposimato, su magistradu chi at indagadu in is casos prus cuntroversos e difìciles chi ant marcadu s’istòria italiana in is annos 70 e 80 e ex deputadu de su Partidu Comunista cumbiradu dae su M5S est andadu a su Teatro Centrale de Carbònia pro chistionare contras a sa reforma de sa Costitutzione chi s’at a votare su 4 de su mese chi intrat.
a Cura di Roberto Pinna
