Sa cida Sulcitana Dae su 4 a s’11 de mesi de idas

Sa cida Sulcitana Dae su 4 a s’11 de mesi de idas

Domingu 4: s’est votadu pro su referendum costitutzionale. In Sardigna, mancai apat votadu su 62,45%, datu de ses puntos prus bàsciu cunfronta a su natzionale chi fiat de su 68,48%, si podet nàrrere chi siat andada gente meda a is sègios. Su resurtadu sardu cunfronta a su natzionale est diferente meda: su eja at pèrdidu de mala manera cun su su 27% mentras a livellu natzionale at pigadu pagu prus de su 40%. In su Sulcis-Iglesiente is cosas sunt andadas giai in sa pròpiu manera: su logu aundi s’est votadu de prus est Carbònia (su 63%) chi est puru su logu abundi su eja est andadu prus pagu mali (26%). Su comunu in ue sa gente at votadu prus pagu est Piscinas (53%) e sempre Piscinas est su comunu abui su eja est andau prus male:(17%).

Lunis 5: is “Fillus de sa crisi” unu grupu de giovànos chi non tenent traballu e non tenent mancu s’’oportunidade de istudiare, sunt partidos dae s’istatzione de Carbònia e sunt andados a Casteddu a che su prefetu Giuliana Perrotta. In su tretu chi andat dae s’istatzione de is trenos finas a sa prefetura ant fatu, in manera ordinada e sena de istrobare a nemus, unu pagu de burdellu. Cun issos nci fiat puru calincunu sìndigu de su Sulcis cun sa fàscia pro manifestare su sustegnu de is istitutziones locales a sa protesta. Is piciocos ant dimandadu a su Prefetu chi intervengat cun sa Regione e cun su Guvernu natzionale pro chi custos si setzant a arresonare in pari cun issos pro agatare solutziones chi firmint sa disocupatzione e sa poberesa.

Martis 6: sa RSU de is traballadores de s’Eurallumina at fatu sa de 21 initziativas in Casteddu dae su mese de cabudanni passadu. A mengianu ant fatu presìdiu de fronte a s’Assessoradu a s’Ambiente in arburada Trieste, a meigama sunt andados a su palàssiu de su Consìliu Regionale aundi ddos ant arrìcidos su presidente Ganau e totus is cabugrupos. S’obbietivu de sa RSU est cussu de pònnere pressione a sa “polìtica” regionales pro chi bengat cunvocada a lestru sa cunferèntzia de servìtzios chi iat a dèpere donare s’autorizatzione definitiva a is investimentos de sa multinatzionale russa RUSAL.

Mèrcuris 7: in Sant’Antiogu su grupu “Genti Noa” chi est lòmpidu a su de tres postos in eletziones de su 2012, at a cùrrere a solu a is eletziones comunales previstas beranu chi benit. In pagos faeddos su portavoce Carlo Lai at ispiegadu chi issos fiant prontos a dialogare cun totus is fortzas santantioghesas pro cumpartzire unu progetu de anoamentu, ma certus rapresentantes de àteros grupos polìticos – SEL pro esèmpiu, chi ddos aiat atacados pagas dies innantis – si boliant candidare a marolla cun issos sena de pentzare a collaborare pro iscriere su programma. Duncas su grupu de “Genti Noa” at detzìdidu de cùrrere a solu e dimandat chi custu scioberu siat arrispetadu dae totus.

Giòbia 8: fiat una die nodia e in meda logos de su Sulcis si nd’est aprofitadu pro abèrrere is mercados de Paschixedda (comente in Igrèsias) o su “Villaggio di Babbo Natale” ( in Carbònia) e finas e pro fàere manifestatziones enogastronòmicas e ispetaculeddos pro is pipios (comente in Masainas). In Nuxis, dònnia annu in custa data, su grupu folk Sant’Elia de Nuxis cuncordat un’eventu dedicadu a is traditziones. Su de ocannu fiat dedicadu a is saboris de una borta: in su centru sociale is Messaius Suerginus cun su grupu S.Andrea de Gonnesa ant aprontadu frègula e malloreddos, invècias is meris de domu ant cotu pane e durches traditzionales sardos in su forru a linna.

Cenàbara 9: In Giba un’òmine de 75 annos est mortu traballende in su sartu. S’òmine fiat boghende-nde sa bìngia sua e fiat andende a fatu de su tratore guidadu dae un’amigu de issu etotu. Est imbruconadu e pro male sorte nc’est arrutu a suta de s’arau chi dd’at istrecadu. Is sucursos sunt lòmpidos a lestru ma pro s’antzianu, a dolu mannu, no at fatu a fàere nudda. Invècias in Sant’Antiogu sa ghenga de is slot-machine sighit a furare. Cust’orta sunt andados a bisitare su “Delfino Blu”, unu barri in bia Nazionale. Is ladrones sunt passados in d-una fentana posta a parte de palas de su locale, ant abertu duas machinetas pro “giogare” (fortzis est mellus a nàrrere pro nche iscavuare su dinari) e cussa pro cambiare su dinari e si-nde sunt andados cun 500 èuros.

Sàbudu 10: s’est scìpidu chi su GIP de su Tribunale de Casteddu at arricidu sa rechesta de su PM Marco Cocco chi domandaiat s’archiviatzione pro su deputadu de Igrèsias Francesco Sanna e àteros 3 ex consilieris regionales de su grupu de “La Margherita”. Is ex consilieris regionales fiant imputados de aere oberadu si dinari de su grupu pro iscopos personales, ma ant demostradu chi su dinari fiat ispèndidu pro finalidades istitutzionales.

S’assemblea de su partidu SEL de su Sulcis-Iglesiente at detzididu de non “sciòllere” su partidu sena de unu percursu congressuale,ma invècias at a sighire a traballare in su Sulcis e in Sardigna comente Comitadu de sa Manca.