Domingu 25: est andadu bene meda su Girotonno in Carloforte, prus pagu bene in Carbònia “Il Sulcis Iglesiente Espone”, chi mancai nche fessint a ddu presentare personàgios importantes comente Eva Grimaldi at sunfridu pro sa basca manna. Su presidente de su cunsòrtziu fierìsticu Mauro De Sanctis at nadu chi, de acòrdiu su Comunu, ant a torrare a cuncordare sa fiera in beranu, proite chi in s’istade sa gente a de die andat a mare e bessit a passillare in su tzentru sceti a su note.
Canale 5 at trasmìtidu su cortometràgiu “Mio nonno, uno degli ultimi maestri d’ascia”chi ant scenegiadu e concordadu is istudentes de sa 2A de s’iscola media Mannai de Sant’Antiogu ghiados dae sa professora Barbara Sitzia.
Lunis 26: Daniela Marras est sa presidente noa de su consìliu comunale de Carbònia. At pigadu 15 votos (totus de su M5S), s’opositzione invècias at votadu pro su vicepresidente de magiorantza Elio Loi. Su sìndigu Paola Massidda at comunicadu puru su nùmene de duos assessores nous: s’ingegneri carboniesu Valerio Piria at a sighire s’isport e sa pùbblica istrutzione; s’ingengeri casteddàiu Luca Caschili ddi tocat s’urbanìstica. Abarrat a su sìndigu sa dèlega a sa cultura e su turismu.
In Igrèsias in sa zona de Monteponi, fortzis dae una cabina elètrica, est partidu unu fogu mannu meda. Est bènnidu a marolla a nche fàere evacuare sa gente dae is domos. Nche fiant unu Canadair e 4 elicòteros ghetende àcua dae s’àiri e medas iscuadras de volontàrios a terra fiant istudende finas a su note. Fogos puru in sa zona de Pionca (Narcau) e in su territòriu de Teulada.
Martis 27: in Sant’Antiogu est nàschidu su comitadu “Porto Solky” cun s’iscopu de nàrrere ca no a su ponte nou e a sa circonvallatzione pro andare a Caleseda. A parridade su Comitadu su progetu tenet impatu ambientale mannu e acuat su ponte romanu e iat a tramudare s’essida dae Sa Idda in sa zona industriale. Duncas is 70 miliones de èuros previstos in su Piano Sulcis si depent oberare in maniera prus ratzionale, pro esèmpiu ponende in siguresa is tretos prus perigulosos de sa SS 126.
Mèrcuris 28: Romeo Sacchetti s’ex allenadore de sa Dinamo de Tàtari chi at bintu su campionadu de basket in su 2015 est andadu in Santu Giuanni Suèrgiu a presentare sa biografia sua (iscrita cun Nando Mura) “Il mio basket è di chi lo gioca”. Sacchetti, ghiadu dae is pregontas chi dd’ant fatu su vicesìndigu Marco Zusa e su sìndigu Elvira Usai, ant contadu meda de s’isperièntzia sua de giogadore (at bintu is europeos in su 1983 e sa medàllia de prata a is olimpiades de Mosca in su 1980 e at giogadu puru una partida contras a Michael Jordan), de allenadore e at contadu puru cosa meda de sa famìlia e de sa vida privada sua. In prus su pùbblicu presente (nche fiant meda giogadores, allenadores e apassionados) ant tentu s’oportunidade de cumprèndere su caràtere de s’òmine e de arresonare cun issu puru de sa natzionale e de s’evolutzione de su giogu.
Giòbia 29: Sunt insediende-sì is consìlios comunales nous in comunos sulcitanos aundi 2 cidas agoa s’est avotadu e sighint is polèmicas polìticas locales. In Nuxis, a pustis de un interventu polèmicu meda in d-unu blog, non s’est presentadu s’abogadu Pubusa chi fiat siguru de bìnchere ma e est arribadu segundu; in Portescusi totus is consilieris de opositzione non si sunt presentados a sa setziada de insediamentu e finas a imoe nemus at scìpidu su motivu de cusu scioberu forte; In Carloforte pistighìngiu in Facebook intrus de s’ex sìndigu Simeone e su sìndigu nou Puggioni pro su passàgiu de cassa.
Cenàbara 30: est acabadu unu mese de làmpadas positivu meda pro su turismu. In totus is sitos turìsticos ant arrigestradu un aumentu de su nùmeru de bisitadores: pro esèmpiu in su tèmpiu de Antas, in comunu de Flùmini Majori, ant fatu s’11% in prus cunfronta s’annu passadu, in is Grutas de su de Is Tzuddas in Santadi su 14%. In Is Tzuddas at fatu ispantu s’arribu a elicòteru de unu grupu de dirigentes de una de is siendas prus mannas de Rùssia chi a pustis de sa basca manna de custa cida sunt andados a si pigare unu pagu de friscura in gruta. De siguru custu aumentu de bisitadores – sa parte prus manna sunt istràngios – si depit siat a s’istrategia de comunicatzione noa incarrerada dae is operadores e dae is amministratziones comunales siat a sa “congiuntura internatzionale” sende chi s’Oriente de Mesu e su Nord Àfrica non sunt logos siguros e duncas is europeos scioberant logos prus “truncuillos” comente sa terra nostra.
Sàbudu 1: is tècnicos de Abbanoa in pari a cussos de s’Igea ant arrangiadu su guastu fatu dae su fogu de lunis a is putzos de Campu Pisanu. Duncas in Igrèsias, a pustis de 5 dies, est torrada s’àcua in totu sa tzitade. Est giustu a regordare chi s’Amministratzione Comunale de Bidda Massàrgia de voluntade sua fiat s’àcua a su note pro agiudare is “bighinos” a fàere iscorta.
