Sa cida sulcitana in curtzu: Dae su 2 a s’8 de mese de ladàmine
Lunis 2: sighint a arribare algerinos a unda in sa costa sulcitana: 9 sunt isbarcados in Cala Sapone (S.Antiogu), 14 ddos arregortos sa Guardia Costera in mesu de mare a pagu tretu de Cabu Teulada, 26 nde-ddos pinnigados is Carabineris in Porto Pino (S.A. Arresi) e àteros 5 in Portu Tramatzu (Teulada). Nche-ddos lòmpidos totus a su centru de collidura Assèmini.
Martis 3: Ant fatu ispantu is 50 manifestos de iscusas aperèssidos in is muros de Bidda Massàrgia. De custu fatu nde chistionant puru is crònacas natzionales. In is manifestos un’innamoradu (o innamorada?) dimandat perdonu e si bidet sa fotografia de una faru cun 2 coros. Totus si dimandant chini potzat èssere custa persona chi in is tempos de internet at scioberadu custa manera unu pagu “antiga”. Su sìndigu, Debora Porrà, interpellada dae s’ANSA, at nadu ca est una chistione privada e chi chini ddos at fatos apicare at pagadu su chi depiat e duncas est totu in règula.
Mèrcuris 4: Polèmica manna in Igrèsias pro su flash-mob (est unu grupu de personas chi totu a una borta si atobiat in pratza e isparessit a lestru de chi at manifestadu pro calincuna cosa) fatu dae is pipios de sa V A de s’istitudu “Pietro Allori” in favore su “Ius Soli”. Esponentes de is partidos de dereta ant annuntziadu interrogatziones in Consìliu Regionale e in Parlamentu. Is babbos e is mamas de is piciocheddos chi ant fatu su flashmob cun d-una lìtera pùbblica difendint su traballu fatu dae is mastras e dimandant de firmare dònnia polèmica massimanete candu non si connoschet su programma e su percursu didàticu chi ant fatu is piciocheddos in contu de sa temàtica prus manna de sa citadinàntzia.
Giòbia 5: Filippo Lorrai, santantioghesu de 33 annos, est at bintu su prèmiu literàriu de sa RAI “La Giara”, unu cuncursu natzionale pro romanzos inèditos iscritos dae autores giòvanos. Lorrai, in “Il grande Erik” chi a lestru at a èssere pùbblicadu dae RAI ERI, at contadu sa vida de tres generatziones de una famìlia de artistas de circu chi at a èssere binta dae sa violèntzia de su mundu esternu. Puru su grupu rock Golaseca at otentu unu prèmiu importante: ant bintu sa de 29 editziones de rassegna “Rock targato Italia”, chi est unu de is festival de prus importantes in Itàlia (in is annos passados ant partetzipadu artistas che Ligabue,Litfiba e Dolcenera). Est giai de unas cantu annos chi sa grupu carboniesu est produsende cantzones bellas e ormai sunt connotos puru in “Continente”.
Custos prèmios natzionales sunt sinniales bellos e bonos meda chi testimongiant su talentu e sa bona voluntade de totus is sulcitanos giòvanos de nde essire dae custa crisi chi paret non bollat acabare prus.
Cenàbara 6: is sìndigos de s’Unione de is Comunos de su Sulcis, a pustis de s’essida in bicicleta fata su 16 de cabudanni, ant iscritu a su prefetu de Casteddu dimandende de pigare provedimentos de apretu pro is istradones SP 77, 78 e 80 e sa SS 293. Is sìndigos si chesciant pro s’ausèntzia de sa Provìncia de su Sud Sardigna in s’atòbiu fatu in s’Assessoradu a is Traballos Pùbblicos e puru de s’ ANAS chi no at arrispùndidu a is rechestas de interventu. Cussas istradas sunt perigulosas meda (sunt sena de sinniales orizontales e verticales e cun su fundu aciuvadu) e finas in custas dies nche sunt istados incidentes chi, pro bona sorte, no ant tentu conseguèntzias pro is personas. Duncas dimandant a su Prefetu de Casteddu de cunvocare un’atòbiu cun su coordinadore de su Piano Sulcis, s’ANAS e sa Provìncia de su Sud Sardigna pro otènnere solutziones. Is sìndigos ant annuntziadu chi si s’atòbiu non s’at a fàghere ddis at a tocare a serrare is istradones pro chistione de siguresa blochende in custa manera totu su tràficu de is veiculos.
Sàbudu 7: In Carbònia est acabada sa de ses editziones de su festival “Tutte Storie” organizadu dae su SBIS (su Sistema bibliotecàriu Interurbanu de su Sulcis) cun sa cooperativa Scila e sa collaboratzione de totus is iscolas sulcitanas. Fiant prus de 2000 is istudentes chi acumpangiados dae is mastros e professores insoru, sunt andados a in biblioteca tzentrale de Carbònia aundi ant tentu s’oportunidade de atobiare autores e de fàghere laboratòrios de iscritura meda interessantes.
Domingu 8: a pustis de 6 annos cambiat su cumandante de sa cumpangia de is Carabineris de Carbònia: su magiore Pino Licari lassat s’incàrrigu a su capitanu Lucia Dilio, 30 annos e laureada in giurisprudenza, chi at giai cumandadu su nùcleu operativu de sa cumpangia de Perùgia.
Sunt incumentzados is campionados de fubalu de segundu categoria. In su girone B sunt 10 is iscuadras sulcitanas (is àteras 6 sunt de sa zona de Campidanu) chi an a circare de bìnchere su torneu pro artziare deretas in prima categoria. Invècias In su girone A de sa sèrie D de su campionadu regionale de Basket sa Sulcispes at initziadu bene meda binchende 100 a 45 contras a su Serramanna.
A cura di Roberto Pinna
