Sa cida in curtzu. Dae su 12 a su 18 de friàrgiu.
LUNIS 12: Cun su decretu n. 5450 de su Ministeru de is polìticas
agrìcolas "Sa Mata de sa Gruxi" est intrada in s'elencu de is matas
monumentales natzionales. Est unu ollastru chi est in sa pratza chi
àrtziat a s'istradone. Su nùmene de custu ollastru, chi tirat giai 10
metros e serbint 3 personas pro ddu ingiriare, fortzis benit dae una
rughe de ferru chi fiat posta acanta de sa mata. Àteros, is masainesos,
prus bècios, ddi narant sa Mata de sa Bregùngia proite chi is prus
mandrones andaiant e si setziant arròliu e nche passaiant s'ora de
aici. A comente si 'ollat chi siat is masainesos si podent abantare de
tènnere unu monumentu naturale pròpiu in mesu de bidda. Est soddisfada
meda su vicesìndigu Ilaria Portas chi at nadu ca aici at a èsser prus
fàtzile a amparare sa mata e at arregordadu su traballu mannu chi at
fatu s'ex assessore Andrea Ibba chi at incarreradu totu sa protzedura
burocràtica chi est acabada a pustis de 3 annos, sinnilaende pro primu
s'àrbure a sa Forestale.
MARTIS 13: unas cantu novas bonas pro is Comunos de su Sulcis. Su Comunu
de Perdaxius, chi teniat su bilànciu de previsione 2018 giai aprovadu
at otentu dae su ministeru su permissu de isblocare 500mila èuros chi
fiant firmos pro esigèntzias de istabilidade e ant a èssere postos pro
acabare òperas pùbblicas. Invècis in Bidda Massàrgia ant
incumentzadu is traballos pro asfartare is arrugas printzipales de su
tzentru de sa bidda. Prexu mannu de is amministradores e de is
residentes chi fiant parìcios annos abetende s'asfartu nou.
MÈRCURIS 14:: A cantu parit, in custos mesas passados, a is
amministradores comunales de Santu Giuanni Suèrgiu sunt arribadas
chèscias medas pro su chi pertocat su servìtziu mensa de is iscolas.
Marco Zusa, chi s'assessere a s'istrutzione pùbblica ispiegat ca ant
fatu controllos pro dònnia chèscia is controllos e ant donadu totus
èsitu negativu. Sigumente custa situatzione sighit a andare a innantis
s'est detzìdidu de fàghere su "Comitadu Mensa" e nd'ant a fàgher
parte maistas e professores, babbos e mammas e unu rapresentante de
s'Amministratzione Comunale. Su Comitadu Mensa at a averguare chi su
servìtziu bengat fatu sigundu cantu prevedit su capitoladu de apaltu e
podet puru intrende a controllare a comente si traballat in is coghinas.
GIÒBIA 15: In su ministeru de s'econòmia in Roma ant firmadu
s'acòrdiu pro bèndere s'ex istabilmentu Alcoa a sa Sider Alloys.
S'acòrdiu prevedit un investimentu de unos 135 miliones de èuros. De
custos 8 miliones ddos ponit a "fondo perduto" sa RAS, 84 miliones sunt
unu prèstidu a tassu agevoladu (de torrare in 8 annos), 20 miliones
ddos ponet s'Alcoa pro torrare a fagher partire is impiantos, su chi
abarrat (una bintina de miliones de èuros) ddu ponet sa multinatzionale
isvìtzera. A custu acòrdiu tocat a aciunghere cussu chi ant firmadu
cun s'ENEL, chi at adurare 10 annos, pro donare s'energia elètrica a
prètzios prus bàscios cunfronta is chi si pagaiànt in antis de sa
serrada de sa fàbbrica de Portovesme.
CENÀBARA 16: Sunt incumentzende a essire a pillu is primas
informatzione in contu de su pianu industriale presentadu dae sa Sider
Alloys, pro torrare a fàghere partire is forros chi sunt firmos dae su
2013. A su chi si narat aintrus de su mese de làmpadas chi benit iant a
dèper intrare sa metade de is traballadores previstos: si chistionat de
unus 370 traballadores diretos e una setantina a cuntratu esternu. Is
dirigentes de sa Sider Alloys acrarant ca nc'ant a bòllere assumancus
18 meses pro chi sa fàbbrica torrit a prodùsere (a dies ant andare is
tènnicos pro istabilire totus is interventos chi serbint) a pro s'acabu
de su 2020 sa fàbrica iat a dèper intrare in prena produtividade.
SÀBUDU 17: su camper de CamineRAS (chi est s ufìtziu de is relatziones
cun su pùbblicu mòbile de sa RAS) s'est firmadu duas dies in Pratza
Itàlia in Sant'Antiogu. Su personale at ispiegadu a is residentes sa
manera de ativare sa tèssera sanitària pro chi funtzionit puru comente
Carta Natzionale de is Servìtzios e firma digitale (TS-CNS) e ant
intregadu puru s'aperèchiu chi serbit pro fàghere custas operatziones.
Pro is prus giòvanos ddoi fiat puru una postatzione dedicada a su
servìtziu de orientamentu a is oportunidades de mobilidade
transnatzionale chi donat s'Unione Europea gràtzias a su programma
Erasmus+ e is initziativas Your First Eures job 5.0.
DOMINGU 18: fiat sa domingu de segare is pingiadas e duncas acabat puru
carnevali. S'àcua de sàbudu a merie at unu pagu guastadu is isfiladas
previstas in Masainas e in Santu Giuanni suèrgiu, invecis sunt andadas
bene meda is isfiladas chi ant fatu domingu in Teulada, Bidda Massàrgia
e Sant'Antiogu.
At tentu unu bonu risurtadu de pùbblicu su documentàriu trasmìtidu in
RAI 3 a is 6:30 de merie dae su programma "Kilimangiaro" chi trataiàt
de is bellesas archeològicas e naturales de s'ìsula de Sant'Antiogu.
Roberto Pinna
