Sa cida sulcitana in curtzu. Dae su 12 a su 18 de martzu
Lunis 12: su mese de làmpadas chi benit si votat pro is eletziones amministrativas in 3 comunos sulcitanos e si incumentzat a cumprèndere chini sunt is candidados. A cantu paret in Igrèsias is candidados a sìndigu ant a èssere 4: Valentina Pistis consiliera comunale de s’opositzione chi at anuntziadu sa candidadura sua giai dae unas cantu meses; est fàtzile meda chi circhit sa cunfirma Emilio Gariazzo (centru-manca); de siguru at a fàghere sa lista sua su M5S ma pro imoi no at nadu incora chini est su candidadu a sìndigu; su centru-dereta est incora circhende unu nùmene forte e sighint is atòbios de is partidos de sa coalitzione. In Teulada circat sa cunfirma Daniele Serra e, a cantu si narat, dd’isfidat Paolo Luigi Dessì, consilieri regionale e ex sìndigu de S.A. Arresi. In Frùmini Majori si dda tentat s’ex inviadu de Mediaset Marco Corrias chi at anuntziadu puru totus is chi s’ant a candidare a consilieri in sa lista sua.
Martis 13: in Igrèsias unu dipendente comunale at decraradu ca candu fiat pro serrare is ufìtzios sunt intradas 5 personas cun tanti de matzocas pro giogare a baseball chi boliant scire informatziones a pitzus de su REIS e at nadu puru chi una de custas dd’at ameletzadu. Su contu de su dipendente at fatu ispantu e at fatu pigare cimbella a s’Amministratzione Comunale e duncas su sìndigu at anuntziadu chi a lestru ant a cuncordare un’impiantu de telecameras. Fatu istat ca su contu de su dipendente no at cunvintu sa Politzia chi fiat indaghende e dd’at denuntziadu pro “procurato allarme” e simulatzione de reatu.
Mèrcuris 14: in s’àula de su Consìliu Comunale de Sant’Antiogu ant fatu sa cerimònia ufitziale de su gemellàgiu de is istudentes de s’istitutu cumprensivu de Sant’Antiogu e Caleseda cun sa delegatzione de 25 piciocos chi sunt bènnidos dae su Collège International Marseilleveyre de Marsìglia. Custos piciocos ant a èsser ospites de is famìlias de Sant’Antiogu. Est prexada meda s’assessora Rosalba Cossu chi at ispiegadu chi su gemellàgiu pro is piciocheddos est un’oportunidade manna de crèschere e de si cunfrontare in manera dereta cun realtades diferentes. Custa initziativa dd’at incarrerada sa professora Barbara Sitzia chi a pustis de annos meda passados in s’iscola mèdia “Mannai” de Sant’Antiogu est andada a traballare pròpiu in s’iscola marsigliesa.
Giòbia 15: sighit a si mòvere calincuna cosa pro su chi pertocat sa chistione generale de su traballu in su Sulcis. Infatis a bellu a bellu is ex operàios de s’ATI IFRAS chi fiant in cassaintegratzione dae su primu de gennàrgiu de s’annu passadu sunt torrende a traballare. Unu grupu de 16, giai de cida passada est intradu in sa Fundatzione de su Camminu de Santa Bràbara e a lestru àteros 8 ant a intrare in s’assòtziu de is minieras de Rosas (in comunu de Narcau) e ant a fàghere interventos de manutentzione e de cura de su birde pùbblicu.
Cenàbara 16: sa cipudda de Santu Giuanni Suèrgiu at otentu su riconoscimentu de PAT (prodotu agrìculu traditzionale) dae su Ministeru de is Polìticas Agrìcolas. Est soddisfada meda s’amministratzione comunale chi gràtzias a s’agiudu de s’antropòloga incarrigada dae sa RAS A. Guingoni, chi at sighidu totu sa parte burocràtica, est arrenèschida a otènnere custu reconoschimentu de importu mannu. Duncas pròpiu a sa cibudda s’ant a dedicare 5 dies de festa a s’acabu de su mese de làmpadas chi torrat paris a su tempus de sa arrigota de su prodotu chi finas a is annos 60 fiat una de is produtziones prus importantes de Santuanni (faghiant fintzas sa sagra) e imoi gràtzias a unu grupu de agricoltores giòvanos est torrende a pigare cuota.
sàbudu 17: fiat sa die natzionale contras a totus is màfias e in favore de sa Legalidade. In Nuxis s’assòtziu “Le Sorgenti” at cuncordadu una bella manifestatzione pro arregordare su carabineri Antonio Pubusa chi fiat nàschidu in su boddeu sulcitanu e dd’iant mortu in pari a àteros 6 collegas acanta de Palermu in su 1949 candu s’Istadu fiat cumbatende sa batalla contras a sa chi si naraiat “la banda Giuliano”. De chi ant iscarraxadu una bella targa in sa domu aundi fiat nàschidu Pubusa, Mauro Mura chi fiat procuradore de sa Repùbblica e coordinadore de s’Antimafia in Sardigna cun is raprsentantes de s’Arma de is Carabineris ant atobiadu in su centru sociale is piciocheddus de is iscolas mèdias de Nuxis e de Santadi.
Domingu 18: faci a is 2 de a de noti una trevessura de làndiri e tronos nd’at iscidadu is santadesus e is baroniesus de Villaperùciu. Sa trevessura at fatu puru iscòngiu sende chi nd’at sciusciadu sa tèula de unas cantu domos bècias e at agiumbuadu puru calincuna màchina. Sa novidade bona est chi a pustis de unu mese chi est proende sa terra est cuntenta e is arrios sunt incumentzende a calare sulenos e su livellu de is digas, a pustis de 2 annos, est torrende a crèschere. S’ispera est chi sigat a pròere e calit assumancus su tanti de àcua chi serbit pro nche passare s’istade e s’atòngiu chi benint.
A cura di Roberto Pinna
