Sa cida sulcitana in curtzu. Dae su 16 a su 22 de mese de argiolas
Lunis 16: is volontàrios de su VEA de Nuxis, de sa Protetzione Civile de Terreseu e is Guàrdias Forestales sunt intervènnidos duas bortas pro nde istudare is fogos chi gente disgratziada at postu prima in d-unu campu acanta de Perdaxius e a pustis in Narcau aundi est tocadu a tzerriare puru s’elicòteru proite chi is pampas fiat ponnende in perìgulu is domos de su medau de Is Meddas.
Martis 17: in s’assessoradu a is Entes Locales de Casteddu is sìndigos de Nuxis, Narcau, Silìcua, Santadi e Villaperùciu, cun su commissàriu istraordinàriu de sa provìncia de su Sud Sardigna cun s’assessore regionale Cristiano Erriu ant firmadu su protocollu pro fàghere una pista ciclàbile su in s’ex ferrovia de su Sulcis de Bàsciu. Su finantziamentu chi at postu sa RAS est de 800mila èuros. Parit chi su dinari siat meda ma custa genia de istradas no est barata pro nudda (si chisitionat de 100mila èuros a km cun s'arribàsciu de s'asta) e duncas nc’est su perìgulu chi incumentzint ma nde fatzant unu tretu piticu lassende totu s’òpera sena de acabare. S’ispera est chi si agatit una solutzione prus barata chi permitat de incarrerare custa genia de turismu sustenìbile puru in su Sulcis de Bàsciu chi in dònnia logu est ispanende-sì semper de prus.
Mèrcuris 18: in Sant’Antiogu un’òmine at circadu de bochire sa mulleri a corpos de arruncillu. Sa còpia teniant s’apuntamentu in s’ufìtziu de s’abogadu proite ca fiant de acòrdiu pro si seberare. Si bidet chi calincuna cosa no at funtzionadu prus in sa conca de s’òmine chi, de chi nc’est bessidu dae domu e at comperadu un’arruncillu, at cracadu sa mulleri chi s’est fuida a tzèrrios in pratza de Itàlia (pròpiu asuta de s’istùdiu de s’abogadu) e inias dd’at sorigada e dd’at donada puru unu corpu a conca. Duos giòvanos coragiosos sunt intervènnidos e sunt arrinnescidos a firmare s’òmine chi dd’ant arrestadu is carabineris. A sa fèmmina dd’ant arricoverada in su repartu de neurochirurgia de s’uspidale Brotzu in cunditziones graves meda.
Giòbia 19: su catologu de VisitSulcis, sa retza de impresas impresas privadas chi provat a promòvere su territòriu nostru, est in distributzione in is infopoint e in is sitos de interessu prus importantes de su Sulcis. Est ancora prestu pro fàghere contos ma pro imoi e tanti paret chi su setore de su turismu siat andende bastante bene, praticamente uguale a s’annu passadu chi a parre de totus is operadores fiat bonu meda cunfronta is annos passados chi fiant de crisi niedda.
Cenàbara 20 in Narcau ant fatu sa de 28 edtziones de su festival blues. At abertu su festival Billy Gibbons – boghe e ghitarreri de is ZZ Top (giai 60 miliones de discos bèndidos in totu su mundu) cun is billetos ispaciados in 4 dies. Puru is àteros ispetàculos mancai is artistas fessint prus pagu famados ant fatu ispetàculos de cualidade arta meda. De siguru custa initziativa at mòvidu unu pagheddu s’economia de sa bidda de su Sulcis de Bàsciu sende chi at coinvòlgidu una trintina de giòvanos de su logu e s’est bista gente meda (nd’at allòmpidu apostadamente fintzas dae continente) passillende in mesu de su centru istòricu abetende de si gosare is’ispetàculos.
Sàbudu 21: est istade prena e est tempus de festas e sagras. In Nuxis est andada bene meda sa de 14 editziones de sa festa de is durches e de is ballos traditzionales ; bene a su pròpiu sa tapa fata in in Masainas de “Il banchetto de desideri” aundi ant ammesturadu a pari su cinema sotziale, sa cosa de papare cun is temàticas de s’integratzione.
Domingu 22: fintzas s’iscritora Michela Murgia at criticadu in Facebook sa campagna de publicidade chi su Comunu de Igrèsias est faghende in s’aeroportu de Casteddu. A parre de Murgia sa Sardigna non si depet presentare in manera negativa faghende cunfrontos impossìbiles con àteras realtades prus mannas e famosas in su mundu, ma invècias tocat a abantare is chi sunt is caraterìsticas printzipales chi istallant su logu nostru dae restu de su mundu. Chini iscriet custa rubrica est de s'idea chi campagna podet praghet o nono ma depeus tènnere in contu ca no dd’ant pentzada pro nosu ca seus sardos (o igresientes o sulcitanos chi siat) ma pro is turistas continentales e istràngios e de siguru si a pustis de duos annos si-nde arrexonat ancora bollet nàrrere chi est ancora funtzionende. Prus si nde-chistionat, massimanete in manera negativa, prus sa boghes si ispainat e chini dda bolet criticare faghet pròpiu s’efetu contràriu.
Roberto Pinna
