In antis de torrare a passu, bosi proneus una sìntesi de is primas 10 dies de su mese de cabudanni.
sàbudu 1: Una nova bona pro is fideles sulcitanos: sa RAS in pari cun sa CEI, cun su progetu “La Sardegna in 100 chiese” at postu 2miliones e 100mila èuros pro arrangiare in totu 12 crèsias, intr’e mannas (sa Seu de Igrèsias o cussa de Santu Giuanni in Masainas) o prus minoreddas (is cresieddas de Santa Marta in comunu de Giba o de Santa Luxia in Villaperùciu). De siguru nc’at a èssere unu recuperu de monumentos antigos chi torrant a is comunidades insoru e in prus s’at a donare una manu de agiudu a mòvere s’econòmia sulcitana chi est ancora firma.
Lunis 3: Novas bonas pro is santantioghesos: incumentzant is traballos pro pònnere s’asfartu nou in d-una bintina de arrugas in su centru de Sa ‘Idda (is chi sunt in sa zona de Viale Trento). Is traballos ant a durare unu mese e tentent in totu su valore de 300mila èuros. E semper in Sant’Antiogu est funtzionende bene su servìtziu pro sinnialare is arrefudos lassados a treullu in su sartu e ororu de is istradas oberende sa app pro is telefoneddos chi si narat “whatsapp”. A comente arribat una sinnialatzione a su nùmeru 335.1277861 (chi est nùmeru chi apartenit a su Comunu) – chi podet èssere una fotografia, unu video cun is coordinadas de su puntu – s’ufìtziu ambiente castiat ite si depet fàghere e a pustis nche mandat is operàios a regòllere su caddotzìmine chi sa gente pagu educada e pruscatotu pagu abbista lassat iscavuados aundi non depet. In custa manera non si formant prus muntronàrgios mannos e in prus sighint a èssere ativas puru is fototrràpulas chi fatu-fatu cassant a is chi abandonant s’àliga.
Mèrcuris 5 e Giòbia 6: in sa costa sulcitana est arribada un’undade de gente dae s’Algeria. In is pràgias de Teulada e de Sant’Anna Arresi ant agatadu in totu 42 personas ispartzias in grupos. Comente semper nde-ddas ant arrigotas is Carabineris de sa cumpangia de Carbònia e nche-ddas lòmpidas a su centru de collidura de Muristenis pro is proceduras de identificadura e espulsione.
cenàbara 7: in sa sede de sa Confindustria de Casteddu ant firmadu s’acòrdiu intr’e Sider Alloys e is sìndacados in ue si detzidit, in manera crara, de aundi pigare su personale chi at intrare a traballare in s’istabilimentu de Portovesme. In is primas dies de su mese de argiolas passadu si fiat scìpidu chi aiant pigadu personas chi no aiant traballadu mai in cussu istabilimentu e duncas ex traballadores de s’ALCOA si fiant arrinnegados meda e aiant blocadu is intradas de s’istabilimentu. S’acòrdiu prevedit chi pro dònnia positzione (siant dirigentes, operàios ispecializados o simples) si circhit prima-prima in is ex traballadores ALCOA, pustis in is siendas de apaltu esternas e a ùrtimu in is interinales chi apant traballadu assumancus pro un annu in su periodu 2010-2012. Is chi ant a intrare a traballare ant a tènnere su cuntratu natzionale metalmecànicu chi est uguale a su chi teniant cun s’ALCOA. Nc’est ancora de detzìdere candu at a incumentzare su “re-vamping” est a nàrrere candu torrant a pònnere in mutu sa fàbbrica proite ca is meres isvìtzeros depent scioberare una de is 3 propostas fatas dae siendas esternas, ma a cantu si narat est chistione de pagas cidas.
8 de cabudanni: Sighit sa polèmica in contu de sa sanidade. Su primàriu de emodinàmica de s’uspidale Sirai andat in fèrias (da su 10 su 28 de custu mese) e duncas totu su repartu abarrat serradu, sende chi su dotore est a solu e is infermieris de su repartu sunt a dispositzione de is àteros repartos chi tengant abisòngiu. Benit male a ddu crèdere perou est aici etotu. E a cantu paret in su laboratòriu de su Santa Bràbara sunt acabados is reagentes e duncas non si podiant fàghere mancu is anàlisi urgentes e tocaiat a nche mandare totu a su laboratòriu de su Sirai in Carbònia. Sa polèmica de is polìticos est incumentzade sùbitu, ma is dirigentes de sa ASSL ant ispiegadu ca su chi serbiat pro fàghere is anàlisi at trigadu a arribare pro more de is fèrias de austu e chi s’atividade de su laboratòriu de Igrèsias est torrada a cumentzare in manera regulare dae lunis.
Domingu 9: est incurtzende s’incumentzu de is campionados de fuballu e in su mentris s’est giogadu su primu turnu de sa Copa Itàlia de promotzione regionale. Su Carbònia at bintu 3 a 1 contras a su Biddamassàrgia (chi at bintu su campionadu de prima categoria s’annu passadu), sa Monteponi (arribada segunda s’annu passadu in primu categoria) at bintu 2 a 0 contras a su Carloforte.
Est acabada cun d-unu sucessu mannu de pùbblicu e de crìtica sa de 33 editziones de “Ai Confini tra Sardegna e Jass”, cuncordadu dae s’assòtziu Punta Giara in sa pratza de su nuraghe in Sant’Anna Arresi e chi at fatu puru 2 tapas a s’ora de s’iscurigadroxu in sa pràgia de Su Paris in Masainas e in una sa crèsia de Santa Maria in Pramas.
Roberto Pinna
