Sa cida in curtzu. Dae su 24 a su 30 de cabudanni
Lunis 24: pro totu custa cida su ponte de Sant’Antiogu est abarradu abertu a sensu ùnicu alternadu pro permìtere a is tènnicos de fàghere is traballos de manutentzione e de regòllere datos in contu de sa siguresa de s’istrutura pro ddos cunfrontare cun cussos de s’annu passadu. Acabat aici una cida de polèmicas de is sìndigos e de chèscias de sa gente comuna sende chi finas sa banchina de su portu de Portovesme fiat serrada pro traballos e duncas totus is chi depiant andare o torrare dae Carloforte depiant passare a marolloa in su ponte aumentende su tràficu in mesu de Sa Idda ss tràficu e craramente nche boliat meda prus ora pro lòmpere a su portu de Caleseda.
Martis 25: a cantu parit su palàtziu comunale de Igrèsias est malipigadu meda. Giai in su mese de austu passadu nde fiant arrutos arrogos de intonacu dae unu balcone de s’afaciada e imoi est perigulosa puru s’ala laterale tanti chi s’arruga Mazini chi est serrada giai de 20 dies. Is opositziones in consìliu comunale giustamente pedint chi si fatzat a lestru calincuna cosa (e giai in sa consiliadura passadas aiant presentadu interrogatziones), s’assessore Didaci arrispundit ca pro imoi no nc’at dinari pro dd’arrangiare e chi sunt circhendi-ddu cun is bandos europeos.
Mèrcuris 27: in Carbònia no ddoe at prus logu in is campusantos de Medadeddu e Cortoghiana e duncas benit a marolla a nde bogare is chi sunt giai interrados. Sunt 420 cuncessiones chi sunt iscadende e s’amministratzione ant postu unu avisu pùbblicu in is intradas de is campusantos cumbidende is interessados a andare in comunu pro ddas rinnovare sinoncas nd’at a bogare is baulos sena de àteru avisu. Dae s’opositzione narant chi nc’at tropu presse e chi gente meda non connoscit custu provedimentu e duncas si depet donare prus tempos pro permìtere de rinnovare is cuncessiones.
Giòbia 27: In Igrèsias is iscuadras de Abbanoa ant ativadu is condotas ìdricas noas chi ant postu in arruga Olanda e in arruga Isvìtzera (in totu 350 metros de tubatziones e allàcios nous) e sunt giai incumentzados is traballos pro cambiare àteros 2500 metros de tubatziones. Custu interventu tenent in totu unu valore de 550mila èuros e andat a cumpletare su de s’annu passadu chi baliat 750mila èuros. In logu de is bècios s’ant a pònnere tubos de ghisa sferoidale, prus grussos e prus fortes e baliant mellus is escursiones tèrmicas fortes. Sa citade Igrèsias est in su pianu isperimentale de ingegnerizatzione de is retzas idrìcas: in sustàntzia cun misuradores portàtiles e sensores postos in is tubos s’ant a pòdere agatare pèrdidas e guastos a manera de intervènnere a lestru e s’at a pòdere aumentare e calare sa pressione a segunda de is necessidades de dònnia zona.
Cenàbara 28: In su territòriu de Carbònia is Carabineris de su NAS ant denuntziadu unu allevadore de berbeghes proite chi dd’ant agatadu meghinas antibioticas chi beniant dae Romania chi non teniant sa prescitzione de su veterinàriu e chi non sunt legales in Itàlia e in prus dd’ant ordinadu de bonifacare su logu aundi teniat is animales proite chi fiat tropu brutu. In d-un’àteru medau ant scercuestadu 185 porcos proite chi non fiant arregistrados e in prus ant agatadu duos animales mortos in is aurras. A custu allevadore dd’ant ordinadu de arregistrare totus is animales in 15 dies pro non pigare santziones prus graves.
Sàbudu 29: momentos de tensione in sa manifestatzione contras a fàbbrica de bombas de Domusnoas: infati calincunu at imbrutadu a bomboleddas de spray is màchinas de unas cantu ativistas e unu mezu de sa RAI. Est giai de diora chi gente meda, massimamente dae candu est essidu unu vìdeo de su New York Times s’annu passadu, dimandat sa cunversione de sa fàbbrica pro salvare is postos de traballu e chi cussu chi sunt faghende is meres tedescos est unu ricatu ocupatzionale chi non si podet tollerare.
Domingu 30: Is campionados de fubalu diletantes sunt giai lòmpidos a sa de duas giorronadas. In su girone A de promotzione no ant incumentzadu bene su Biddamassàrgia, sa Monteponi e su Carlofrte chi ant fatu unu puntu sceti in 2 partidas, mellus su Carbònia chi nd’at fatu 4. In su girone B de sa prima categoria bene meda s’Atletico de Villaperùciu chi in 2 partidas at fatu 9 gols e est primu a puntègiu prenu, andant prus a bellu su Cortoghiana (4 puntos) e sa Fermassenti (2 puntos) e s’Isola de Sant’Antioco (1 puntu), ancora firmu su Narcau chi at pèrdidu toteduas is partidas. Cida chi benit incumentzat puru sa segunda categoria cun 10 iscuadras sulcitanas impegnadas in su girone C.i - Instagram sulcisigloggi
Roberto Pinna
