Lunis 7: dae s’ùrtimu de s’annu ant firmadu is atividades de estratzione de su crabone in sa miniera de sa Carbosulcis in Seruci ma is traballadores ant a sighire a calare in is putzos pro assumancus àteros 8 annos proite chi ant a èssere impegnados siat in su ponimentu in siguresa de is impiantos siat in sa riconversione de sa miniera chi gràtzias a su progetu de circa scèntifica ARIA, finantziadu dae sa RAS e a su cale pigant parte puru s’universidade americana de Princeton e s’istitutu natzionale de fìsica nucleare, chi tenit pro iscupu su de produsere gas argon e àteros isòtopos de sustàntzias chi si oberant fitianamente in sa mexina prus moderna.
Martis 8: est torrada in sa disponibilidade de su Demàniu Marìtimu sa pràgia de Portu Tramatzu in comunu de Teulada a pustis de s’acòrdiu chi at firmadu su presidente de sa Regione Pigliaru cun su Ministeru de sa Defensa in su 2017 . Duncas imoi totu sa pràgia est lìbera dae sa tzerachia militare ma nc’ant a èssere clàusola de “protetzione sociale” pro s’atzessu a is chi traballant in s’esèrcitu cun rèdditu mèdiu e bàsciu.
Mèrcuris 9: in su MISE in Roma si sunt atobiados is sindacados, Invitalia e is dirigentes de sa Sider Alloys pro arresonare de s’istabilimentu de Portovesme. Sa presentatzione de su pianu industriale nc’at a passare a su 20 de su mese chi intrat e s’est scìpidu ca ant a èssere is cinesos de sa Chinalco chi ant a fàghere is traballos pro sa sala eletròlisi noa e s’ammodernamentu is àteros machinàrios. In su mentris giai centu ex traballadores diretos e indiretos de s’impiantu si sunt atobiados in su salone de s’oratòriu de Santu Pontzianu ant formaduu unu comitadu chi at a portare a innantis is istàntzias de totus is chi sunt preocupados meda pro custu progetu chi est trighende semper de prus a essire a campu. Is traballadores decrarant ca su chi ant fatu no est unu sindacadu nou ma si chesciant pro s’atzione de is sindacados ufitziales chi a parridare insoru no est bastante eficace e ant a dimandare a sa Sider Alloys de ddos reconnòschere comente una rapresentàntzia noa.
Giòbia 10: Su commissàriu de Sant’Anna Arresi at deliberadu de fàgher intrare su comunu chi est amministrende in sa Fundatzione de su Camminu de Santa Bràbara e duncas ant a intrare in su percusu àteros 15 kilometros chi s’ant a pòder fàghere a pee, a cuaddu a bicicreta chi ant a passare oru de mare e in mesu de is istangiones e ant a torrare in su territòriu de Masainas.
Cenàbara 11: in sa sede de su GAL de Masainas ant presentadu is 3 percursos pro sa formatzione de impresa e de su traballu autònomu pro s’isvilupu rurale sustenìbile. In totu s’ant a formare 60 giòvanos chi ant a essere agiudados dae is cunsulentes de sotziedades esternas e chi ant a pigare unu contributu de 50mila èuros a “fondo perduto” pro formare impresas chi ant a traballare in su setore agroalimentare.
sabudu 12: tres rapresentantes de su comitadu de is ex traballadores de s’ex Alcoa at atobiadu in Casteddu, in manera informale su ministru de s’isvilupu econòmicu Luigi Di Maio chi fiat faghende campagna eletorale in Sardigna pro is eletziones regionales. DD’ant intregadu unu docuentu aundi ispiegant coment’est sa situatzione e dd’ant dimandadu de si pònnere issu etotu avatu de custa chistione e dd’ant pedidu puru garantzias pro is ammortizadores sotziales chi sunt impitichende-sì semper de prus.
Domìniga 13: ormai est arribada s’ora de sa presentatzione de is candidaduras pro is regionales ma a oe, a parte is 4 consilieris de imoi, si ischit ancora pagu e nudda de is chi s’ant a presentare pro una cadira in arruga Roma in Casteddu. Siguramente is listas ant a èsser medas e pro totus is ischieramentos est difìcile a agatare personas de candidare fintzas proite ca in die de oe benit male a andare a dimandare su votu. Ormai is annuntzios si fàghent in s’internet e in logu de imprentare magineddas si faghet su post in facebook e si mandat unu messàgiu in whatsapp. E pròpiu in custa manera ant annuntziadu sa candidura insoru s’ex sìndigu de Carbònia Giuseppe Casti cun su PD e su vicesìndigu de Narcau Andrea Tunis cun Sardegna 2020. Su M5S sigundu su resurtadu de is regionàrias on line iat a deper presentat totu e is 4 candidados de Carbònia. Ancora non si scit cun chini si canidat Fabio Usai chi est consilieri di oposizione in Carbònia e tenit su record de preferèntias a is comunales. Pro imoi est siguru chi non si candiat est su sìndigu de S. Giuanni Suèrgiu: Elvira Usai, in d-unu comunicadu, at nadu chi mancai dd’apant circada in medas sighit a abarrare a fàghere su còmpitu chi dd’ant intregada is santuannesos 2 annos e mesu agoa. Si faghent unu muntone de àteros nùmenes pro is listas minores e sa pròssima essida de custu rubrica circaus de iscriere calincuna cosa in prus.
Roberto Pinna
