Sa cida sulcitana in curtzu. Dae S’11 a su 17 de friàrgiu
Lunis 11: is rapresentantes de Visit Sulcis, sa retza de siendas chi traballant in su setore turismu e chi sustènnida dae medas amministratziones locales, fiant in sa Borsa Italiana de su Turìsmu de Milanu pro prommòvere su territòriu. De chi ant atobiadu 20 tour operators europeos e americanos nos ant sinnialadu comente su Sulcis est incumentzende a èssere connotu e est trasformende-sì in d-una “destinatzione” chi is turistas circant pruscatotu pro s’enogastronomia e is escursiones de tipu culturale e archeològicu. S’atzione de promotzione at a sighire su mese chi intrat cun is fieras in Berlinu e in Mònaco de Baviera in Germania.
Martis 12: in Sant’Anna Arresi ant aumentadu sa tarifa fissa in sa bulleta de s’àcua pro is utèntzias de is personas chi non sunt residentes (s’agatant giai totus in sa zona de Porto Pino e in is fratziones) e duncas su prexu est pagu. Su commissàriu narat ca su comunu no nche guadàngiat nudda e chi custu aumentu (su 26%) serbit pro garantire chi su servìtziu funtzionit bene.
Mèrcuris 13: S’aministratzione comunale de Igrèsias at detzìdidu de serrare cun d-una geca de ferru s’intrada a sa crèsia de Santu Francisu (chi at a èssere aberta a oràrios pretzisos) chi est unu de is logos aundi si atobiant is prus giòvanos e chi a bortas si cumportant che vàndalos lassende su logu brutu e coreddende is muros.
Giòbia 14: sa Guàrdia de Finantza at scercuestadu 300 arritzones de mare a unu piscadore in su portu turìsticu de Portescusi. Is finantzieris nc’at torradu a ghetare is arritzones a mare e ant cuntestadu a su piscadore sa violatzione de is normas in vigèntzia in matèria de pisca marìtima. Sa norma narat ca su piscadore isportivu nde podet pigare sceti 50 arritzones in is dies de sàbudu, domìniga e in totus is dies festivas previstas in calendàriu de sa pisca.
Cenàbara 15: sa campagna eletorale est acabende e finas a imoi ancora is leaders natzionales non sunt bènnidos in logu nostru. Su centru-manca pro iscioberu preferrit a lassare a solu Màssimu Tzedda chi est girende meda in totu s’ìsula (est andadu a Sant’Antiogu, a Santadi, Carbònia), pagu si bident is candidados de su M5S, e non s’est bistu pro nudda Cristian Solinas chi est candidadu de su centru-dereta chi est lassende a su leader de sa Lega Matteo Salvini su ruolu principale. Custa assèntzia lassat a cumprèndere cantu siat difìcile a circare votos in su Sulcis-Iglesiente. Difìcile fàghere previsiones de comente ant a andare is eletziones: is ùrtimos sondàgios narànt ca sa dereta est a innantis e sa manca est cincurtzende cun su M5S foras de sa partida e is àteros candidados asuta de su 5%. Cida chi benit eus a biere a comente ant a andare is eletziones e nd’eus a iscriere in is pròssimas essidas de custa rubrica.
Domingu 17 e Sàbudu 16: a totu cida is pastores ant sighidu sa protesta insoru ma s’est osservadu unu cambia de tonu e de is atziones. Infatis su mentris chi andaiant in fallimentu is atòbios cuncordados in Roma (diretamente in su Viminale) e in Casteddu (in prefetura) intru de totus is partes interessadas ca fortzis sunt medas e non benit bene e si pònnere de acòrdiu (a un'oru sa Regione e su Guvernu centrale, a s'àteru is industriales, a un'àtera parte is pastores “solos”, nc'est sa Coldiretti cun is àteros assòtzios de is cooperativas) pro agatare una solutzione a su problema de su prètziu de su late. Finas a imoi is industriales sunt proponende 72 centèsimos a litru ma is pastores bollent 1 èuro prus s’IVA e duncas ant sighidu a nche iscavuare su late e dd’ant fatu in Sant’Antioogu, in su cavalcavia de sa 130 acanta de Sirai e in sa pratza de su su comunu de Narcau. In is telegiornales natzionales sunt andadas in onda unas cantu intervistas fatas a allevadores de sa zona nostra. A pustis de sa serrada de is atividades commertziales prus piticas e de iscolas medas fata mèrcuris in totu sa zona sunt aperèssidos lentzoros biancos in is fentanas de is domos privadas e istrisciones de solidariedade in si municìpios. In pratzas meda (in Villaperùciu, Santadi, Narcau, Nuxis Gonnesa, Igrèsias, Bidda Massàrgia, Domus Noas e Sant’Antiogu) is allevadores ant pesadu su casu e dd’ant donadu a sa gente faende in custa manera una atzione de tipu “costrutivu”. Unu grupu de pastores at cuncordadu puru unu presìdiu fissu de fronte a s’intrada de su caseifìciu de Santadi e unas cantu ant annuntziadu chi no ant a andare a votare e cumbidant sa gente a fàghere su pròpiu.
Roberto Pinna
