Sa cida sulcitana in curtzu
Lunis 1: in Biddamassàrgia ant incingiadu s’istatzione de is trenos noa. Sa primu idea de ammodernare s’iscalu ferroviàriu fiat de su 2009 ma a s’acabu de is contos, nc’at bòfidu 10 annos pro faghere is traballos e giai 900mila èuros de finantziamentos regionales. Soddisfados is sìndigos de Domus Noas e de Bissamassàrgia e imoi a parte su sistema de illuminatzione e sutapassàgios internos fatos de bellu e nou a foras ddoe ant a èssere parchègios bene fatos pro is pullmas e atzessos pro is disàbiles a norma.
Martis 2: una delegatzione de is ex operàios de s’Alcoa at fatu sit-in de protesta de fronte a su MISE in Roma contras a sa mancàntzia de is ammortizadores sociales chi sunt firmos dae s’acabu de s’annu passadu e sa protzedura est blocada in is ufìtzios de su ministeru. In totu sunt 800 is personas chi sunt abetende su sussìdiu istatale e sa situatzione pro famìlias meda est incumentzende a èssere drammàtica.
Mèrcuris 3: cida passada fiat sceti unu farsu allarme, custa cida invècias sunt 8 is algerinos chi is Carabineris ant agatadu a pagu tretu de Turri e fiant impunnende a pee conca a Sant’Antiogu. Comente dònnia borta is Carabineris nde-ddos ant pinnigados e lòmpidos a su centru de collidura de Muristenis pro is protezeduras de identificadura e de espulsione.
Giòbia 4: in Casteddu ant fatu sa primu setziada de su Consìliu Regionale nou e non sunt arrinèscidos a elìgere su presidente (cosa chi no acuntessiat dae 30 annos) e Christian Solinas at presentadu sceti 5 de is 12 assessores de sa giunta sua. Custos sunt sinniales craros ca, mancai siat passadu giai unu mese e mesu dae is eletziones e 2 cidas dae sa proclamatzione de is consilieris, in sa magiorantza de centrudereta no ant ancora agatadu s’acòrdiu pro ispartire is cadiras. In su mentris Nàssiu Locci at decraradu chi sighit a fàghere su sìndigu de Sant’Antiogu e duncas no at a intrare in sa giunta regionale e Fabio Usai, su prus votadu in su collègiu nostru, at lassadu su consìliu comunale de Carbònia. Usai at nadu ca s’at a impegnare pro chi torrit a èssere operativa sa provìncia de su Sulcis-Iglesiente a manera chi torrint puru is servìtzios chi sunt isparessende e at a donare cura manna a sa chistione de su polo industriale de Portovesme.
Cenàbara 5: in su mentris chi in Casteddu sighint is tratativas pro sa formatzione de sa giunta regionale Ivo Melis, chi est sìndigu de Masainas e presidente de s’Unione de is Comunos de su Sulcis, at iscritu una lìtera aberta a is consilieries regionales pro chi curregiant sa lege eletorale a manera siat de garantire sa rapresentàntzia territoriale prevista a dònnia territòriu (su Sulcis in custa torrada nde mandat 2 sceti in logu de 4) siat de assigurare, cun calincunu mecànismu corretivu, a is candidados chi pigant votos meda massimamente in is collègios prus piticos sa siguresa de èssere elìgidos aici chi no acuntessat prus chi personas chi pigant giai 3000 votos no abarrit foras a vantàgiu de personas chi nde pigant sceti 600 e brintant a su pròpiu.
Sàbudu 6: ddoe fiant prus de 70 personas a s’atòbiu organizadu dae s’Amministratzione comunale de Piscinas a pitzus de s’autismu. Su sìndigu Marianu Cogotti at torradu gràtzias a sa famìlia chi at donadu s’input pro cunordare s’atòbiu e pustis ant fueddadu 3 psicologas ispieghende ita est custa sìndrome de su cumportamentu, de sa cali ancora non si connoscint is càusas siguras, de is dificultades de is famìlias chi andant dae su disacatu e sa tristura de is babbos e is mammas finas a is problemas de sa gestione de sa vida de dònnia die. A ùrtimu ant ispiegadu ita totu podet fàghere una comunidade, in sensu ladu meda, pro ammelliorare sa vida de custas famìlias pruscatotu faghende una comunicatzione fàcile e dereta fintzas in is ufìtzios e in is locales pùbblicos.
Domìniga 7: depiant torrare a incumentzare “is domìnigas a su nuraghe” chi sunt is bìsitas ghiadas in su nuraghe Sirai de Carbònia ma pro mori de su tempus malu, e pagu male ca at torradu a pròere proite chi is campos nde teniant tropu abisùngiu, su primu apuntamentu est sartadu ma s’at a recuperare totus is domìnigas de custu mese de abrile e s’ant fàghere 2 apuntamentos extra su Lunis de Pasca e su 25 de abrile. Custa s’initziativa fiat andada bene meda su mese de ladàmine de s’annu passadu e duncas su comunu de Carbònia in pari a sa coop. Sistema Museo chi est gestende su sistema museale de Carbònia nia e sa Fundatzione de su Camminu de Santa Bràbara ant detzìdidu de ripitere s’abertura de custu situ. Si cuntzillat de prenotar sa bìsitia telefonende o mandende una mail a is gestores de su sistema. Su nuraghe Sirai est logu de importu mannu pro s’archeologia sende chi testimongiant s’ùrtima fase de sa civiltade nuraghesa chi s’est isvilupada cun is fenìcios acostados: a cantu paret totu a giru de su nuraghe Sirai ddoe fiat n’àrea industriale de s’antigoriu cun tanti de fàbricos adatos traballare sa pedde de is bèstias e funderias pro produsere ainas e trastos de metallu
Roberto Pinna
