Sa cida sulcitana in curtzu. Dae Lunis 22 a Domìniga 28 de mese de argiolas
Lunis 22 : cida passada s’est fata in Domus Noas una riunione de is sìndigos de su territòriu pro resonare in contu de sa crisi industriale e de su perìgulu de sa pèrdida de àteros postos de traballu si in casu essint tancadu puru sa fàbbrica de bombas de sa RWM (300 postos de traballu) proite chi su Guvernu centrale non bolet prus esportare armas in paisos coinvòlgidos in sa gherra in Yemen. Nisciunus est in favore de sa gherra ma in custu momentu no nc’at alternativas a sa produtzione bèllicas e duncas si depet lassare cussa genia de produtzione e duncas serbint propostas e pianos sèrios pro sa cunversione de sa fàbbrica.
Martis 23: s’est scìpidu ca lunis a note in sa sala eletròlisi de sa Portovesme srl est partidu unu fogu mannu e est fàtzile chi siat pro more de unu cortocircuìtu causadu dae barra de arràmine. In 20 minutos s’iscuadra istuda-fogu est arrinnèscida a ddu firmare e pustis sunt arribados puru is pompieris de Carbònia pro fàghere àteras verìficas. Sa bona sorte at bòffidu chi non si siat ingortu nemus e sa produtzione non s’est firmada sende chi su fogu at tocadu partes non vidales de s’istabilimentu.
Mèrcuris 23: In Sant’Antiogu aundi imoi ddoe at su mercadu cìvicu s’at a fàghere un’istrutura polivalente cun prus de 300 postos. Sa Giunta Comunale at aprovadu s’istùdiu de fatibilidade de s’òpera chi at a èssere su centru culturale de Sa Idda in su benidore. Su dinari sunt is 2 miliones de èuros postos dae su Guvernu pro is ìsulas minores (ormai est de 10 annos chi si fueddat de custa cifra) chi depiant serbire pro arrangiare su cineteatru Savoia ma sigumente non benit bene a ddu pònnere in su patrimòniu comunale s’Amministratzione de Nàssiu Locci at fatu una proposta alternativa a su Guvernu chi dd’at acetada.
Giòbia 25: su GAL Sulcis at cuncordadu un’atòbiu in sa Cantina de Santadi aundi s’est faeddadu de s’isvilupu turìsticu “consapevole” de su territòriu. Ant faeddadu is de su Camminu de Santa Bràbara, de su Geoparco, Ivo Melis sìndigu de Masainas chi at presentadu sa Bia de su Sale e de su Bentu, Antonello Pilloni chi at chistionadu de is Istradas de su Carignanu, is rapresentantes de sa retza Visit Sulcis e fintzas un’espertu ispagnolu chi est traballende pro fàghere su pianu de isvilupu turìsticu de su territòriu. Doniunu, craramente, at presentadu su suo che unu pràtica bona e custu siguramente at a èssere berus ma si totus custat bellas pràticas non andant a innantis in manera pretzisa e coordinada non s’ant mai a fàghere progressos sèrios.
cenàbara 26: àteru isbarcu pro de algerinos in costa sulcitana. Cust’orta unu grupu de 11 personas (10 òmines e una fèmminas) sunt arribados a barchita in sa pràgia Porto Pinetto, in comunu de Sant’Anna Arresi. Custa gente fiat provende a isparèssere in mesu de is matas e de is tupas ma calincunu ddos at bistos e at telefonadu a is Carabineris chi comente dònnia borta nde-ddos pinnigados e lòmpidos a su centru de collidura de Muristenis pro is protzeduras de identificadura e espulsione.
Sàbudu 27: at torradu a abèrrere s’infopoint de Masainas. Dae mèrcuris a domìnigu, a mericeddu (su fine de cida a mengianu puru), ddoe at a èssere una operadora chi faeddat tres lìnguas chi at a arritzere e at a donare informatziones a is turistas chi s’ant a firmare in de sa bidda de su Sulcis de Bàsciu. Ormai est su de 4 annos chi su Comunu de Masainas at incarreradu custa initziativa cun sa collaboratzione de sa retza VisitSulcis (e ocannu de su Geoparcu puru) ponende resorsas de bilànciu suas pro promòvere is eventos de sa bidda e fintzas de totu su Sulcis de Bàsciu. S’infopoint at èssere abertu finas a su mese de cabudanni chi benit e cun is datos chi s’ant a regòllere s’at a pòdere fàghere puru un’analisi, mancai pitica meda, de su flussu turìsticu in su Sulcis de Bàsciu chi est de importu mannu pro istudiare un’istrategia pro isvilupare su setore.
Domìniga 28: is ispetoras de s’Unesco ant incumentzadu su viàgiu insoru in Sardigna pro averguare si su Geoparcu tenit ancora su deretu de ammostrare custu reconnoschimentu internatzionale. Su perìgulu mannu est chi, a pustis de su “cartellinu grogu” de su 2017, est pròpiu cussu de nche pèrdere custu tìtulu e iat a èssere una befa manna meda sende chi su de sa Sardigna est istadu su primu Geoparco in totu su mundu. Pro mantènnere su tìtulu nche bolint standard de cualidade artos meda (pro esèmpiu atividades didàticas, organizatziones de mostras) e fortzis totu su chi s’est fatu in ùrtimos 2 annos no at a bastare. S’ispera e chi sa bìsita de is funtzionàrias de s’organizatzione internatzionale andit bene e chi lassint unu giudìtziu positivu.
Roberto Pinna
Chini iscriet custa rubrica si firmat unu mese e bosi donat apuntamentu a su 2 de cabudanni chi benit cun su resumu de su mese de austu.
