NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
27
Thu, Feb
35 Nuovi articoli

Sa cida sulcitana in curtzu Dae su 28 de mese de ladàmine a su 3 de donniassantu

Novas in Sardu (LSC)
Aspetto
Condividi

Sa cida sulcitana in curtzu Dae su 28 de mese de ladàmine a su 3 de donniassantu
Lunis 28: ant tentu sutzessu mannu is passilladas in mesu de is olias cuncordadas domìniga passada in Santadi e in Giba. In Santadi fiant una cincuantina is chi sunt partidos dae su centru e sunt andados finas a Barrua. In Masainas invècias fiant giai 150 is chi ant fatu su tretu de sa tapa de su Camminu de Santa Bràbara arribende finas a Su de Is Muras in comunu de Giba. In totu e is duos eventos ddoi fiant ghieas espertas chi ant ispiegadu sa geologia, sa fàuna e sa flora de su territòriu.
Martis 29: a pustis de una cida sceti sunt torrados a isbarcare is migrantes. Faci a is 6 de chitzi 11 a barchita sunt arribados deretos a su portu turìsticu de S.Antiogu; prus a trigariu in 9 sunt isbarcados in Porto Pino. Comente dònnia borta is Carabineris de sa cumpangia de Carbònia nde-ddos ant arrigotos e lòmpidos a su centru de collidura de Muristenis pro is protzeduras de identificadura e de espulsione. Ormai su nùmeru de is algerinos isbarcados in Sardigna ocannu est incurtzende a 800.
Mèrcuris 30: a pustis de 3 annos e mesu de sa bìnchida de is eletziones comunales de su 2016 sighint is tensiones polìticas in magiorantza a cincu isteddas chi guvernat Carbònia. De chi si sunt dimìtidos 6 assessores e 2 consilieris (unu est passadu a s’opositzione), fintzas Eleonora Cera at ufitzializadu s’essida dae sa magiorantza. Imoi sa giunta de Paola Massidda tenit sceti 2 votos in prus de s’opositzione (13 a 11) e giai su mese in su mese de martzu su consìliu aiat aprovadu su bilànciu cun s’astentsione de unu consilieri de s’opositzione. Duncas s’opositzione dimandant is dimissiones, su sìndigu invècias narat ca custu est su momentu chi tocat a aguantare pro regòllere is frutos de su traballu fatu finas a imoi.
Giòbia 31: in Roma, in sa sede de su MISE, su sutasegretàriu a s’isvilupu econòmicu Alessandra Todde at atobiadu is rapresentantes de sa Sider Alloy pro resonare in contu de is problemas chi ant sunt causende ritardos mannos a s’esecutzione de su pianu industriale presentadu su 26 de su mese de làmpadas passadu. A su chi si narat s’atòbiu est istètiu positivu e cida chi benit si nd’at a fàghere un’àteru aundi s’at a faeddare de chistiones prus tècnicas.
Cenàbara 1: fiat sa die de totus is Santus e aici isfrutende is dies de ponte, in logos meda, pruscatotu in is locales pùbblicos e fintzas in calincuna biblioteca ant fatu festas a tema de Halloween aundi is prus giòvanos e fintzas is pipios sunt andados mascarados sighende sa moda americana. In Igrèsias e in Domus Noas perou ant fatu festa in pratzas pro is prus minoreddos torrende a bogare a pillu sa traditzione sarda sintzilla de Is Animeddas e in Masainas una truma de piciocheddos est andada de domu in domu a circare durcis pro s’ànima de is mortos. Chini iscriet custas rigas pentzat chi siat est cosa bene fata a rispetare sa traditzione e a fàgher cumprendere a totus chi Halloween – festa de orìgine cèltica chi est sa contratzione de s’inglesu All Saints Eve (s’èsperu de totus is Santus) – siat Is Animeddas, in su significu prus fungudu, serbint a nos regoradare is personas istimadas chi non sunt prus cun nosu.
Sàbudu 2: s’amministratzione comunale de Igresias at a abèrrere un’ufìtziu distacadu de s’anagrafe in s’ex tribunale in su cuartieri de Serra Perdosa. Custu provedimentu est parte de su programma de ricualificatzione de su cuartieri, chi cun 4mila bividores est unu de is prus mannus de sa tzitade, e in custa manera is residentes ant a fàghere 2 kilometros de mancu pro andare a s’ufìtziu chi pro imoi at a donare sceti is cartas de identidade eletrònicas ma a lestru at a fàghere totus is àteros certificados.
Domìga 3: andant a innantis is campionados diletantes de fubalu. In su girone A de Ecellentza regionale est andende bene meda su Carbònia chi a pustis de 8 giorronadas est primu a solu cun 20 puntos. In su girone A de Promotzione regionale sa classìfica est ancora curtza: est in zona playout sa Monteponi cun 6 puntos, parint trancuillas su Villamassargia e su Cortochiana chi cun 9 e 11 puntos sunt a mesu classìfica. Incumentzant a pigare sètiu puru is classìficas de is àteros campionados minores. In su girone B de primu categoria a pustis de 7 giorronadas sa Fermassenti est segunda a 3 puntos dae sa prima, est a mesu classìfica su Narcau (8 puntos) male meda s’Antiochense 2013 e s’Atletico de Villaperùciu (ùrtimas cun sceti 3 e 2 puntos). In segunda categoria a pustis de 5 partidas giogadas su Masainas est a 3 puntos sceti dae is primas e duncas, assumancus pro imoi podit gherrare pro sa promotzione dereta, trancuillos in mesu de sa classìfica su S.A.Arresi e s’Isola di S.Antioco, ùrtimas su Perdaxus, Bindua e Is Ùrigus chi siguramente ant a deper gherrare pro si salvare.

Roberto Pinna.