NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
27
Thu, Feb
35 Nuovi articoli

Sa cida sulcitana in curtzu. Dae su 25 de onniassantu a s'8 de mese de idas

Novas in Sardu (LSC)
Aspetto
Condividi

Sa cida sulcitana in curtzu. Dae su 25 de onniassantu a s8  de mese de idas

Lunis 25: In Portescusi is operadores de Centru pro su Traballu de Carbònia (tenit sa cumpetèntzia pro 16 comunos e sa “bellesa” de 30mila iscritos) ant fatu unu cunvegnu aundi ant analizadu is dotos de su mercadu de su traballu in su Sulcis. Cun s’indùstria in crisi costante, sunfrint meda su cummèrtziu e totus is consulentes e tècnicos a partida IVA. Parit istàbile su setore de s’agricoltura; est incumentzende a si mòvere calincuna cosa in su setore de is costrutziones e de is servìtizios a sa persona; parit siat andende bastante bene su setore de su turismu: infatis aumentat su nùmeru de personas chi is siendas regollint a traballare ma a dolu mannu est pro pagos meses (in s’istadi) e giai totus is assuntos tenint unu cualìfica bàscia.
Martis 26: 7 giòvunos de Masainas sunt partidos a Inghilterra gràtzias a su progetu “Do you Speak English” finantziadu dae s’amministratzione comunale e incarreradu dae sa cooperativa Millepiedi. Su progetu prevediat laboratòrios cun d-una dotzente de inglesu e su viàgiu in Inghilterra serbit pro ammaniare e isperimentare su chi is piciocheddos ant imparadu. Su progetu sighit fintzas s’annu chi benit e at a èssere abertu puru a is operadores de su cummèrtziu pro chi cresciant is cumpetèntzias linguìsticas insoru chi sunt fundamentales pru s’isvilupu de s’economia turìstica.
Mèrcuris 27: Cenàbara passadu ant torradu a abèrrere a is bisitadores de gruta de Santa Bràbara in sa miniera de Santu Giuanni in Igrèsias e duncas su territòriu nostru at recuperadu una prenda de una bellesa ispantosa de ammostrare a is turistas. In su mentris sa retza de impresas Visit Sulcis (ponit in pari prus de 100 siendas privadas e tenit su sustegnu de medas amministratziones comunales de su Sulcis) sighint s’atzione de promotzione de su territòriu: infatis fiant presentes siat in Venètzia a sa fiera de su turismu esperientziale (una genia de turismu chi circat is esperièntzias personales e si nde istesiat dae s’avollotu clàssicu de is logos prus famados) siat in sa Fiera de Varsàvia pro circare de abèrrere su mercadu de s’Est Europa (mercadu chi est creschende meda in is ùrtimos annos) proponnende “pachetos” prus traditzionales.
Giòbia 28: in Carbònia ant incingiadu sa domu de sa domòtica, chi gràtzias a s’acòrdiu firmadu dae su sìndigu de Carbònia Paola Massidda e Franca Boi chi est sa presidente de s’assòtziu “Le Rondini” at a essire su primu centru in Sardigna dedicadu a s’arricreu de totus is personas chi tenint dònnia genia de maladia, fintzas is prus graves comente sa SLA.
cenàbara 29: est arribada una nova bella meda pro s’indùstria sulcitana: infatis s’assessoradu a s’ambiente de sa RAS at serradu, donende èsitu positivu, s’istrutòria pro autorizare su progetu nou de s’Euroallumina. Duncas a pustis de 4 annos totu s’iter de autorizatziones est pro acabare. S’assessore Gianni Lampis at assiguradu chi a lestru su dossier at a lòmpere in Giunta Regionale pro aprovare sa delìbera cun sa valutzione de impatu ambientale. S’investimentu avantzadu dae sa Rusal pro sa fàbbrica sulcitana balet 200 miliones e 1400 bustas paga. S’ispera de totus a pustis de 10 annos chi sa fàbbrica at serradu, chi custa siat sa borta bona chi torrit a partire s’istabilimentu.
Sàbudu 23 fiant in 200 e prus is istudentes voluntàrios de su Liceu Lussu de Sant’Antiogu chi cenàbara a mangianu sighende is manifestatziones de “Fridays for future” sunt andados a Coa Cuaddus e nd’ant boddidu totu s’àlliga chi gente pagu tzivile at lassadu in sa pràgia e in su crachi a giru a giru. Est dovere a sinnialare chi custa bella initziativa s’est fata cun sa collaboratzione de is proferessores e de su dirigente chi at autorizadu is istudentes a andare a fàghere custa atividade a intrus de s’oràriu de iscola.domìniga 1: a pustis de unu mese de àcua su tempus s’est assetiadu e pretzisos sunt torrados a isbarca is alegerinos in su Sulcis. Faci a is 9:30 de mangianu acanta de su muraglione de Porto Pino 9 algerinos (o assumancus custu e su chi ant decraradu) sunt arribados a barchita algerinos. In mesu de custos nche fiat puru unu piciocheddu de 12 annos chi nde-dd’ant pigadu a ambulantza e nche dd’ant lòmpidu a s’uspidale Sirai pro controllos mèdicos. Pustis sunt arribados is Carabineris de sa Cumpangia de Carbònia chi comente dònnia borta nde-ddos ant pinnigados e lòmpidos a su centru de collidura de Muristenis pro is proceduras de identificadura e de espulsione.

Lunis 2: pustis de Gonnesa, Masainas , Santu Giuanni Suèrgiu chi dd’ant fatu is cidas passadas, fintzas s’amministratzione comunale de Carloforte at incarreradu sa protzedura pro donare sa citadinàntzia onorària a sa senadora Liliana Segre se chi est una de is ùrtimas personas bias chi est passada in s’arrore de is campos de istèrminiu nazistas.
Martis 3: su comunu de Sant’Antiogu est “plastic free”: Nàssiu Locci at firmdu su pregone pro mèdiu de su cale dae su 1 de martzu de su 2020 partit su divietu de bèndere calisisiat ogetu de pràstica a un’impreu sceti; is chi tenint ristorantes o paradas podint oberare sceti istèrgiu biodegradàbile aici comente is chi organizant festas e sagras pùbblicas; est proibida de su totu sa bèndida de bustas in politilene.
Mèrcuris 4: is comunos de Tratalias, de Villaperùciu e de Carbònia ant detzìdidu de si pònnere in pari pro sa gestione de is sitos culturales insoru. Duncas a lestru, si prevedit a intrus de sa metadi de s’annu chi benit, s’at a fàghere unu bandu ùnicu e sa siende chi dd’at a binchere at a tènnere sa gestione de su Brugu bèciu de Tratalias, de su situ archeològicu de Montessu e de totu su sistema museale de Carbònia.
Giòbia 5: nova bona e prexu mannu pro is operàios de s’Eurallumina: sa Giunta Regionale at aprovadu sa delìbera cun sa valutatzione de impatu ambientale e duncas s’istabilimentu podet torrare a partire. Dd’at annuntziadu diretamente Christian Solinas a is rapresentantes de is operàios. Nc’at bòffidu 4 annos de protzessos burocràticos prenos de trampas e medas manifestatziones de is operàios chi ant sighidu in manera costante dònnia momentu de is protzedura.
Cenàbara 6: est crescende semper de prus su movimentu chi bolet torra s’istitutzione de sa provìncia in su Sulcis Igrèsiente e custa cida si-nd’est chistionadu in duas ocasiones. Giòbia in su centru culturale de s’Euralcop de pratza Marmilla is de “Sinistra Autonomia e Federalismo” ant fatu cunvegnu aundi sunt intervènnidos professores universatàrios, calincunu amministradore locale e Tore Cherchi, aundi dimandaiànt s’acabu de su commissariamentu de is territòrios e s’espressione de una ghia de tipu polìticu. Nche fiat gente a tropas (sìndigos, sindacalistas, impresàrios mannos e piticos e rapresentantes de is professiones sanitàrias) in su cunvegnu organizadu sàbudu a mangianu dae su consilieri regionale de su PSdAz Fabio Usai in sa sala de su consìliu comunale de Carbònia. Quirico Sanna, assessore a is Entes Locales de sa RAS, at nadu chi si Sulcis at abarrare aunidu cun sa rechesta de s’istitutzione de una provìncia, siguramente nc’at a rennescere a dda otènnere a comente at a tènnere sa ASSL sua.
Sàbudu 7: in Sant’Antiogu ant incingiadu cun d-unu sucessu mannu de pùbblicu su “Villaggio di Babbo Natale”: 120 figurantes (a chini bistidu a personàgiu de sa Disney a chini traghende s’islita), ant fatu una prucessione chi est partida dae sa crèsia de Nostra Sennora de Bonària e est lòmpida a pratza Umberto, aundi asuta de sa lughe de una istedda manna meda (arta sa bellesa de 7 metros e ùnica in Sardingna) ddoi at sa domu de is giogos pro is pipios e sa fiera-mercadu. Su villàgiu at a abarrare abertu fintzas a su 6 de gennàrgiu chi benit e sunt previstos eventos in totu 16 eventos de animatzione chi sunt incumentzados domnìniga cun su Nascimentu in gruta (su presèpiu bivente) chi ormai est apuntamentu traditzionale de is festas de Sant’Antiogu.
Domìniga 8: ocannu puru est andada bene meda “Pane e olio in frantoio”, sa rassegna enogastronòmica organizada dae s’amministratzione comunale santadesa in pari a is assòtzios locales e su contributu de sa RAS chi est lòmpida a sa de 17 editziones. Sa die fiat bella meda e duncas s’est bista gente meda passillende in is arrugas e in sa pratza de su boddeu castiende is mostras, ascurtende sa mùsica e tastende is mellus produtziones locales. Fiant in 250 is chi ant pigadu parte a “Grande Arrampicata”, su giru a bicicleta de is montes e de su sartu organizadu dae is “Pedali Santadesi”, prus de 100 is chi sunt andados a castiare “s’interru pùnicu” cuncordadu dae sa cooperativa Sémata in su situ archeològicu de Pani-Lòriga. Semper prenas is navetas chi dae su centru nc’ant lòmpidu sa gente is Grutas de Su de is Tzuddas e chi impunnant a is molinos.
Pro su chi pertocat sa produzione de ollu, a pustis de is’annadas malas is annos passados, ocannu puru no est andende bene: su bentu forte in beranu nd’at iscutu su frore e sa basca manna in s’istadi nd’at fatu ruère sa parte manna de su frutu. Duncas s’olia est pagu e su prètziu de s’ollu de ermanu, chi assumancus est de cualidade arta meda, at aumentadu ancora: is produtores sunt circhende 12 èuros pro unu litru de ollu nou.

 Roberto Pinna