Sa cida… sulcitana in curtzu. Dae su 2 a su 8 de martzu
Lunis 2: in Sant’Antiogu non si pagat prus su parchègiu in is istrìscias asullas. Custu proite chi est iscadidu s’apaltu de gestione e bàsciu chi no intrat su gestore nou si podit parchegiai in su centru de Sa Idda sena de pagare. Su Comunu sa gara dd’at fata e at intregadu puru su servìtziu ma is chi sunt arribados segundos ant presentadu ricursu a su TAR at ordinadu sa sospensiva. Aici is operàios comunale ant acarrargiadu is machineddas chi donant su billetu. De siguru is chi andant a centru a màchina ant a arresparmiare calincunu soddu ma nc’at puru s’arriscu, comente est sutzèdidu in àteros logos, chi is residentes nde aprofitint lassende ocupados po ora meda o mancai a totu die, is parchègios chi iant a pòdere oberare personas chi non bivint in su centru o chi lompent dae àteras biddas.
Martis 3: s’undada de furas in is domos de Carbònia est arribada in parlamentu. Infatis s’onorèvole Deidda Sasso de Fratelli d’Italia at presentadu un’interrogatzione a su ministru de s’internu Lamorgese pregontendi-dda sa connoscit sa situatzione de Carbònia e de nche pònnere prus personale de is Fortzas de s’Òrdine in servìtziu. In su mentris is cummertziantes de s’assòtziu de su centru de sa citade aiant organizadu una fiacolada pro cenàbara ma pro mori de s’emergèntzia de su corona-virus dd’ant dèpida rinviare. In su mentris ant fatu àteras furas in d-unu negòtziu mannu de arruga Roma e in d-una butega istòrica de arruga Gramsci ma assumancus custa borta is Carabineris sunt arrinneschidos a cassare is chi ant furadu.
Mèrcuris 4: in Sant’Antiogu s’est ispaciadu Dario Siddi chi fiat un’esponente istimadu de su mundu de sa cultura locale. Siddi fiat professore de lìteras e istadu puru assessore a sa cultura. In su 1988 aiat fundadu sa cumpangia teatrale “Il Calderone” aundi fadiat s’atore e fintzas su regista. In is ùrtimos annos si fiat dedicadu a s’archeologia (si fiat pigadu sa segunda laùrea) partecipende a su progetu de isgavu archeològicu de su cumplessu nuràgicu de Grutiàcua cun s’universidade tedesca de sa Ruhr.
Giòbia 5: su 4 de martzu est essidu su Decretu de su Presidente de su Consìliu de is Ministros cun mesuras pro firmare s’ispainadura de su chi narant corona-virus e duncas ant blocadus totus is manifestatziones previstas pro custu acabu de cida: sa festa de is innestos in Masainas, su recuperu de s’isfilada de carnovali de Santu Giuanni Suèrgiu, s’incìngiu de unu monumentu in Narcau dedicadu a is fèmminas e fintzas s’abertura a is fideles de sa bàsilica de Sant’Antiogu a pustis de su restàuru chi fiat prevista pro su 18 de custu mese. S’obispu nostru Monsignor Zedda at donadu, ponende avatu su Decretu, diretivas craras meda: intrada cuntingentada in is crèsias, si nd’est tròcida s’àcua dae is acuasanteras, si depet fàghere unu ingestu de arrispetu a is personas prus acanta in logu de si tocare sa manu in sinnu de paghe e in su momentu de is intentziones depeus arregordare is chi sunt malàdios, is chi timint e massimamente totus is chi sunt traballende pro cumbàtere sa maladia. In su mentris sa Protetzione Civile ant incumentzadu a cuncordare is tendas pro su triàge in is prontos soccorso de su CTO de Igrèsias e in su Sirai de Carbònia pro is chi tengant is sìntomos de sa maladia (tussi e calentura) a manera chi non passint a intrus de su localis ma chi bengant isolados prontamente. Custu fatu fiat su sinniale chi sa situatzione fiat impeuende semper de prus.
Cenàbara 6 e sàbudu 7: s’epidemia de corona virus est lòmpida puru in logu nostru. Infatis est arribada sa cunfirma chi una dotora de Igrèsias chi traballat in Casteddu at tentu su tampone positivu e dd’ant arricoverada in su Santissima Trinità. A lestru ant serradu duos repartos de su Santa Bràbara aundi est passada custa dotora (radiologia, pneumologia e fintzas su CUP) e sunt 36 personas is personas chi sunt intradas in cuarantena.
Domìniga 8: est arribada a pustis de su decretu de su Presidente de su Consìliu fintzas s’ordinàntzia de su presidente de sa RAS cun sa cale si imponit sa cuarantena fiduciària a totus is chi arribant de is zonas arrùbias. Pro gente meda custa ordinàntzia non abastat pro firmare su cuntàgiu, fintzas proite chi gente meda nd’est torrada dae is zonas arrùbias cunsiderende puru su fatu ca su sistema sanitàriu de siguru non funtzionat bene, e dimandant de serrare totu pro assumancus 15 dies. De siguru iat a èssere una solutzione bona ma su fatu est ca, pro bona sorte, biveus in d-unu Istadu democràticu e non si podent limitare de unu momentu a s'àteru is deretus fundamentales garantidos dae sa Costitutzione (s’artìculu 120 fueddat in manera crara) e duncas est netzessàriu chi totus, incumentzende de nosu etotu, pongaus mente a su chi arricumandat is Autoridades e siaus responsàbiles non pro nosu sceti ma fintzas pro is àteros, massimamente is personas prus dèbiles.
a cura di Roberto Pinna
