Sa cida sulcitana in sardu. Dae su 29 de làmpadas a su 5 de mese de argiolas
Ormai parit chi pro Casa Serena, s’arricoveru de Igrèsias, no nche siat prus isperàntzia. Infatis s’est scìpidu chi nc’ant bogadu is primos 9 traballadores (8 fèminas e 1 òmine) de su servìtziu de lavanderia. Sa situatzione est drammàtica de diaderus: si chistionat de 80 bustas paga e de 55 òspites, cun sa parte prus manna de custos chi no est autosuficente. S’ùnica ispera est chisi aberrat a lestru su Margherita di Savoia (ormai est de 14 annos chi si-nde chistionat) a manera de sarvare cantu prus postos de traballu possìbile e massimamente de donare un’allògiu a personas chi a solas non si podent bàllere.
A pustis de is 100 personas algerinos arribados in su Sulcis cida passada, martis in grofu de note sa Guàrdia de Finantza at intertzetadu in mari un’àtera barchita cun 17 personas (in mesu de custas ddoi iat fintzas una pipia de 5 annus cun su babbu) e nche-ddos ant acumpangiados a su portu de Sant’Antiogu e intregados a sa Politzia chi ddos lòmpidos a su tzentru de collidura de Muristenis aundi ant fàghere 2 cidas de corantena e a pustis ant incumentzare is protzeduras de espulsione. Dae su comentzu de s’annu sunt prus de 500 is algerinos chi sunt arribados in Sardigna.
Dae su primu de làmpadas s’atzessu a sa pràgia de Tuerredda, in comunu de Teulada, est limitadu: no ddoe ant a pòdere intrare prus de 1100 personas (729 in sa parte lìbera e 371 in is istabilimentos). Custa detzisione su Comunu de Teuladda dd’at leada giai s’annu passadu siat pro sarvare sa pràgia chi no aguantàt prus unu càrrigu antròpicu tropu mannu sende chi in su mese de austu castiende dae susu pariat de biere prus che una pràgia unu niu de fromigas. Si podet prenotare su postu sceti in is istabilimentos, invècias pro sa parte lìbera balit sa règula de chini prima si acudit ma si podit controllare si ddoi at logu in su situ de su Comunu de Teulada cun is operadores chi ant agiornare in tempu reale sa situatzione dae is 08:00 a is 18:00. Est previstu su contributu volontàriu de un’èuro e in prus ddoe ant a èssere 10 agentes de sa politzia municipale chi ant a girare in totu su litorale a controllare su distantziamentu sotziale.
In Carbònia, pustis de meses de polèmicas, ant acabadu de pubblicare is elencos de is benefitziàrios de sa mesura de agiudu istraordinària pro cuntrastare s’emergèntzia sotziale dae sa pandemia de covid-19. Fiant arribadas giai 2000 domandas e is ufìtzios ant trigadu cun s’erogatzione de is contributos proite chi ant averiguadus totus is istàntzias cun normas chi assumancus in d-una prima fase fiant pagu craras. Un’àtera nova bona in Carbònia est chi ant assegnadu 29 allògios populares a àteretanti famìlias e su sìndigu Paola Massidda at agatadu un’acòrdiu cun is dirigentes de s’AREA pro portare a innantis una sèrie longa de pràticas chi sunt firmas dae annos meda.
Cenàbara 3 ant torradu a abèrrere a is bisitadores fintzas is grutas de Su Mannau in Frùmini Majori. Si fàghent 6 bìsitas dònnia die cun s’òbbligu de is guantos e de sa mascherina cun is gestores chi ant a donare prioridade a is prenotatziones. Cida passada ant abertu in Igrèsias in su Casteddu de Salvaterra su Museu de is armas e de is ainas de tortura de su mesu evu (totus riprodutziones istudiadas dae su mastru Enzo Caschili). Sa Pro Loco de Piscinas aberrit dònnia acabu de cida pro totu s’istade su Villino Bice, una residèntzia in istile Liberty de sa famìlia Salazar progetada s’architetu Giorgio Asproni aundi si podint osservare mobìliu, istèrgiu, bistimentas e rivistas de is primos annos de su 900.
Duncas imoi podeus nàrrere chi totus is atratziones turìsticas sunt torradas in funtzione e sunt prontas pro is bisitadores. Craramente is primos datos de s’ istasone sunt negativos meda: ammancant is istràngios (tedescos e pruscatotu is frantzesos chi aiant contribuidu in manera forte a s’aumentu de is ùrtimos annos) ma si isperat chi torrint is su mese de cabudanni e su chi parit sunt aumentende is prenotatziones de is “continentales” pro custu mese e pro austu.
Sàbudu a mangianu de fronte a su poliambulatòriu de Bugerru is sìndigos de su Sulcis ant fatu sa segunda tapa de sa protesta itinerante contras a is dissèrvìtzios in sa sanidade, is tancaduras e is trasferimentos de is presìdios mèdicos e ambulatoriales. In sa cunferèntzia is sìndigos ant resonadu pruscatotu in contu de is problemàticas de is ambulatòrios pediàtricos e sunt ancora abetende che s’assessore regionale Mario Nieddu torrit sceda a sa rechesta de atòbiu pro chistionare de is problemas de su Sulcis.
Seus in su segundu mese de sa fase 2 e pro imoi in Sardinga e in logu nostru sighit a andare totu bene e is racumandatziones sunt is sòlitas: mascherina in logu serradu e distàntzia interpersonale de rispetare semper. S’augùriu est a abarrare sanos!
a cura di Roberto Pinna
