SA cida sulcitana in curtzu.Dae su 6 a su 12 de mese de argiolas
Dae lunis In Prag’e Mesu, in comunu de Gonnesa, ant incumentzadu s’atividade s’infopoint point turìsticu e su servìtziu de biblioteca chi ant a funtzionare finas a su 30 de austu. S’infopoint est gestdiu dae su “Consorzio Turistico per l’Iglesiente” invècias su servìtziu de imprèstdu de is lìbros dipendit de sa biblioteca comunale e a cantu parit est agradèssidu meda pruscatotu de is pipius ma fintzas is prus mannos si acostant a leare lìbros (abastat sceti su documentu de identidade po sa registratzione). In su mentris s’Amministratzione chi in su periodu de lock down at traballadu meda e bene, cun sa collaboratzione de sa Fundatzione de su Camminu de Santa Bràbara, at intregadu sa gestione de is bìsitas a su nuraghe de Seruci a s’assòtziu Villa Conesa. Su Nuraxi si podit bisitai dònnia die, francu che su lunis, de is 7 de merì. Su prètziu de sa bìsita est 13 èuros e includit puru s’aperitivu de gosare a s’ora de scurigare. Po bisitare su monumentu tocat a prenotare a su 3927503172. In prus cun sa collaboratzione de àteros assòtzios locales ant cuncordadu una sèrie de eventus pro totu s’istade: si andat dae is presentadas de lìbros a spetàculos musicales e tastos de is mellus produtzionis enogastronòmicas locales finas a is passilladas a de note cun is espertos de astrofìsica chi ant a spiegare is costellatziones cun mitos e legendas.
Martis est intrada in vigèntzia sa delìbera de sa Giunta Comunale de Igrèsias chi at aprovadu àteras a àteras agevolatziones pro sa TARI a is siendas chi ant serradu s’atividade o dd’ant fata in forma ridùsida pro mori de s’emergèntzia covid-19. S’agevolatzione pertocat s’esentzione totale de sa parte variàbile e fissa sceti pro su periodu de sa tancadura obbligatòria pro is siendas chi ant serradu de su totu, invècias is siendas chi ant tentu una limitatzione de s’atividade ant a pagare sceti sa parte fissa. Is titulares de is impresas chi ant a arritzere sa bulleta sena de is agevolatziones previstas depint andare a s’ufìtziu tribotos comunale pro òtènnere sa retìfica.
Ormai sa scola est acabada de prus de unu mese e giai tempus de progetare sa torrada in tempus de coronavirus e sunt arribadas in custa diretzione unas cantu propostas de is sìndigos de su Sulcis de Bàsciu. Su sìndigu de Masainas Ivo Melis est dimandende s’istitutzione de su “tempus normale” in su plessu locale de s’iscola elementare (andende su sàbudu puru) a su dirigente de s’iscola Marconi de Santu Giuanni Suèrgiu de su cale dipendint is plessus de Masainas. Melis narat ca de siguru su tempus prenus tenit vantàgios meda ma est berus puru chi nc’at famìlias meda in sa zona chi preferrint a lassare is pipios prus lìberos pro poder fàghere àteras atividades a merie e in custa manera s’iat a pòdere donare unu servìtziu in prus pro totu sa zona sena de fàghere classes tropu prenas. Fintzas Marco Piras chi est sìndigu in Tratalias at postu a disponimentu de sa zona s’iscola locale, chi est noa e ma de ocannu at a èssere serrada proita chi no nc’at bastante piciocheddos pro dda lassare aberta. Piras ispiegat chi sa scola tenit àulas ampras, palestra e laboratòrios nous e chi iant a bastare unas cantu interventos de manutentzione ordinària pro dda pònnere torra a norma.
Dae Giòbia Santu Giuanni Surègiu tenit su grupu comunale de Protetzione Civile. Pro imoi nc’ant a èssere 8 personas cualificadas (si abetant iscritziones noas) prontas a gestire is emergèntzias chi iant a dèper acuntèssere in su territòriu comunale in casu de fogos e allertas mèteo.
Cenàbara in Sant’Antiogu sa sotziedade americana Resolve Marine, pustis de cidas de atòbios cun is autoridades (ministeros, assessorados regionales, sìndigu, Guàrdia Costiera...) at incumentzadu is operatziones pro sciusciare su cargo CYDR-BLU chi pro mori de una burrasca travessa dd’iat acabada in arrocas de Portu Sciusciau su 21 de mese idas passadu ponende in perìgulu is marineris chi fiant in sa nave. De chi sa nave at a èssere segada in duos arrogos nche-dd’ant lòmpere a su portu de Genova.
A pustis de tempus meda calincuna nova de fuballu. Su Carbònia chi s’annu chi benit at a giogare in sèrie D at presentadu s’allenadore nou: est Marco Mariotti, chi tenit esperièntzia longa e at giai allenadu in Sardigna sa Nuorese e sa Torres. Incumentzat a si mòvere puru sa Monteponi chi pro imoi at cunfirmadu bona parte de s’iscuadra chi fiat andende bene meda in sa segunda parte de su campionadu de promotzione e incumentzende a ingagiare òmines de esperièntzia chi ant giogadu in categorias superiores pro puntare a bìnchere su campionadu.
Ormai seus in prena istade, is cosas pro su chi pertocat su covid-19 sighint a andare bene e racumandatziones sunt is sòlitas: mascherina in logu serradu e distàntzia interpersonale de rispetare sèmper. S’aùguriu est a abarrare sanos!
Roberto Pinna
