Sa cida sulcitana in curtzu. Dae su 13 a su 19 de mese de argiolas
Dae Lunis in Carbònia invecis aberrit pro sa primu borta in Igrèsias est torra operativu, s’isportellu de sa lìngua sarda.
Dae Lunis in Carbònia invecis aberrit pro sa primu borta in Igrèsias est torra operativu, s’isportellu de sa lìngua sarda. Duncas un’operadore – chi pro imoi sighit a traballare in smart working ma si podit cuntatare a s’indiritzu Questo indirizzo email è protetto dagli spambots. È necessario abilitare JavaScript per vederlo. – finas a su mese de dònniassanti chi benit, duas bortas a sa cida,at a èssere a disponimentu de is assòtzios culturales e de is personas chi bolint consulèntzia o connoschere is ùrtimas novidades in contu de sa lìngua sarda. Su progetu est finantziadu dae sa lege 482/99 (annualidades 2018-19), sunt previstos puru laboratòrios e cursos de formatzione chi ant a incumentzare in su mese de cabudanni. In su mentris in Igrèsias ant torradu a cuncordare is paràcuas colorados in su tzentru istòricu chi ormai sunt unu clàssicu de s’istade sulcitana e est operativu unu servìtziu in prus pro is turistas chi a a bellu a bellu sunt arribende: un’infopoint itinerante gestidu dae su consòrtziu turìsticu po s’igresiente.
Martis a note nc’est istètiu un’àteru isbarcu de algerinos in su Sulcis. Cust’orta sunt lòmpidos deretos a Maladroxa aundi calincunu at signaladu sa presèntzia de una barchita e a pustis sunt intervènnidos is Carabineris de Santu Giuanni Suèrgiu chi nde-ddos ant arregortos e lòmpidos a su tzentru de collidura de Muristenis pro incarrerare is protzeduras de identificadura e espulsione. A custus tocat a aciungere su chi su chi ant agatadu giòbia in mesu de Sant’Antiogu e chi teniat giai unu provedimentu de espulsione.
Mèrcuris ant presentadu su programma de is eventos cuncordados in Sant’Antiogu pro custa istade. Su programma mancai s’emergèntzia sanitària siat ancora in cursu, est ricu meda, sinniale craru chi s’Amministratzione Comunale at traballadu bene in su lock down cun is assòtzios locales. Si andat dae is escursiones a pee e a bicicreta peri s’ìsula, a su cìnema asuta de is istèddas chi torrat a pustis de annus, a sa mùsica in s’Arena Fenicia fintzas (sa de 2 editziones de su Sulky Jazz Festival) a is initziativas isportivas prus traditzionales pro acabare cun su sòlitu apuntamentu cun “Al mare che tutto unisce” dedicadu a s’iscultore Gianni Salidu.
Invècis in Porto Paleddu, in comunu de Portescusi, su mere de unu locale nc’at imboladu a s’àcua su gazebo de sa Politzia Locale. A die infata s’òmine s’est iscusadu e at ispiegadu chi fiat acimbelladu meda pro mori de is restritzionis pro su cuntrastu a su covid-19 chi ant portadu a una ismenguadura manna de su gualàngiu suo e chi beniat male a pagare is 8 dipendentes. Su cumandante de sa Politzia Locale at decraradu ca donia manera s’at a abèrrere un’indagine e chi is vìgiles ant a sighire a fàere su dovere insoro.
Giòbia su consìliu comunale de Carbònia, cun 13 votos contras e 12 in favore, at respintu sa motzione de isfidùcia presentada dae s’opositzione. Est andadu totu comente fiat previstu: sa gente comuna de custa motzione de isfidùcia nd’at chistionadu pagu e nudda, tres oras e prus de debata in consìliu sigundu su copione de is ùrtimos annos: s’opositzione chi at imputadu a su sìndigu e a sa giunta is fallimentos amministrativos e crisi de sa tzitade, sa magiorantza (o su chi nde abarrat) e su sìndigu chi ant ammìtidu problemas ma chi at rivendicadu puru is sutzessos de s’atzione sua. Si sunt astènnidas Daniela Garau e Eleonora Cera chi iant mancu firmadu pro sa presentatzione.
Cenàbara a pustis de tres meses e mesu s’est arregistradu unu casu de positividade a su coronavirus in su Sulcis. Su casu est istadu registradu in Sant’Antiogu: a cantu parit est una turista chi istat bastante bene e chi fiat giai in isolamentu. Su sìndigu Nàssiu Locci at decreradu ca sa situatzione est asuta de controllu e invitat a totus a abarrare trancuillos e a sighire cun is inditos de su Guvernu a pitzus de s’impreu de is mascherinas, de su distantziamentu sotziale e s’igene de is manus. Si ddu depeus regordare ca su virus esistit ancora e chi est perigulosu duncas depeus donare sèmper atentzione proite chi abastat unu momentu pro nche pèrdere su sacrifìtziu mannu chi eus fatu fintzas a imoi.
Sàbudu a note in su situ pùnicu de Pani Lòriga, in comunu de Santadi, cun su cuncertu de Elena Ledda ant incngiadu s’impiantu de lughes noas chi ant a permìtere de bisitare, assumancus in parte, su situ fintzas a su note. S’impiantu est costadu 15000 èuros e dd’at finantziadu sa Fundatzione de su Camminu de Santa Bràbara cun su Comunu de Santadi.
Dòminiga In Bidda Massàrgia ant dedicadu sa rotatoria noa a Emanuela Loi, sa politziota morta pròpiu 28 annos a coa dae sa màfia in Palermo in pari a su giugi Paolo Borsellino e totu s’iscorta sua.
A cura di Roberto Pinna
