Sa cida sulcitana in curtzu. Dae su a su 16 a su 22 de donnisantu
Lunis is Carabineris de Sant’Antiogu, a pustis de 7 meses de indàgines, ant arrestadu 2 òmines pro is atendadu e àteros atos vandàlicos fatos in su mese de fràrgiu passadu candu aiat pigadu fogu unu locale in su lungomare.
Mario Nieddu, s’assessore regionale a sa sanidade, martis at atobiadu is sìndigos de su Sulcis in videocunferèntzia pro resonare in contu de is problemas atuales e de su benidore de sa sanidade in su territòriu. Cust’orta is sìndigos sunt satisfados de is rispostas de Nieddu chi at assiguradu chi s’at a incurtzare su tempus de esecutzione de is tampones e chi at coinvòlgere de prus is sìndigos pro su chi pertocat su territòriu. Pro su chi pertocat s’orgànicu su diretore provisòriu de sa ASSL de Carbònia Carlo Murru at ispiegadu chi sunt intrados de pagu in servìtziu 20 dotores e chi ammancant assumancus 30 infermieris e chi est intervenende pro resòlvere puru custu problema.
In Igrèsias, a pustis de 2 meses, ant acabadu is traballos de ponimentu in siguresa de sa crèsia de Santu Pio X de Serra Perdosa. S’interventu balit 90mila èuros e at permìtidu de arrangiare sa parte bàscia de cobertura, de pònnere grondas noas e assetiare is muros chi teniant dannu pro mori de s’umididade.
In Sant’Antiogu su comunu est torrende a pònnere in is pràgias sa poseidònia chi nd’iant bogadu s’istade passada pro assigurare s’amparu de sa pràgia e de s’ecosistema. Su sìndigu Nàssiu Locci at ispiegadu chi s’atzione est prevista dae sa normativa e si faghet de acòrdiu cun sa Guàrdia Forestale.
Mèrcuris in Casteddu is dirigentes de sa Sider Alloys si sunt atobiados cun is sindacados e is assessores regionales a s’ambiente e a s’indùstria chi ant assiguradu chi sa VIA (valutatzione de impatu ambientale) s’at a fàere a lestru meda a manera chi sa Giunta Regionale potzat aprovare su pianu de investimentu de sa multinatzionale isvìtzera in s’istabilimentu de Portovesme. S’assessore isperat chi su pianu de sa sienda siat pretzisu a manera chi a pustis non serbant àteras integratziones e at aciuntu chi podent incumentzare is interventos chi non tenint abisòngiu de sa VIA a manera chi torrit a crèschere s’ocupatzione in su territòriu. Un’àteru atòbiu est previstu intr’e duas cidas.
Agiornamentu de sa situatzione covid: in Carbònia is positivos sunt artziados a 84 (124 casos dae candu est incumentzada sa pandemia) ma torrat a abèrrere s’asilu de bia Dalmazia e sa Protetzione Civile Comunale ant incarreradu su servìtziu de intrega a domìciliu de is meghinas e de s’ispesa cun sa collaboratzione de sa Caritas e de Croce Rossa; in Igrèsias is positivos calant a 60 (sunt medas is negativizados) ma nd’at 24 in Nèbida chi est unu nùmeru artu meda sende chi tenit sceti 900 residentes e est incumentzadu su screening de massa de is residentes; In Gonnesa is positivos sunt 14 (custa cida 3 in prus e 1 sanadu);in Caleseda is positivos sunt 4 cun totus is pratzas de sa bidda serradas; In Sant’Antiogu is positivos sunt artziados a 22 cun su sìndigu chi at aprontadu un’ ordinàntzia chi proibit dònnia spostamentu de si 18:30 a is 5 de mangianu e de si firmare in calisisiat logu aundi si potzant formare atrupèllios de gente; in Domus Noas is positivos sunt 13 (5 negativizados ma 3 casos nous); in Portescusi 8 positivos e 2 negativizados; in Santadi in maniera ufitziale non si ischit de àteros casos novos ma pro mellus siguresa su sìndigu at donadu òrdine de serrare finas a s’acabu de su mese totus is iscolas pùbblicas e privadas de sa bidda; si signalat su primu casu in Giba. Impeuat sa situatzione de sa RSA de Nuxis: intr’e traballodores e òspites is nùmeros ufitziales narant chi is positivos sunt 43 ma fontes non ufitziales, totus de averiguare, fueddant de nùmeros prus artos e in su mentris is sindacados ant dimandadu s’interventu de su Prefetu, de sa Regione e de s’ATS pro chi intervengat a gestire una situatzione chi est perigulosa meda.
Ma arribat puru calincuna nova bona: in Villaperùciu is positivos de 15 sunt calados a 9 e in Bidda Matzarxa abarrat unu positivu sceti. Sighint a abarrare se de casos Frùmini Majori, Bugerru, Masainas e Piscinas.
Si cumprendet sa situatzione, mancai siat aumentende su nùmeru de is chi sanant, est ancora difìtzile. Duncas tocat sèmper a abarrare atentos a rispetare is normas chi conosceus totus est de importu a agiudare is personas e si famìlias chi sunt in dificultade pro more de sa maladia e massimamente non bogare boghes malas chi sunt prus dolorosas de sa maladia etotu. S’augùriu est a abarrare sèmper sanos!
A cura di Roberto Pinna
