Sa cida sulcitana in curtzu. Dae su 23 a su 29 de donniasantu
In Igrèsias, a pustis de is polèmicas intr’e s’amministratzione comunale e sa Confesercenti,dae lunis 23 at torradu a incumentzare is atividades de su mercadu de bia Pacinoti chi fiant firmas pro mori de s’apretu sanitàriu. Est prevèdiu unu nastru pro assigurare distàtnzia de unu metru intr’e is paradas e is clientes pro chi custos non tochint sa cosa; ddoi at s’òbbligu pro is paraderis de abarrare semper a guantos postos e de ddos disinfetante pro dònnia cliente; e dè si pònnere un’àteru guantu in su momentu de donare s’iscontrinu e a de pigare su dinari.
Mèrcuris 23 est intradu in su presone de Uda su de cuàturu cumponentes de sa grefa chi pagu prus de un’annu a coa in Piscinas iat lassadu isderrigadu in terra e a costas segadas unu pentzionadu de 79 annos chi ddos aiat cassados in domu circhende de nde furare su pagu dinari e sa pagu oraria chi teniat allogados. Est unu piciocu de 22 annus residente in su comunu de Nuxis chi fiat giai a is domitziliares e chi at a deper iscontare una cundanna a cincu annos de presone. Sa rapina aiat fatu ispantu mannu e fiat arribada fintzas in is televisiones natzionales pro sa violèntzia de s’atzione e pro s’edade de is “protagonistas” totus pagu prus che piciocheddos.
In Gonnesa sa giunta comunale at aprovadu su pianu de fatibilidade tècnica e econòmica pro torrare a fàere su ponte de Funtanamare chi nde fiat arrutu is primas dies de su mese de abrile. Su progetu balit in totu 1 milione e 250mila èuros e prevedit siat de torrare a fàere su ponte nou e de aderetzare sa viabilidade siat a sa ricualificatzione paesagìstica e funtzionale de sa zona chi abarrat acanta de sa pràgia. E semper in Gonnesa is ufìtzios comunales sunt aprontende is traballos in ex asilu ESMAS chi in su pianu terra at a ospitare sa caserma de is Carabineris, in su primu pianu is vìgiles urbanos e in su segundu pianu s’allògiu pro su cumandante de s’istatzione.
Mèrcuris 25 de donniasantu fiat sa die internatzionale contras a sa violèntzia asuba de is fèmminas e in Carbònia su sìndigu Paola Massidda at donadu a Silvia Mingoni chi est presidente de s’assòtziu “Donne al traguardo” is craes de s’ex asilu de Serbàriu chi at a ospitare coordinamentu de is isportellos antiviolèntzia territoriales (Giba, Santuanni, Igrèsias, Gonnesa, Portescusi e Sant’Antiogu). S’obietivu est de assigurare amparu, sustegnu, ascurtu e consulèntzia pro totus is fèmminas chi sunt vìtima de custu fenòmenu chi fintzas in logu nostru est crescende semper de prus. In Narcau su sìndigu Danilo Serra at incingiadu su monumentu chi bolit fueddare pruscatotu a is prus giòvanos pro chi cumprendant chi su rispetu intr’e òmines est fèmminas est s’ùnica àndala aundi podeus camminare e chi s’amora est libertade e non possessu.
Sàbudu e domìnigu nche fiat s’allerta arrùbia in totu s’Ìsula cun is sìndigos chi ant ordinadu de serrare totus is iscolas e is parcos pro melus siguresa ma pro bona sorte su logu nostru no at tentu s’iscònciu chi, a dolu mannu, s’est arrigistradu in Bitzi. Sceti bentu forte, calincuna nae iscosciada e calincunu allagamentu e su mare chi praticamente nd’at leadu sa pràgia de Tuerredda in comunu de Teulda.
Agiornamentu de sa situatzione covid chi parit chi si siat incumentzende a si istabilizare, sende chi su nùmeru de is chi sanant est ugualende su nùmeru is casos de positividade novos. In Igrèsias a pustis de su screening fatu cida passada is positivos sunt artziados 88; in Carbònia is casos sunt calados a 73; Santu Giuanni Suèrgiu su nùmeru de positivos at aumentadu a 18; Domus Noas is positivos sunt 15, in Bidda Matzaraxa is positivos sunt 2; in Villaperùciu de 18 chi fiant abarrant sceti 5 malàdios e 5 in corantena; in Santadi su sìndigu at fatu ischire chi intr’e casos novos e personas sanadas su nùmeru ufitziale de positivos est abarradu a 18 ma chi nc’at personas chi dd’ant comunicadu de persona sa positividade insoru; in Sant’Antiogu is positivos sunt abasciados a 18; in Portescusi contende is casos novos e is negativizados is positivos sunt calados a 6; in manera ufitziale in Perdaxus si connoschet unu casu sceti ma su fatu chi nche siant personas chi ponnint in is social network s’esitu negativu de su tampone insoru lassat pentzare chi nche siant prus positivos; nisciuna novidade dae sa RSA de Nuxis (cida passada intr’e òspites e traballadores is positivos fiant 43) chi però est circhende personale.
A cura di Roberto Pinna
