Sa cida sulcitana in curtzu. Dae su 30 de donnisantu a su 7 de mesi de idas
In Perdaxus a pustis de est 2 cidas dae is dimissiones de is 5 consilieris de minorantza e de 2 de magiorantza, est arribadu su comissàriu nomenadu dae sa Giunta Regionale: est s’ingegneri Alessandro Naitana e at a ghiare sa bidda de su Sulcis de Bàsciu fintzas a is pròssimas eletziones de beranu chi benit. S’at a votare in Carbònia puru e Giacomo Guadagnini, chi pro annos meda est istadu amministradore de su tzentru-manca at annuntziadu sa candidadura sua e aici etotu at fatu Mauro Pistis militante de su PD e istudiosu de s’istòria de sa tzitade.
Su Consìliu Regionale in s’ùrtima manovra de assestamentu de bilànciu at postu in totu 3miliones e 500 mila èuros (de custus 1.4 miliones est dinari de is fundos comunitàrios) pro incarrerare polìticas ativas pro is traballadores chi sunt abarrados in mobilidade in dèroga a segus de is vertèntzias Sider Alloys (giai 600 is traballadores interessados), Porto Canale de Casteddu e Air Italy. Cun custu dinari s’ant a podere ativare progetos formativos e mesuras ispetziales de durada limitada comente incentivos pro is siendas, indennidades pro sa mobilidade territoriale e integratziones salariales pro is chi partetzipant a atividades de formatzione e de imparu permanente.
Dae sa Regione est arribende 1 milione de èuros a su Comunu de Igrèsias chi serbint pro serrare is contos de su 2020 de Casa Serena. Custu dinari arribat una tantum, sende chi s’istrutura depet serrare su 20 de custu mese e at a serbire pro pagare 6 meses de istipèndiu a 35 OSS e pro is ispesas gestione e de manutentzione de s’istrutura. S’Amministrazione Comunale isperat pro su 2021 de pònnere a bandu su “Margherita de Savoia” aici de serrare sa chistione in manera definitiva.
Dae cida chi benit ant a èssere ativos is covid-point pro fàghere is tampones lestros in Santu Giuanni Suèrgiu, in Portescusi e in Carbònia. Su tampone non costat nudda ma ddu podent fàere sceti is chi ant a èssere sinnialados dae su pediatra o de su dotore de famìlia in s’atividade traciamentu de is cuntatos o pro identificare is sugetos positivos asintomàticos. Is interessados ant a èssere cuntatados via mail o cun su telèfunu e depent rispetare s’apuntamentu pro chi non si formint atrupèlios perigulosos. In prus dae mèrcuris in sa ASSL de su Sulcis-Iglesiente ant ativadu una unidade USCA (cumposta dae 4 dotores e un’infermiera e at èssere ativa dònnia die) pro su survegliàntzia sanitària de is malàdios de Covid asintomàticos chi sunt in istruturas pro antzianos, domos amparadas e RSA.
Cenàbara in Sant’Antiogu su sìndigu Nàssiu Locci at firmadu s’acòrdiu de collaboratzione con s’Assessoradu regionale su Turismo chi previt atziones de avaloramentu e promotzione in su setore del turismo identitàriu, culturale e religiosu. Duncas Sant’Antiogu bessit unu logu de “Destinatzione e Pellegrinàgiu” in paris a àteras 6 comunos sardos (Garteddi, Gèsturi, Durgali, Orgòsolo e Logusantu) intrat in manera ufitziali in su Registru de is Camminos e de is logos de pellegrinàgiu de Sardigna. In bonas sustàntzia cun sa firma de sa protocollu is amministratziones interessadas si impegnant a collaborare e a fàere “retza” in manera de aprontare una segnalètica uniforme e donare servìtzios de sustegnu a is camminadores in totus is tapas. In prus s’at a istèrrere una strategia de comunicatzione de tipu europeu e at isfrutare totus is canales disponìbiles (situ internet, social network, app).
Agiornamentu de sa situazione covid in su territòriu chi dae is datos disponìbiles parit chi siat ancora istàbile: cantu nde sanant si-nde amaladiant. Però a dolu mannu si registrat unu rallentamentu de is comunicatziones dae s’ATS a is sìndigos e fintzas intr’e s’autoridade sanitària e is tzitadinos etotu chi invècias fiant andende bene meda in is ùrtimas cidas.
Impeuat su contu Igrèsias: infatis is ùrtimos datos narant chi is positivos sunt 107 (+19); aici etotu in Santu Giuanni Suèrgiu e in Villaperùciu chi artziant a 23 (+5) e a 11 (+6); praticamente costante su datu de Portescusi (6), Domus Noas (14) e Sant’Antiogu (19); dae Santadi, Narcau, Perdaxus e Masainas nisciuna novidade ufitziale però is sìndigos ant fatu serrare is iscolas pro mellus siguresa. Fontes non ufitziales narant chi totus is tampones fatos a su personale de sa RSA de Nuxis ant torradu èsitu negativu e de siguru custa est cosa bona e s’ispera est chi bengat cunfirmada a lestru; novas bonas siguras invècias dae Carbònia cun is positivos chi dae 73 sunt calados 39 e dae Teulada aundi sunt sanados is 3 positivos presentes in su territòriu comunale.
Is racumandatziones sunt semper uguales: mantènnere sa distàntzia de siguresa, mascaredda semper avutu e a istraviare is atrupellios; si ddu podeus fàere depeus donare una manu de agiudu a is famìlias aundi at fertu sa maladia. Comente sèmper s’augùriu est a abarrare sanos!
a cura di Roberto Pinna
