Sa cida sulcitana in curtzu. Dae s’11 a su 17 de gennàrgiu
Lunis is Carabineris de su NAS a sunt andados a su CTO de Igrèsias pro averiguare a comente sunt allogadas is fialas de su vacinu anticovid e controllare s’elencu cun su nominativu de is vacinados. A su chi parit, custa atividade est rechesta dae su Ministeru de sa Salude e non est delegada dae sa Procura e sichei no ddoi iat a deper èssere nisciuna relatzione cun sa denùntzia chi at presentadu su segretàriu de sa CISL-FP a pitzus de sa mancàntzia de su rispetu de sa prioridade in sa vacinatzione.
In su mentris sighint is polèmicas pro sa gestione de s’emergèntzia sanitària in logu nostru: cenàbara 15 s’est fata riunione de sa cunferèntzia sotzio-sanitària de su Sulcis cun sa presèntzia s’assessore regionale a sa sanidade Mario Nieddu e sa diretora de s’ispidale Sirai Giovanna Gregu. A is chèscias de is sìndigos sulcitanos pro sa mancada ativatzione de su centru covid in Igrèsias, s’assessore Nieddu at arrìspùndiu ghetende is curpas su commissàriu istraordinàriu natzionale Domenico Arcuri. Po su chi pertocat is ritardos mannos in sa comunicatzione de is eventos acuntèssidos in su periodu de is festas (tres reparrtos tancados pro mori de is cuntàgios) sa diretora Gregu at nadu chi su personale s’est impegnadu meda pro circare de gestire sa situatzione e chi nche sunt istados meda tampones chi ant torradu s’èsitu negativu farsu ma no at cunvintu is sìndgos chi ant torradu a dimandare su potentziamentu de su presìdiu. In su mentris su NAS at fatu ispetzione in s’istrutura de Carbònia e ancora no est funtzionende su machinàriu pro protzessare is tampones fatos in su Sulcis chi duncas sighit a dipèndere dae is laboratòrios de Casteddu, custu mancai is consilieris regionales Ennas e Usai iant fatu s’annùntziu de s’acreditamentu prus 2 meses a coa.
A pustis de meses de protestas de is Amministratziones Comunales is ufìtzius postales chi si agatant in Piscinas, Nuxis e Tratalias dae su 19 de gennàrgiu torrant a s’oràriu de abertura pretzedente a su covid e duncas ant a essi abertos a totu cida, intamu de abarrare abertos sceti 3 bortas a sa cida, fatu chi causada istrobu mannu pro is tzitadinos chi depiant abarrare oras abetende su turnu istrantàrgios e in foras in mesu de s’àcua e de su bentu.
In contu de tempus malu ormai est unu mese e mesu, francu calincuna die de sole, chi est proende dònnia die: is arrios sunt calende allirgos e sa diga de Montepranu est bessende dae 10 dies e sunt acanta de prènnere su Lago Corsi e sa diga de Bau Prèssiu. Duncas si podit nàrrere chi assumancus pro un’ateru annu su territòriu no iat a deper sunfrire sa sitzidade. Fatu istat ca, a pustis de 2 annus e prus, no ant ancora arrangiadu sa pèrdida in sa condota de fronte a su muraglione de Montepranu e miliones de metros cubos de àcua sighint a andare a mare. E in prus nche de nàrrere chi totu cust’àcua est incumentzende a causare problemas po sa produtzione agrìcola: sa terra est satzada e non faghet a prènnere opuru is semèntzas sunt incumentzende a purdigare e sa canciofa est lissiende-sì. Duncas is assòtzios de categoria sunt incumentzende a si mobilitare pro dimandare risarcimentos.
Agiornamentu de sa situatzione covid chi a su chi parit dae is ùrtimos datos disponìbiles est est andenda avatu a su trend regionale a natzionale. In Sant’Antiogu is positivos sunt 15 e ndi abarrant 3 in s’ispidale; in Santu Giuanni Suèrgiu e in Domunosa sunt 10; 7 in Musei; 5 positivos e 8 in corantena in Giba, 5 positvos in Masainas; 2 positivos e 2 in corantena in Bidda Massàrgia; sighit su screening de massa in Narcau ant partetzipau prus de 1000 personas e ant agatadu sceti 2 positivos; 1 positivu sceti in Bugerru. Aumentat a 18 is casos in Portescusi. Ancora est difìtzile meda sa situatzione in Villaperùciu: custa cida puru is positivos sunt 33 e duncas cantu nde sanant si-nde ammaladiant (3 sunt ricoverados). Su sìndigu Antonello Pirosu at fatu ischire chi sa parte prus manna de is positivos est cuntzentrada in pagos nùcleos familiaris chi sunt asuta de su controllu costante de s’autoridade sanitària. Chini iscriet custa rubrica no at agatadu informatziones pro Carbònia e Igrèsias.
In su mentris est andende a innantis sa campagna de vacinatzione de su personale sanitàriu de sa ASSL de Carbònia: sàbudu e domìniga passados 20 operadores, cun sa presèntzia de unu rianimadore e un’ambulàntza, isfrutende is salas ampras de su cìnema multisala de Igrèsias, in siguresa perfeta ant fatu s’inietzione a 80 personas a s’ora, pro unu totale de prus de 1000 personas. De siguru custu est unu bellu signale de isperàntzia pro torrare a sa normalidade.
Is règulas de distantziamentu sotziale ddas conosceus totus e non serbit a ddas ripìtere, invècias est pretzisu s’agùriu de abarrare semper sanos!
a cura di Roberto Pinna
