Sa cida sulcitana in curtzu. Dae su 18 a su 24 de gennàrgiu
Custa cida puru, francu che una pariga de dies de sole, at sighidu su tempus malu e is amministratziones comunales de su Sulcis de Bàsciu sunt incumentzende a regòllere is segnalatziones de mandare a sa regione pro otènnere unu risarcimentu, semper chi sa RAS pongat su dinari. Duncas a is chi sunt interessados ddis cumbenit a castiare is sitos istutzionales de is comunos in ue risidientint a manera de si informare pro presentare sa dimanda. A su chi parit est torrende a partire sa blue tongue: su servìtziu veterinàriu de sa zona sud de sa ATS at agatau in territòrios de Santadi, S. A. Arresi e Teulada unas cantu pegos infetos de unu sierotipu nou chi non donat sintòmos. Duncas totus is sìndigos in su giru de 20 km ant ordinadu de non mòvere su bestiàmine e si ddu podent fàere de ddu lassare inserradu in su mentris chi is veterinàrios de sa ATS ant a andare in is siendas pro averiguare sa situatzione.
S’Amministratzione Comunale de Igrèsias at aprovadu su progetu esecutivu pro modernare s’impiantu de lughe pùbblica in sa fratzione de Nèbida e in prus s’ant cuncordare is palos in d-unas cantu puntos chi no nde teniat. In totu is traballos balint 245mila èuros e cun is lughes a LED ant a permìtere siat de risparmiare energia sia una illuminatzione prus crara e pretzisa.
Mèrcuris 20 in Sant’Antiogu, faci a sa una de note, gente male intraniada at postu fogu a is mezos de su corpu forestale marìtimu: distrutas tres veturas pick-up e una barca. Is Carabineris sunt indaghende: si pentzat chi custu atentadu (ant agatadu innescos e unu acendinu) in calincuna manera nc’intrit cun s’atvidade de controllu chi est faende sa Guàrdia Forestale chi at arricidu sa solidariedade de s’assessore regionale a s’ambiente Gianni Lampis e de su sìndigu de Sant’Antiogu Nàssiu Locci .
Una de is pagas novas bonas est chi cenàbara 22 s’est scìpidu su servìtziu de dialisi de adenote no at a serrare de s’ispadale Sirai: infatis ant pigadu àteros duos infermieris e su servìtziu at a sighire. Medas saludant custu fatu che una grandu bìnchita fata dae s’impegnu de totus est de siguru est cosa bona, sa cosa mala est istada sceti a pentzare de tancare unu servìtziu chi est cunsideradu una prenda a livellu regionale e natzionale e siguramente, si no est chi si corbat àteru dinari, ant a tancare o ismegnuare calincunu àteru servìtziu. In su mentris s’assessore Mario Nieddu at fatu ischire chi su tzentru nàschidas de su CTO at torradu a otènnere sa dèroga dae su Ministeru de sa Salude e sighit a abarrare abertu.
Semper cenàbara in videocunferèntzia si sunt atobiados is assessores regionales a s’Indùstria e su Traballu Anita Pili e Alessandra Zedda, sa sutasegretària s’Isvilupu Econòmico Alessandra Todde, is rapresentantes de Eurallumina e de s’Enel cun is sindacados pro resonare a pitzus de s’iter legislativu chi at a permìtere a s’ampiantu de produtzione de allumìniu primàriu de torrare a partire. Is sindacados ant decraradu de èssere satisfados ma dimandant unu cronoprogramma chi siat funtzionali a sa torrada in funtzione de s’impiantu, sa rapresentante de su Guvernu at assiguradu chi is infrastruturas netzessàrias pro modernare is impiantos sunt de interessu istratègicu natzionale e ant a esser postas in sa legislatzione natzionale. Si is cosas ant a andare bene, pro su 2023 s’impiantu at a torrare a incumentzare a traballare.
Est sighende a andare bene su Carbonia Calcio in su campionadu de Serie D: domìnga at bintu 2 a 0 in domu (in s’istàdiu de Santadi) contras a su Muravera. A pustis de 13 giorronadas est a sola a su de ses postos cun 20 puntos cun una partida de recuperare.
Agiornamentu situatzione Covid in su territòriu. A pustis de unas cantu cidas cun su nùmeru de cuntagiodos chi fiat bastante bàsciu, su sìndigu de Igrèsias at fatu ischire chi ddoi at 79 residentes positivos, de custos 7 sunt arricoverados e 54 personas sunt in corantena. Parit chi si siat firmadu su contàgiu in Villaperùciu: su totale de is casos esta curtzu de 80 ma is positivos sunt calados a 29 e ant torradu a abèrrere is iscolas ma sa bidda su Sulcis de Bàsciu, sigundu is datos pubblicados dae ISS-Epicentro, in is duas cidas passadas s’incidèntzia prus arta de totu sa Sardigna e tenit, raportadu a su nùmeru de residentes, su totale prus artu de su Sulcis. In Narcau, sighit ancora su screening de massa cun tampones lestros ma in su mentris ant torradu a serrare is iscolas fintzas a s’acabu de su mese. In Portescusi a su 18 de gennàrgiu is casos sunt aumentados a 28, sa nova bona est chi is tampones fatos a is iscolanos e dotzente ant torradu totus èsitu negativu. In Santu Giuanni Suèrgiu is positivos sunt 11 (3 sanados e 5 casos nous), 6 in Musei, in Domunosa ndi abarrant sceti 7.
Duncas a su chi parit in logu nostru su covid-19 est andende paris cun su trend regionale e natzionale. Est dovere de totus a rispetare totus is règulas de distantziamentu sotziale proita a cassare sa maladia est unu momentu e sa situatzione podit torrare a impeuare a lestru meda. S’agùriu, comente dònnia borta, est a abarrare semper sanos!
a cura di Roberto Pinna
