Sa cida sulcitana in curtzu. Dae su 25 a su 31 de gennàrgiu
Su comunu de Gonnesa aiat firmadu sa cunventzione cun sa Diretzione generale de sa Protetzione Civile pro fraigare unu ponte ràdio interoperàbile e martis 26 ant incumentzau is traballos pro cuncordare in su tzentru operativu de Pratza de su Minadore un’istatzione ràdio chi at a assigurare una cobertura ràdio de su territòriu prus ampra e prus sigura.
Mèrcuris 27 est istada una die de tristura manna: s’est ispaciadu don Giampieru Maròngiu chi fiat su preide de sa parròchia de Santu Nicolau de Santadi. A don Giampiero, chi fiat omìne allirgu e amàbile, ddi praghiat meda a abarrare in mesu de su gente e pro sa gente e infatis teniat fueddos bonos pro totus e fiat semper prontu a donare una manu de agiudu a is prus pagu assortados. Don Giampiero, chi si nd’est andadu a 52 annos sceti, lassat unu vacuu mannu meda in comunidades de Santadi e de Narcau (fiat originàriu de Arriu Murtas) e in totu su Sulcis.
Su 28 de gennàrgiu in su museu archeològicu Ferruccio Barreca de Sant’Antiogu ant incumentzadu a somministrare is test sierològicos a su personale de su comunu e a unu grupu de cummertziantes (150 personas in totu). Custu est possìbile proite chi s’Amministratzione Comunale at aderidu a sa retza de solidariedade sotziale “Ad Adiuvandum”. S’iscopu de s’initziativa est de traciare sa circulatzione de su virus individuende sugetos asintomàticos in is categorias de sugetos chi assigurant servìtzios essentziales.
Sa fibra ultra-lestra arribat in Igrèsias: su 29 de gennàrgiu s’Amministratzione Comunale cun sa sienda Open Fiber ant firmadu s’acòrdiu chi prevedit de istèrrere 36 kilòmetros de cavu chi ant a permìtere de cunnètere 6.500 unidades immobiliares pro un’investimentu totale de 1.8 miliones de èuros. Invècias su comunu de S. G. Suèrgiu at aderidu a sa progetu “Piazza WiFi Italia”, su progetu de su Ministeru de s’Isvilupu Econòmicu chi permit a totus in tzitadinos de si cunnètere a in donu iscarrighende una APP po su telefoneddu. Sa zona interessada est e sa chi abarrat a giru de sa pratza de su munitzìpiu. S’amministratzione de Giba invècias at presentadu a is citadinos sa APP pro is telefoneddos “My Sindaco” che permitit siat de arritzire in su telefoneddu, pro mèdiu de una notìfica in su telefoneddu, novas de utilidade a pitzus de is bandos, initziativas, avisos pùbblicos siat de comunicare diretamente cun is amministradores mandende dimandas e signalatziones diversas.
Cenàbara est essida sa nova chi su Guvernu at suspèndidu sa fornidura de armamentos a s’Aràbia Saudita e is Emirados Àrabos Unidos. Sunt cuntentas meda is ONG pacifistas, ma si nascint dudas mannas a pitzus de su benidore de is traballadores de sa fàbbrica RWM de Domunosa. Infatis sa produtzione est praticamente firma cun 90 traballadores in cassa integratzione e 80 cuntratos non rennovados s’istade passada. Confindustria Sardegna est contrària a custa decisione, su sìndigu de Domunosa fait presente chi totus is àteras fàbbricas de su setore de sa difesa sighint is atividades produtivas, is sindacados dimandant de connòschere cale siant is alternativas pro is traballadores e pro is famìlias insoru.
Sighit a andare bene meda su Carbonia Calcio: domìniga 31 s’iscuadra ghiada dae Marco Mariotti at bintu 2-0 in Afragola e est artziada a su de 5 postos in sa classìfica chi a pustis de 14 giorronadas est pighende sètiu.
Agiornamentu de sa situatzione covid-19. Eus passadu sa primu cida in zona in colore de aràngiu a pustis de su declassamentu fatu in s’ordinàntzia de su ministru Speranza de su 23 de gennàrgiu ma, a su chi parit, is datos sunt sighende a ammelliorare in logu nostru e in totu s’Ìsula. Sa dimanda est custa: si is datos sunt “bonos” proite sa Sardigna at mudadu de colore? Fortzis una resposta, partziale meda, si podet agatare in is chèscias de is sìndigos de Domunosa e Giba: su primu at sinnialadu ca sa ATS at comunicadu in s’elencu de is positivos puru personas mortas o giae sanadas e su segundu at fatu a presente ca sa ATS trigat a meda a mandare a mandare agiornamentos. In Villaperùciu sa situatzione est mudende in bene: su nùmeru de is positivos est caladu a 9 ( sceti 2 cidas a coa fiant 33) e sunt andende bene puru is comunos de s’arcipèlagu: in Carloforte: abarrant 6 positivos, in Caleseda 3 e 4 in Sant’Antiogu. Sunt istàbiles is datos de Portescusi (28 positivos), de Santu Giuanni Suèrgiu (12 positivos) e de Piscinas (7 positivos), Giba (5 positivos). A dolu mannu tocat a sinnialare s’aumentu de Santadi: 9 casos e 12 in corantena cun 3 ricoverados.
S’augùriu, comente dònnia borta, est de abarrare sanos, sa racumandatzione est de rispetare is normas chi totus connosceus ca sunt sa mellus manera de firmare su covid-19.
Roberto Pinna
