Sa cida sulcitana in curtzu. Dae su 1 a su 7 de friàrgiu
Lunis a merie su sìndigu Sant’Antiogu Nàssiu Locci in pari a sa consiliera Rosalba Cossu chi tenit sa dèlega a sa pùbblica istrutzione an pinnigadu in sa sala consiliare 16 istudentes chi s’istadi passada ant acabadu su percursu de s’iscola mèdia cun su votu de 10 decimos (e unas cantu ant tentu puru sa lode). A doniunu ant arregaladu 2 testos stòricos a pitzus de s’istòria de Sant’Antiogu (“Il profumo del Ginepro” e “il profumo della Storia”) e una pergamena aundi ddoi fiant is cumplimentos pro su resurtadu insoru e a s’invitu a sighire a camminare in s’àndala de s’istùdiu e de s’impegnu.
Custa cida passada at fatu unas cantu dies de tempus bellu e duncas is algerinos sunt torrados a arribare a tropas in su Sulcis. Mèrcuris 3 a primu note ant fatu su primu isbarcu de su 2021: 18 personas sunt lòmpidas deretas a Sant’Antiogu e unas cantus fiant andendesi-nde a pee. Pustis at sighidu a arribare gente fintzas a cenàbara a chitzi mannu in is pràgias de Teulada e S.A. Arresi. Su totale de custa undada est de 94 personas, nci fiant puru 7 fèmminas e 1 de custas, sende prìngia, dd’ant arricoverada a in su CTO de Igrèsias. Is Carabineris de sa Cumpangia de Carbònia nde-ddos ant pinnigados e lòmpidos a su tzentru de collidura de Muristenis pro incarrerare is protzeduras de identificadura e espulsione.
Dae giòbia 4 de friàrgiu, Andrea Pisanu chi est su sìndigu de Giba, est su presidente nou de s’Unione de is Comunos de su Sulcis e e pigat su postu de Ivo Melis (Masainas). In sa Giunta de s’Unione intrant puru Massimo Impera (Santadi), Teresa Diana (S.A.Arresi), Pier Andrea Deias (Nuxis) e Marco Piras (vicesìndigu de Tratalias). Pisanu at decraradu chi bolet provare a realizare una Unione prus cuncreta massimamente pro is servìtzios a benefìtziu de is tzitadinos de su territòriu mancari s’Unione de is Comunos non tengat personale e nemancu dinari.
S’amministratzione comunale de Carbònia cun sa deliberatzione de Giunta Comunale n. 148 de su 3 de donniasantu passadu, aiat detzìdidu de afortiare sa presèntzia sua in su mundu de is social network cun s’iscopu de informare sa gente ma fintzas pro arricire sinnialatziones, cuntzillos e fintzas crìticas in trasparèntzia màssima, a manera de si pòdere acostare is tzidadinos massimamente is prus giòvunos. Duncas a dae su 4 de friàrgiu sunt ativos sa pàgina facebook, unu canale Telegram, unu Instagram e unu YouTube aundi s’ant a trasmìtere in direta is setziadas de su consìliu comunale. In Igrèsias s’amministratzione comunale at bintu su bandu ANCI “Fermenti in Comune” e cun s’assòtziu EnneDue A.S.D. s’at a realizare su progetu “Enne2 Music Lab” chi prevedit de realizare un’istùdiu de registratzione musicale, un emitente radiofònica e percursos de istùdiu e formatzioni in is impiantos isportivos de via Toti.
No abastaiat su problema de is traballadores de sa RWM, cun is sìndigos de sa zona de Igrèsias e de su Cixerri chi sunt dimandende chi sa fàbbrica de Domonosu siat posta in sa lista de is fornidores de su Ministeru de sa Defensa pro sarvare su livellu ocupatzionale, in su territòriu si aberrit un’àtera vertèntzia: is sindacalistas de sa SOTACARBO, 0sotziedadi partecipada de sa Regione e ecellèntzia internatzionale in sa circa scentìfica, su 5 de friàrgiu ant proclamadu su sciòpiru a oltràntzia proite chi sa Regione no est arrispetende is impegnos chi aiat pigadu 3 meses a coa. Infatis sa RAS no at ancora nomenadu su tertzu membru de su CdA e sa cunvocatzione de s’assemblea de is sòtzios po mudare s’assetu sotzietàriu. Sigundu is sindacados custa situatzione at praticamente firmadu totus is atividades de circa e ponendi in perìgulu is istipèndios de su mese de martzu e su benidore de sa sienda etotu.
Agiornamentu de sa situatzione covid. Ormai sa tendèntzia de is cuntàgios, s'ispera est chi no acuntessat nudda cun s’abertura de is iscolas superiores in presèntzia, sighit a anadare conca a bàsciu in logu nostru puru. E duncas in Bidda Massàrgia, Giba, Piscinas e Masainas no ddoi at prus mancu unu casu e nemus in corantena. In Villaperùciu abarrant sceti 3 positivos, 4 in Santu Giuanni Suèrgiu, 2 in Gonnesa, 1 in Sant’Antiogu. In Portescusi nd’at sanadu 15 e duncas is positivos sunt 13, in Musei torrant a artziare a 3 ma sa nova bona est chi is 110 tampones lestros chi ant fatu a is iscolanos e dotzentes ant torradu totus èsitu negativu; aumentant is casos puru in Domunosa (+3). Iscolas serradas pro una cida e giai sanificadas in S.A.Arresi e in Teulada (aundi ddoi at 3 positivos).
Duncas is progressos sunt craros, ma tocat semper a abarrare atentos proite ca bastat unu momentu pro torrare a segus. Duncas sigheus a rispetare is normas de distantziamentu sotziale e a oberare sa mascaredda candu seus in logu serradu. S’àuguriu est semper su matessi de dònnia cida: abarrade sanos!
Roberto Pinna
