Sa cida sulcitana in curtzu dae su 8 a su 14 de friargiu
Dae lunis 8 sa biblioteca de Narcau at addopiadu s’oràriu po su pùbblicu passende dae 9 a 18 oras a sa cida e at a essere abertu dae lunis a cenàbara; invècias dae lunis 16 at abertu torra sa biblioteca de Igrèsias sigundu is oràrios sòlitos ma tocat a prenotare su servìtziu e pro imoi abarrat firmu su prèstidu interbibliotecàriu ma ant a èssere disponìbiles fintzas is letores e-book cun sa funtzione de letura automàtica chi est aina pretziosa po is personas chi non bident.
Martis 9, a meigama, su consilieri regionali de su PSdAz Fabio Usai in sa pàgina Facebook, cosa sua cumbidat RAS a assumere sa responsabilidade de rispùndere a is esigèntzia de is traballadores sa SOTACARBO nomende su presedente de su CDA e pighende sa magiorantza de is cuotas atzionàrias. A ora de scurigare semper Fabio Usai at annuntziadu chi sa Regione aiat individuadu sa persona giusta: est s’ingegneri Mario Porcu, 71 annos, manager cun esperièntzia longa meda, chi est istadu diretore de Carbosulcis, presidente Consòrtziu Industriale de Portovesme e fintzas consilieri comunali in Carbònia. Imoi su presidente nou depet afrontare s’isfida de afortiare sa sienda de circa scentìfica dae unu puntu de vista finantziàriu e industriale.
Si non s’ant a rinviare, beranu chi benit si votat pro is eletziones amministrativas in 5 comunus de su Sulcis. Sa situatzione in Carbònia est pagu crara. Non si ischiet ita at a fàere su tzentru-dereta traditzionale, su M5S iat a deper torrare a candidare Paola Massidda ma no est ancora ufitziale, sa dirigèntzia de su PD est partzida intr’e chini bollet fàghere unu ragrupamentu de tipu cìvicu ampru meda (ponende in mesu fintzas su grupu de s’onorevole Usai) lassende foras is dissidentes chi 5 annos a coa iant contribuidu a fàgher pèrdere a Giuseppe Casti e chini bollet organizare unu grupu prus sìmbili su tzentru-manca traditzionale. In Perdaxus est siguru, assumancus pro imoi, chi si candidat a sìndigu Giacomo Santus, chi fiat vicesìndigu candu is consilieris de opositzione prus 2 de sa magiorantza nd’ant sciusciadu a Gianfranco Trullu, chi s’at a cunfrontare cun Gianluigi Loru. In Santu Giuanni Suèrgiu si torrat a candidare Elvira Usai chi a su chi parit iat a deper afrontare a Eloise Carboni chi est consiliera de opositzione. Boghes totus de cunfirmare narant chi in Narcau no dda torrat a tentare Danilo Serra, ma a ghiare su grupu chi dd’at sustènnidu in custos annnos iat a deper èssere sa dotora Maria Rosa Montixi chi iat a deper isfidare su professore Giovanni Maria Lai. Nisciunu nòmine est bessidu a pillu pro su chi pertocat Villaperùciu e Masainas ma est siguru chi Antonello Pirosu e Ivo Melis de chi ant fatu tres mandados ant a lassare sa polìtica ativa.
Sa Sardigna sighit a abarrare zona groga, e a su chi si narat, a lestru iat a poder èssere inderetura zona bianca, cun palestras, cinèmas e totus is logus de sa cultura abertus. Duncas is gestores de unas cantu sitos turìsticos de importu de su territòriu sulcitanu sunt incumentzende a si organizare: infatis sa Cooperativa Sémata (sistema museali de Santadi), s’assòtziu Villa Connesa (Nuraghe de Seruci in Gonnesa), sa coop. Start Uno (Tèmpiu de Antas e su Molinu a Àcua in Frùmini Majori) e Antarias (Casteddu de Àcua Frida in Silìcua) ant agatadu un’acòrdiu pro donare un’iscontu a pitzus de su billetu pro is bisitadoris chi detzidint de bisitare prus de unu situ a intrus de s’annu 2021. S’iscopu de s’initziativa, chi pronit un’oferta culturale chi permit pònnere infatu a su camminu de s’umanidade dae su neolìticu fintzas a s’edadi moderna, est su de criare una retza chi assigurat prus visibilidade a totus is sitos fintzas incarrerende atziones de propaganda comuna.
Ancora novas bonas dae su fronte covid-19. Portescusi, Sant’Antiogu, Piscinas e sunt torrados a zeru, 1 sceti in Villaperùciu, in S.A.Arresi su munitzìpiu fiat serradu po mellus siguresa de chi is tampones lestros iant torradu esitu positivu pro 3 personas ma is tampones molecolare at torradu èsitu negativu e duncas mancu inias no nc’at nisciunu casu. Torrat a comunicare, a pustis de tres meses, su sìndigu de Nuxis: is casos efetivos de positividade sunt sceit 3 e non prus de 20 a comente naràiant is sòlitos bene informados. Su sìndigu de Carbònia at fatu ischire cida passada ca ddoi at 31 casos positivos (12 novos e 29 sanados).
Sa situatzione est ammelliorende semper ma si torrat a abarrare atentos proite ca est unu momentu a torrare a segus. Sigheus a rispetare is normas de distantziamentu sotziale e a oberare sa mascaredda candu seus in logu serradu. S’àuguriu est semper su pròpiu: a abarrade sanos!
De Riberto Pinna
