sa cida sulcitana in curtzu
Polèmicas In Igrèsias proite ca nd’ant sciusciadu unu ponte de sa ferrovia chi propassaiat sa SS126 a pagu tretu de Bindua. Gente meda at nadu chi sigumente chi fiat unu ponte antigu depiat èssere amparadu e avaloradu. Su sìndigu Mauro Usai est intervènnidu ispieghende chi su ponte dd’aiat fatu in is annus 70 e chi fiat perigulosu de diaderus e chi fiat meda prus cumbeniente a ddu sciusciare (de chi su sìndigu iat fatu un’ordinàntzia e iat iscritu puru a sa Prefetura e a sa Procura de sa Repùbblica) chi non a provare a ddu pònnere in siguresa. Su ponte “antigu” diaderus esistit ancora e me inias nche passat su Camminu de Santa Bràbara.
In Sant’Antiogu est acanta de acabare su primu lotu de is traballus in su ponte de atzessu. In totale s’inverventu balit 1 milione e 300mila èuros e prevediat de nde torrare a carrargiare su ferru, su sgavu e s’impermeabilizatzione de is plintos, de torrare a fàere is iscàrrigos de s’àcua pròina, e in prus nd’ant a bogare is tubos de sa condota de s’àcua chi non sunt prus oberados dae annos meda: custu at a permìtere de bogare 30 tonnelladas de càrrigu dae su ponte.
In Perdaxus is candidados a sìngius pro is eletziones de beranu chi benit ant a èssere tres: infatis a Giacomo Santus e a Gianluigi Loru si aciungit s’abogadu Luca Argiolas chi est presidente de su consòrtziu industriale de Biddacidru. In Narcau is listas sunt semper duas ma est s’abogau Antonello Cani chi at a isfidare sa dotora M.R. Montixi. Fatu bastante curiosu chi in Villaperùciu e in Masainas no est essidu a pillu niscinu nùmene. In Carbònia invècias Luca Pizzuto, ex consilieri regionale de Art.1, anuntziat chi si candidat a sìndigu circhende de nde pesare una coalitzione de tzentru-manca traditzionale; invècias su sìndigu Paola Massidda de su M5S at fatu ischire ca non tenet bidea de si torrare a candidare; su grupu chi tenit a riferimentu a su consilieri regionale de su PSdAz Fabio Usai est traballende pro unu polo tzìvicu chi non castit a su colore de is partidos.
Ormi a su chi parit est una costante: custa cida puru sunt arribados algerinos in sa costa sulcitana: sàbudu a merie 10 personas sunt arribadas a su portu de Ponti iscortadas dae sa Guàrdia de Finantza chi iat interzetadus sa barchita ai largu meda de su s’ìsuledda de su toru. Comente semper nche-ddos ant lòmpidos a su tzentru de collidura de Muristenis pro incarrare is protzeduras de identificadura e de espulsione.
Sàbudu in Pramas est istadu unu merie de prexu mannu po is piciocheddus: infatis ant intregadu s’àrea giogos fata de bellu e nou e chi abarrat pròpiu a s’intrada de sa biddixedda chi est fratzioni de Santu Giuanni Suèrgiu. Unas cantu meses a coa is piciocheddos de Pramas iant mandadu una lìtera a s’amministratzione comunale dimandende unu logu aundi essint pòtziu giogare in siguresa e ddos ant acuntentados. Su parcu dd’ant incingiadu rispetende is normas anticovid, e s’Amministratzione isperat chi su controllu sotziale nche stèsit eventuale atziones de pagu tziviltade e rispetu de s’òpera proite chi is giogos sunt de totus is pipios e chini faghet dannu ofendit siat is prus minoreddos siat is mannos.
Agiornamentu de sa situatzione covid. In su mentris chi sa Sardigna intrat in zona bianca arribat sa nova chi sa variante ingresa de su SARS-CoV-2 est arribada fintzas in su Sulcis: unu casu dd’ant agatadu in Gonnesa (4 casos de positividade in totu e iscolas mèdias serradas pro siguresa) e fintzas in Igrèsias (si tratat de unu giòvanu chi istudiat in s’iscola de is Carabineris) aundi su sìngidu at donadu s’òrdine de tancare s’Istitutu Mineràriu sende ca in d-una classe de 25 ddoi fiant 15 istudentes cun is sìntomos. In Carbònia is cuntàgios artziant a 55 (+12 custa cida e 16 sanados) e in su mentris su sìndigu at fatu ordinàntzia chi serrat totus is distribudores automàticos h24 de is 6 de merie a is 5 de chitzi e at proibidu sa bèndida de alcol de asportu de is 18 a is 22. In Portescusi is casos nous sunt 5, in Carloforte 1 positivu e 14 in corantena; In Santadi, dae su Comunu, ant fatu ischire in maera NON ufitziale chi is positivos sunt torrados a zero.
A contos fatos sa situatzione at ammellioradu ancora e seus intrados ufitzialmente in zona bianca, est unu signale bonu pro totu sa terra nostra. Custu non bolet nàrrere chi seus lìberos: depimus sighire a rispetare is règulas de distantziamentus sotzialie, a istransire is atrupèllios de gente e a portare semper avatu sa mascaredda, proite chi a torrare a segus est unu momentu. S’augùriu, comente semper, est de abarrare sanos!
