SA CIDA SULCITANA IN CURTZU. Dae su 1 a su 7 de martzu
Lunis est incumentzada sa distributzione de Sardinia Plays the Blues, su DVD chi at bòfidu realizare s’assòtziu Progetto Evolutzione chi dae 30 annos organizat su Narcao Blues, su festival chi fàghet arribare in sa bidda de su Sulcis de Bàsciu is mellus musicistas de su gènere. Su DVD, chi est totu “Made in Sardinia”, est deretu a is organizadores de is festival musicales europeos e americanos e a is agentzias de promotzione turìstica. S’iscopu est de promòvere 6 grupos de artistas sardos (Vittorio Pitzalis one man band, sa còpia Don Leone, su Bad Blues Quartet, is King Howl, sa band de Francesco Piu e sa de Irene Loche) chi ant sonadu in 6 de is logos prus bellos e interessantis de su territòriu nostru (Porto Flavia, sa Necròpoli de Montessu, sa Miniera de Rosas, is Grutas de Santu Giuanni, sa Cantina Mesa e su Nuraghe Seruci). A lestru is vìdeos, chi sunt de cualidade arta meda, ant a èssere a disponimentu in totus is canales social de su Narcao Blues.
Custa cida puru, ormai no est prus mancu una nova, 2 isbarcos de migrantes (iant a deper èssere algerinos) su Sulcis: sàbudu a mangianu sa Guardia Costera at intertzetadu una barchita cun 13 personas (in mesu de custas nci fiant 3 pipios e una fèmina) a largu de su Cabu de Sant’Antiogu e a meigama is Carabineris ant firmadu 3 personas apaenas lòmpida in sa pràgia de Porto Pino. Comente dònnia borta is Carabineris nche-ddos ant lòmpidos a su tzentru de collidura de Muristenis pro incarrerare is protzeduras de identificadura e de espulsione.
Nc’at prexu mannu in Igrèsias proita ca su Geoparco at deliberatu de comporare “Collezione Manunta” chi est un colletzione chi contat prus de 4600 mineralis chi arribant dae totu su mundu. Duncas sa colletzione at a abarrare a dipsonimentu de sa tzitade e de totu su territòriu e si podet trasformare fintzas in d-una atratzione pro is amantiosos de sa mineralogia.
Nc’at unu servìtziu nou in su campusantu de Sant’Antiogu: funt a disponimentu de totus iscovas, pallitas e arrosciadoris: abastat a nci ponnère un’èuro pro cautzione candu si pigat s’aina e candu custa si-nche torrat a su postu suo s’utenti torrat a nde leare sa muneda. E in sèmpiri in Sant’Antiogu giòbia passadu su sìndigu Nàssiu Locci cun s’assessora a su turismu Roberta Serrenti e Joseph Ejarque chi est espertu de destinatziones turìsticas ant presentadu su pianu stratègicu pro su turismu 2021-2023: custu pianu non bolet lassare prus su setore de su turismu, chi est de importu mannu pro s’economia de Sa Idda, a sa casualidade ma ddu bolet guvernere punnende a sa sustenibilidade econòmica e ambientale e a s’annoamentu a manera de criare una retza manna chi in pongat in pari totus is operadores santantioghesos.
Su fine cida passadu fiat su primu in zona bianca, e in Carbònia at fatu ispantu mannu s’àliga chi ant lassadu is piciocos totu a giru de s’anfiteatro de Pratza Marmilla. Siguramente totus seus istados giòvunos e eus isballiadu, ma in custu casu si fueddat de gente a muntones chi ammostrat pagu istima e fortzis minisprètziu pro una de is pratzas prus bellas de Europa. Pertantis sighint is episòdios de rapinas e de violèntzia e is arrestos. Siguramente sa situatzione no est bona pro nudda e serbit un’interventu forte siat de is rapresentantes de is istitutziones, massimante in is iscolas, siat una presèntzia prus forte de is Fortzas de s’Òrdine sende ca a parit chi sa tzitade siat torrada a is primos annos 90.
Su 5 de martzu est incumentzada in s’ispidale Sirai sa campagna de vacinatzione pro is antzianos cun prus de 85 annos ma is vacinos arribados sunt pagos de diaderus e no at a èssere fàtzile pro is antzianos a si prenotare. Duncas est netzessàriu chi fillos e nebodes donint una manu de agiudu a is chi sunt prus a inantis cun s’edadi e non sunt acostumados a impreare sa tecnologia. In su Sulcis sa campagna vacinale s’at a fàere in Carbònia, in Igrèsias e in Sant’Antiogu. Pro su chi pertocat s’ispainadura de su covid in su territòriu sighint a arribare novas bonas: is tampones fatos a is istudentes de su Mineràriu de Igrèsias (chi fiat serradu pro siguresa) e in is iscolas de Gonnesa ant torradu totus èsitu negativu. In Carbònia is positivos sunt abasciados a 28; sunt torrados a zeru is positivos in Domunosa (a pustis de 5 meses) e in Nuxis, ma nc’at de sinnialare 6 casos nous in Teulada, in Portescusi invècias artziant is positivos sunt 9.
Is datos sunt premiende sa Terra nostra e si boleus abarrare in zona bianca est pretzisu a rispetare a is normas de distantziamentu sotziale e de igene chi ormai conosceus de un annu. S’augùriu est de abarrare semper sanos!
Roberto Pinna
