Sa cida sulcitana in curtzu. Dae s’8 a su 14 de martzu.
Lunis 8 de martzu fiat sa die internatzionale de sa Fèmmina e in Carbònia su sìndigu Paola Massidda in paris a àteras amministradoras de su territòriu ant incingiadu su tzentru antiviolentzia chi bolet èssere unu logu siguru, fatu de is fèmminas pro is fèmminas, aundi is chi ant dèpidu patire violèntzias potzant incarrerare unu camminu de riscatu sotziale. Sàbudu invècias ant incingiadu sa panchina arrùbia in pratza Rinàscita. S’initziativa dd’at proposta s’assòtziu de volontàrios “Senso Comune” cun su patrotzìniu de s’Amministratzione Comunale pro regordare totus is episòdios aundi is fèmminas sunt vìtimas de sa violèntzia de is òmines.
Martis 9 Su Consìliu Regionale at aprovadu s’artìculu 5 de sa lege noa de riforma de is entes locales chi prevedit chi si torrint a istituire is provìntzias de Gaddura, Ollastra e Sulcis-Iglesiente chi at a tènnere Igrèsias e Carbònia pro cabulogos. In su mentris puru sa RAS si adeguat a is àteras regiones: is eletziones amministrativas chi fiant prevèdidas in beranu s’ant fàere in atòngiu (in su periodu 15 de cabudannni – 15 de mesi de ladàmine) e duncas sa campagna eletorale chi ormai fiat giai incumentzada s’at a allonghiare de assumancus tres meses. In su Sulcis si votat in Carbònia, Domunosa, Santu Giuanni Suèrgiu, Narcau, Perdaxus, Masainas e Villaperùciu.
S’amministratzione comunale de Igrèsias tentat de provare a risòlvere su problema de sa mancàntzia de domos de bìvere. Infatis dae is datos de s’ufìtziu tributos asserit ca in su 2019 ddoi at 1400 apartamentos isbòidos e 200 famìlias ant fatu sa dimanda pro s’allògiu de ERP. Duncas s’amministratzione at introdùsidu sa ridusidura de is tassas pro is chi apesonant sa domu cun cuntratu regulare: pro una domu isbòida s’alìcuota IMU est a 1,06, pro una domu pesonada est 0,8; pro una domu pesonada cun cànone cuncordadu (prus bàsciu de 350 èuros a su mese) s’alìcuota IMU est 0,63 cun d-un’àtera ridutzione de su 25% . Sa pròpiu cosa balet pro is immòbiles a impreu cummertziale: s’alìcuota pro unu locale isbòidu est a 1,06 pro unu pesonadu est a 0,86. S’iscòpu est de circare de cuntrastare su fenòmenu de is pesones pagadas in nero e de circare de abasciare su prètziu de is cànones de locatzione. Cunfirmada in prus s’esentzione de sa TARI pro is residentes novos.
Su Comunu de Bidda Massàrgia, at abertu unu bandu pro sa formatzione de una graduatòria de aundi leare is nominativos pro fàghere tirotzìnios de ses meses pro laureados in is setore amministrativu, contàbile e culturale de is ufìtzios comunales in s’annu 2021. Is chi sunt interessados podent castiare s’avisu pùbblicu de seletzione chi si agatat in su situ ufitziale de su Comunu.
Sàbudu In su munitzìpiu de Santadi su sìndigu Massimo Impera cun s’assessora a sa cultura Veronica Impera at agratziadu s’artista Giuseppe Congiu Manca chi at donadu a su Comunu una istàtua de perda chi si narat "Dea dell'emigrato e della fratellanza". S'òpera est dedicada a sa mama, Nicolina Manca, nàschida in Santadi in su 1914 e emigrada a giòvuna ma chi est sèmper abarrada afetzionada sa bidda aundi fiat nàschida.
A pustis sa polèmica manna de cida passada pro s’àliga lassada in s’anfiteatru de pratza Marmilla, in Carbònia sa situatzione domìniga 14 fiat de siguru prus bona: giòvunos a giru nche-nde fiat meda a su pròpiu ma su logu est abarradu bastanti lìmpiu. Tocat a tènnere in cunsideru chi su sìndigu Paola Massida at proibidu sa bèndida de calisisiat genia de cosa de bufare de is 15:00 a is 23:00 foras de is locales autorizados e chi unas cantu babbos e mammas sunt andados a faeddare a is piciocheddos e ant allichiridu su logu impari. Diferente sa situatzione in Igrèsias: su sìndigu Mauro Usai cun d-unu vìdeu in direta Facebook est partidu deretu a ameletzare a is chi ant lassadu s’àliga in su campetu de sa scola mèdia n.2 sende chi gràtzias a is ripresas de is telecàmeras de siguresa in pagu ora aiant giai identificadu unus 10 piciocos. A ora de pràngiu su logu fiat bellu e allichiridu. Siguramente duas maneras diferentes de afrontare una problemàtica uguale ma ambaduas eficatzes.
Agiornamentu de sa situatzione covid in su territòriu. Ammelliorat su datu de Igrèsias, aundi nc’at 16 positivos e 3 ricoverados ma sunt 73 is personas in corantena. Abbarrat istàbile su datu de Carloforte aundi ddoi at 8 positivos e 7 in corantena e de Portescusi (7 positivos). In Santu Giuanni Suèrgiu a pustis de unu mese chi fiat a zeru si torrant a registrare 5 casos cun su servìtziu de trasportu iscolàsticu suspèndidu; si signalant 4 casos in Musei e 1 in Giba.
Pro imoi e tanti is nùmeros sunt ancora bonos, ma ormai est cosa connota chi bastat unu momentu pro torrare a segus, duncas depeus sighiri a rispetare is normas de igene e de distantziamentu sotziale. S’augùriu est de abarrare semper sanos!
A cura di Roberto Pinna
